މުރާސިލް.ކޮމް އިން ލިޔުންތެރިކަން އެންމެނަށް މަގުފަހި ކޮށްދިނުމާއި އެކު ލިޔުންތެރިކަން ހިތަކަށް ލިބިގެން އުޅޭތަން ފެނުމުން އުފާވެވެނީ 'ފައްކާ' ލިޔުންތެރިންގެ ގަލަމުގެ ދޯރި ނެގުމުންނެވެ. އަދި ހަމަ އެހެންމެ ދެރަވެ ހިތާމަ ކުރަން ޖެހެނީ 'ފީކަޅާ' ލިޔުންތެރިންގެ ތާކުންތާކުން ނުޖެހޭ ލިޔުންތައް ފެނި ކިޔާލުމުންނެވެ.

ހަސަނާއި ހުސޭން އަކީ ޅަފަތުގައިވެސް ވަރަށް މަސައްކަތް ކުރާހިތްވާ ދެ ސޮރުންނެވެ. ހަސަނާއި ހުސޭން އަށް އެސޮރުންގެ ބައްޕަ އީދު ހަދިޔާއަކަށް ދިނީ 'ވަޅި އެކެވެ' އެދެސޮރުން ތުއްޕުޅުކަމުން އެދެސޮރުންނަށް އެވަޅިން ކުރާނޭ ކަމެއް ނޭނގި ވިސްނަން ފެށިއެވެ. ދެސޮރުންވެސް ވިސްނިއެވެ. އެ 'ހަދިޔާ'ގެ ބޭނުން ހިފާނެ ގޮތަކާއި މެދުގައެވެ.

'ތިރީސް އަހަރުފަސް.'

ހުސޭން އަކީ ރަށުގެ އެންމެ މުއްސަނދި މީހާއެވެ. އެތައް ބަޔެއްގެ ރުހުމާއި ލޯބި ލިބި އުފާވެރި ދިރިއުޅުމެއް ވޭތުކުރަމުން އަންނަ ވިޔަފާރިވެރިއެކެވެ. ހުސޭން އަކީ ވަޅިއަކުން މުއްސަނދިވި މީހެކެވެ. ދެން ހުރީ ހަސަނެވެ. އޭނާ އަކީ މުޅި ރަށުގެ 'ދާދާ' އެވެ. ރަށުގެ އެންމެންހެން އޭނާ ފެނުމުން އެއްފަރާތްވެއެވެ. އޭނާ އަކީ ވެސް ވަޅިއަކުން އެންމެންގެ ސަމާލުކަން ހޯދި މީހެކެވެ.

ހަދިޔާ އަކަށް 'ވަޅިއެއް' ލިބުމުން އޭގެ ބޭނުން ދެމީހުން ހިފީ ދެގޮކަށެވެ. އެކަކު އޭގެ ބޭނުން ހިފީ އެންމެ އެދެވޭ ގޮތުގައެވެ. ދިރިއުޅުން އާރާސްތުކުރުމުގެ ވަސީލަތެއްގެ ގޮތުގައެވެ. އަނެކަކު އެވަޅީގެ ބޭނުން ހިފީ ދިރިއުޅުން ސުންނާފަތި ކުރާ ހަތިޔާރެއްގެ ގޮތުގައެވެ. އެކަކު ވަޅިން ދަރުކޮށާ ވިއްކައިގެން މަހުޖަނަކަށް ވީއިރު އަނެކާވީ ވަޅިން މީހުންމަރާ މުޖުރިމަކަށެވެ.

'ލިޔުންތެރިކަން އެންމެނަށް' މިޝިޔާރުގެ ދަށުން ލިޔުންތެރިކަމުގެ ފުރުސަތު ފުޅާ ދާއިރާއެއްގައި ހުޅުވާލުމުން މީގެ ބޭނުން ހިފާން ވާނީ އެންމެ އެދެވޭ ގޮތުގައެވެ. ތެދެއްމެއެވެ. ގަލަމެއް އޮތިއްޔާ ލިޔެވިދާނެއެވެ. މިއީ އަޅުގަނޑުމެންނަށް ފުޅާ ދާއިރާއެއްގައި ލިބިދީފައިވާ މިނިވަން ކަމެކެވެ. އެހެންކަމުން 'ލިޔުންތެރިކަން އެންމެނަށް' ލިބިގެން އޭގެ ސަބަބުން ތިމާގެ ޝުއޫރުތަކުން އަނެކާއަށް ފައިދާތަކެއް ކުރުވުމެވެ. އެއްވެސް ހާލެއްގައި އޭގެން 'ތުރާ' ލިބުމެއް ނޫނެވެ.