ނޫސްވެރިންނަކީ ވަކިފަރާތަކަށް ނުޖެހި ލިޔާބައެއް ކަމަށް އޮންނަނީ ޤަބޫލުކުރެވިފައެވެ. އެހެންނަނަމަވެސް ޙަޤީޤަތަކީ ނޫސްވެރިންނަކީ އަބަދުވެސް ވަކިފަރާތަކަށް ބުރަވެތިބެ ލިޔާބައެކެވެ. ފަހަރެއްގައި އަޅުގަނޑު މިހެން ބުނުމުން ތީގެ ތެރެއިން ބައެއް ބޭފުޅުން އެކަމާއި ހިތްޕުޅު ހަމަނުޖެހުމަކީ އެކަށީގެންވާ ކަމެކެވެ. އެހެންނަމަވެސް ޙަޤީޤަތަކީ މިއީއެވެ.

މިސާލަކަށް ބަލަމާ ހިނގާށެވެ. މަސްތުވާތަކެތީގެ މައްސަލައާއި ގުޅިގެން ލިޔާ ލިއުމެއްގައި ވަކި ކޮޅަކަށް ނުޖެހި ލިޔާނެގޮތެއް އޮންނާނެ ހެއްޔެވެ. ކޮންމެ ގޮތެއްވިޔަސް އެލިޔާ މީހާއަށް އޭރަކު ފެންނަ ރަނގަޅުގޮތަށް އަބަދުވެސް އޮންނާނީ ބުރަވެފައެވެ. އެހެންނަމަވެސް ހަވީރު ނޫހުގެ ނޫސްވެރިންގައި ގައި އަށަގެންފައިވާ ވަރަށް ވަކިފަރާތަކަށް ޖެހުމުގެ ސިފަތައް އަށަގެންފައިވާ ބައެއް އަޅުގަނޑު ނުދެކެމެވެ.

މިހާރު މިޖެހިގެން އުޅޭ ކޯޓު އަމުރުގެ މައްސަލައިގައި ބޭންކަށް ފުލުހުން ކޯޓުއަމުރު ނުހޯދައި ވަން މައްސަލައާއި ގުޅިގެން ހަވީރު ނޫހުގައި ލިޔެފައިވާ ލިޔުމަށް ބައްލަވާލައްވާށެވެ. އެމައްސަލައިގައި ފުލުހުން ކުރީ ކުށެއްކަން ދައްކަން މަސައްކަތްކޮށްފައިވަނީ އިންތިހާއަށެވެ. ފުލުހުންނަށް ފާޑުކިޔާ ކުރީގެ ސަރުކާރަށް ނިސްބަތްވާ ދެބޭފުޅުން ދެއްވި އިންޓަރވިއު އެލިއުމުގައި ހިމަނާފައިވެއެވެ. އެހެންނަމަވެސް ފުލުހުންގެ ފަރާތުންވެސް، އަދި ސަރުކާރުގެ ފަރާތުންވެސް އަދި ތަފާތު ޚިޔާލެއްގެ ޤާނޫނީ ބޭފުޅެއްގެ ރައުޔުވެސް އެލިއުމުގައި ގެނެސްދީފައި ނުވެއެވެ.

މިއަށްވުރެ ހެއްވާ ކަމަކީ އެލިއުމަށް ކިއުންތެރިން ކޮށްފައިވާ ކޮމެންޓް ތަކުގެ ތެރެއިން އެލިއުމަށް ތައީދުކޮށްފައިވަނީ އެންމެ ދެކޮމެންޓް ކަމަށް ވާއިރުވެސް ހަވީރު ވެބްސައިޓްގައި ހައިލައިޓްކޮށްފައި އޮތީ އެލިއުމަށް ތާއީދުކޮށްފައިވާ ކޮމެންޓެކެވެ. ފުލުހުންގެ ދިފާޢުގައި އެތައް ބައިވަރު ކޮމެންޓް ކިއުންތެރިން ލިޔެފައިވާއިރުވެސް ހަވީރުގެ ނޫސްވެރިންނަށް އެއީ މާ މުހިއްމު އެއްޗަކަށް ނުވެއެވެ. ވަކިފަރާތަކަށް ޖެހުނަސް މިއީ ދެން ތަންފުކެއް ބޮޑުވަރެވެ.