ސުރުޚީގައި މިހެން މިލިޔެލަނީ އުފަލުންނެވެ. އަޅުގަނޑު ހަނދާންހުންނަނީ ރަށުގައި ކިޔަވަން އުޅުނު ދުވަސްވަރު ފުޅިބައްތީގެ އަލީގައި ކިޔެވި ހަނދާނެވެ. ނުކިޔަވަން އުޛުރެއް ދައްކަން ނޭނގޭކަމަށް ހަދާފައި ފުޅިބައްތީގެ ހުޅުކޮޅުވެސް މަޖަލަކަށް ނިއްވާލަމެވެ. އެދުވަސްވަރުގައި ރަށުގެ ކޮންމެ މަޔަކުއަދި ބަފަޔަކު، އަދި މަޑަވެލީގެ ބިމުގައިވާ ކޮންމެ ވެލިފުކެއްގެ އުއްމީދުކުރަމުން އައީ ރަށުގައި ކޮންމެވެސް ސިފައެއްގައި ކަރަންޓުގެ ޚިދުމަތް ލިބޭނެ ދުވަހަކަށެވެ.

މިފުރުސަތުގައި ރައްޔިތުންނަށް ދަތިހާލުގައި ކަރަންޓުގެ ޚިދުމަތް ފޯރުކޮށްދިން ރުއްދޮށުގެ ޢަބްދުﷲ އިބްރާހީމްގެ (ޢަބްދުﷲ ބެއްޖާ، މާފޮޅޭގެ) ފުރާނައަށް ރަހްމަތްލެއްވުން އެދި ދުޢާކުރަމެވެ. އޭނާއަކީ ރައްޔިތުންނަށް ޚިދުމަތްތަކެއް ފޯރުކޮށްދިން މީހެކެވެ.

މަޑަވެލީގެ ރައްޔިތުން ކަރަންޓުގެ ޚިދުމަތަށް ފާޅުގައި ގިނަ މަސައްކަތްތަކެއް ކުރިއެވެ. މިލިޔުމުގައި މިބަލާލަނީ ރައްޔިތުންގެ އަތުން ޗަންދާ ނެގުނު ހިސާބުން ފެށިގެން ކަރަންޓުގެ ޚިދުމަތް ޔޫޓިލިޓީސް ކުންފުންޏަށް މަޑަވެލީގެ ބަޔަކު ހިބައިން ދިނުމާ ހަމައަށެވެ.

މަޑަވެލީގައި ކަރަންޓުލުމަށް ރައްޔިތުންވި އަގުހުރި ގުރުބާނީގައި އެންމެ ފާހަގަކުރެވެނީ ކޮންމެ ގެއަކުން ޗަންދާއެއްގެ ގޮތުގައި 300 ރުފިޔާ އެކަމުގައި އިސްކޮށް އުޅުނު މީހުންނާއި ޙަވާލުކުރިކުރުމެވެ. މިކަމުގައި ފަގީރެއް މުއްސަންޖެއް ތަފާތެއް ނުވެއެވެ. ރަށުން ބޭރުގައި އަދި ރަށުގައި އުޅޭ މީހަކަށް ތަފާތެއް ނުކުރެއެވެ. ކޮންމެ ގެއަކުން ފައިސާ ލިބުނުކަމުގައިވިޔަސް، އިންޖީނުގެ އެޅުމާއި، އިންޖީނުގޭގެ އެހެނިހެން ޚަރަދު ބަރަދު ހަމަޖެއްސުމަށް ބޭނުންވާ ފައިސާ ހަމަނުވިއެވެ. އިސްކޮށް އުޅުނުމީހުންގެ ލަފާގެ މަތިންނާއި، އެކުވެރިކަމުގެ ރޫހު ރަށުގައި އޮތްވަރުން އަންހެނުންގެ ކޮމިޓީއިން، އެވެރިން ބުރަމަސައްކަތުން އެއްކުރި 13000 ރުފިޔާ ކުރިންދެންނެވި އިސްކޮށް އުޅުނު މީހުންނާއި ޙަވާލުކުރިއެވެ. އުއްމީދަކީ ކަރަންޓުލުމެވެ.

