2008 ވަނަ އަހަރުގައި ޔުނިސެފުގެ ހިލޭ އެހީގެ ދަށުން ދިވެހިރާއްޖޭގެ ކޮންމެ ރަށެއްގެ ސްކޫލަށް އިންޓަރނެޓްގެ ޙިދުމަތް ދިނުމުގެ ގޮތުން ދިވެހި ރާއްޖޭގެ މުވާސަލާތީ އެންމެ ދުވަސްވީ އަދި އެންމެ ވަރުގަދަ އެހާމެ މުއްސަނދި ކުންފުނި ކަމުގައިވާ ދިރާގާއި ހަވާލުކުރެވުނެވެ. ނަމަވެސް ވެވިފައިވާ އެއްބަސްވުމާއި ދިރާގުން ވަނީ އެތައްގޮތަކަށް ޚިލާފުވެފައެވެ.

ފުރަތަމަ އަށްވެސް ޚިދުމަތް ފޯރުކޮށްދޭންޖެހޭނެކަމަށް އެއްބަސް ވެވިފައިވާ ތާރީޚު ފަހަނައަޅައި އެތައް ދުވަހެއް ފާއިތު ވީއިރުވެސް ގިނަ ސްކޫލުތަކަށް މިޚިދުމަތް ނުދެވެއެވެ. ކުރެވިފައި ހުރި ކަމަކީ ނެޓްވޯކް ކޭބަލްތައް އިންސްޓޯލް ކުރުން އެކަންނެވެ. ދުވަސްގަނޑެއްފަހުން މިޚިދުމަތް ތައާރަފުކުރެވިފައިވާއިރު ހުރިހާ ސްކޫލެއްގައިވެސް ދިމާވަނީ ހަމަ އެއްމައްސަލަ ތަކެކެވެ. އިންޓަރނެޓް ކަނެކްޝަން އަބަދުވެސް ކޮންމެ 5 މިނެޓަކުން ކެނޑިފައި ލިބެނީ 10 ވަރަކަށް މިނެޓް ފަހުންނެވެ. އަނެއްބައި ފަހަރަކަށް ކަނެކްޝަން ކެނޑި ލިބޭނެ އިރެއްގެ އިންތިޒާރުގައި ގަޑި ދެގަޑީއިރު ހޭދަކޮށްލަންޖެހެއެވެ. މީގެ އިތުރުން ދިރާގުން މި ޕުރޮޖެކްޓްގެ ދަށުން ސްކޫލުތަކުގައި ބެހެއްޓިފައި ހުރި ކޮމްޕިއުޓަރ ސިސްޓަމް ތަކުގައި އިންސްޓޯލް ކުރެވިފައި މުޅީންވެސް ހުރީ ސޮފްޓްވެއަރ ތަކުގެ ޓްރައަލް ވާރސަންތަކެވެ. މިއީ ވަރަށް ހެއްވާކަމެކެވެ. ޔުނިސެފް ކަހަލަ ބޮޑު ޤަދަރުވެރި ފަރާތަކުން ދުނިޔޭގެ ފަގީރު ގައުމުތަކުގައި ހިންގޭ މިފަދަ ކަންކަން އެއްފަޅިން ކޮށްފާނެ ބާއެވެ. ހަމަ ޔަގީނުންވެސް ނުކުރާނެޔެވެ.

ދިރާގުން ތިމާމެންވަރު ބަޔަކުނެތިގެން މިކަހަލަ ކަންކަމަށް ބޯމަހައިލައި ދިވެހިރައްޔިތުންނަށް އަދިވެސް މިދަނީ ގެއްލުމާއި ހަލާކު ކުރިމަތިކުރުވަމުންނެވެ. މިވޭތުވެދިޔަ ދިގުމުއްދަތުގައިވެސް ކަންތައްތައް ކުރިފަދައިންނެވެ. މިވީ ހުރިހާ ދުވަހު ދިވެހިރައްޔިތުންގެ ބިންތަކުގައި ތިބެ ބުއީ ދިވެހިރައްޔިތުންގެ ލެޔެވެ. އަދިވެސް އަލާނުކެނޑޭ ކަހަލައެވެ. ޒަމާނުއްސުރެ ކަންތައް ކުރަމުން އައި އުސޫލުން މި ޕްރޮޖެކްޓްވެސް އެހެންބަޔަކަށް ދިޔަނުދީ ތިމާމެންގެ ނުފޫޒު ބޭނުންކޮށްގެން ވެރިވެގަނެ ޔުނިސެފުން އެތައް މިލިޔަން ޑޮލަރެއް ކަޅާކޮށްލައިގެން މިތިބެނީ ހެވިފައެވެ.

މިމައްސަލަތައް ހައްލުކޮށްދިނުމަށް ދިރާގާއި ސްކޫލުތަކުން ވާހަކަ ދެއްކުމުން ދޭ ޖަވާބަކީ އިންޓަރނެޓް ސްކޫލުތަކަށް ދިނުމަށް ތިމާމެން މިބޭނުން ކުރާ ވަސީލަތަކީ ތިމާމެންނަށް ވަރަށް އާ އެއްޗަކަށް ވުމުން ވާނުވާ އަދިވެސް ނޭގެނީ ކަމަށެވެ. އަދި ރަނގަޅުކުރުމަށްޓަކައި ދިރާސާތަކެއް ކުރަމުންދާކަމަށެވެ. އަޅެ ދިވެހީން މިތިބީ ހޭބަލިވެފައި ހެއްޔެވެ. ހަގީގަތް ރަނަގަޅަށް ނޭގޭ ވަސީލަތެއް ބޭނުންކޮށްގެން މިކަން ކުރެވޭނެކަމަށް ބަލައި މިކަމާއި ދިރާގުން ހަވާލުވާން ޖެހޭހެއްޔެވެ. އަދިވެސް ލިބޭވަރު މަދީހެއްޔެވެ. ދިރާގު ނޫނަސް މިކަން ކުރެވޭ ފެންވަރުގެ އެހެން ކުންފުނިތައްވެސް ރާއްޖޭގައި އެބަހުއްޓެވެ. އެމީހުން މިކަންކުރަން ދޫކޮށްނުލީ ކީއްވެހެވެ.

މިކަމުގައި އެޑިއުކޭޝަން މިނިސްޓްރީއާއި ޔުނިސެފްގެ ފަރާތުން ރާއްޖޭގައި ތިބިބަޔަކުވެސް ވަނީ އިހުމާލުވެފައި ކަމަށް ދެކެމެވެ. ސަބަބަކީ ޔުނިސެފާއި އެޑިއުކޭޝަންގެ މަގުސަދު ދިރާގުން ކަންކުރަމުންދާގޮތުން ހާސިލް ނުވާއިރުވެސް އަޅާ ކަހާވެސްނުލައެވެ. އަދި މިއިން އެއްވެސް ފަރާތަކުން މިކަމާއި ބެހޭގޮތުން ވެގެން އުޅޭގޮތެއް ސްކޫލުތަކަށް އޮޅުންފިލުވައިދިނުމުގެ ގޮތުން އެއްވެސް މައުލޫމާތެއް މިހާތަނަށް ދީފައެއް ނުވެއެވެ.