އަޅުގަނޑަކީ އެމަސައްކަތް ދުށް މީހެއް ނޫނެވެ. އަޅުގަނޑަށް އިވުނީ މީހުންވާހަކަ ދައްކާ އަޑެވެ. ފެނުނީ ރައްޔިތުން ކޮޅަށް ޖެހި ބިނާއަކާއި، އަގު ހެޔޮކޮށް ޚިދުމަތެއް ދެމުން އައިތަނެވެ. މިދައްކަނީ އިންޖީނުގެ އެޅިވާހަކައާއި، ޚިދުމަތް ދޭން ފެއްޓި ގޮތުގެ ވާހަކައެވެ. އިންޖީނުގެ އެޅުމުގައި މަސައްކަތްކުރި ހުރިހާއެންމެނަކީ ހިލޭސާބަހަށް މަސައްކަތްކުރި މީހުންނެވެ. ރަށު އޮފީހުގައި މަސައްކަތްކުރާ ހިޔާ ވަހީދު އާއި ހަސަންމަނިކުގެ ނަން މިކަމުގައި އަޅުގަނޑު ފާހަގަ ކުރަމެވެ. މަސައްކަތްކުރާ ގަޑީގައި ކެއުންބުއިމުގެ ކަންތަކަށް އެހީތެރިވެދިނީވެސް މަޑަވެއްޔަށް ހެޔޮއެދޭ ހެޔޮ އަންހެންވެރިން ތަކެކެވެ. އެއިން އެކެއްގެ ނަންނޭގުނަސް އެމީހުނަށް ޝުކުރުވެރިވަމެވެ.

ކޮންމެއަކަސް އިންޖީނުގެ އަޅައިފިއެވެ. އިންޖީނެއް ނެތި ކަރަންޓެއް ނުދެވޭނެއެވެ. މައުލޫމާތު ދޮގު ނޫންނަމަ އެންމެ ފުރަތަމަ މަޑަވެއްޔަށް އިންޖީނެއް ހަދިޔާކުރީ ގައްދޫ ޒާހިރެވެ. އެއީ 65 ވޯޓުގެ އިންޖީނެކެވެ. މިހިސާބުން ރައްޔިތުންގެ މަސައްކަތް ނިމުނީއެއް ނޫނެވެ. ރައްޔިތުންގެ ނަމުގައި އިސްކޮށް ހަރަކާތްތެރިވި ބަޔަކު ރީތި ގޮތުގައި ސަލާންޖަހައިގެން ގާސިމް އިބްރާހީމް އަތުން 100 ކިލޯ ވޯޓުގެ އިންޖީނެއް ހޯދިއެވެ. ކަނޑި (ކޮންމެވެސް މީހެއް) އަތުން ހަމަ 100 ކިލޯ ވޯޓުގެ އިންޖީނެއް ހޯދިއެވެ. ރަައްޔިތުން ބޭނުންވާވަރާއި ކައިރިއަށް ޚިދުމަތް ދޭން ފެއްޓުނީ އަދި ކިރިޔާއެވެ.

ސުވާލު އުފެދިދާނެއެވެ. އިންޖީނުގޭގެ އިދާރީ މުވައްޒަފުންނާއި އެތަނުގެ ޚަރަދު ބަރަދު ހަމަޖެއްސީ ކިހިނަކުން ބާވައެވެ. ކުރުގޮތަކަށް ބުނާނަމަ، އެކަންވެސް ހަމަޖެހުނީ ރައްޔިތުންގެ ފައިސާއިންނެވެ. ތެލާއި، މަރާމާތު ކުރުމަށް ފައިސާ ހޯދީވެސް ހަމަ އިންޖީނުގެއިން ލިބުނު ފައިސާއިންނެވެ.

ވަރަށް ކެރިހުރެ ބުނަމެވެ. މަޑަވެލީގެ ރައްޔިތުންގެ އިންޖީނުގެ އެޅުމާއި، އެކަމުގައި މަޑަވެލީގެ ރައްޔިތުން ދެއްކި ރީތި ނަމޫނާއަކީ މިދިވެހި ރާއްޖެއިން ވަރަށް މަދުންނޫނީ ނުފެންނާނެ ވަރުގެ ރީތި ނަމޫނާއެކެވެ. ސަރުކާރުގެ ޛައްރެއްގެ މިންވަރުގެ ޚަރަދެއް އެކަމުގައި ނެތޭ މިބުނަނީ އެކަމާ އުފާކުރަމުންނެވެ.

އިންޖީނުގެއިން ފުރަތަމަ ކަރަންޓުދެމުން އައީވެސް އަގުހެޔޮކޮށް ރައްޔިތުން ބޭނުންވި އަގަކަށެވެ. ފުރަތަމަ ޔުނިޓުން 30 ޔުނިޓާހަމަ އަށް ނެގީ އެންމެ 5 ރުފިޔާއެވެ. 30 ޔުނިޓުން 60 ޔުނިޓާހަމައަށް ނެގީ އެންމެ 4 ރުފިޔާ 50 ލާރިއެވެ. 60އިން 90 ޔުނިޓާހަމައަށް 4 ރުފިޔާއެވެ. އަދި 90އިން މަތީގެ ކޮންމެ ޔުނިޓަކަށް 3ރުފިޔާ 75 ލާރީގެ ރޭޓުންނެވެ. މިއީ ރަށަށް ލިބުނު ކުރިއެރުމެކެވެ. ރަށުގެ ރައްޔިތުންގެ އުއްމީދެއް ހާސިލުވުމެވެ.