ރޯދަމަހަކީ ބަޔަކުމީހުންނަށް މަޖާނަގާ ނުކައިތިބެފައި ނިކަން މީރުކޮށް ސާމާނު ހަދާލައިގެން ކެއުމުގެ މަހަކަސް، ބަކުރުބެއަށް ރޯދަމަހަކީ ސީދާ އަޅުކަމުގެ މައްސަރެކެވެ. މިގޮތުން ރޯދަމަހުގެ ރޭގަނޑުގައި ކުރެވޭ އެންމެ މުހިންމު އަޅުކަންތަކުގެތެރޭގައި ތަރާވީސްނަމާދަކީ ނިކަން ޝައުގު ވެރިކަމާއެކު ގިނަ ދިވެހި އިޚުލާސްތެރި މުސްލިމުން ކުރަމުން އަންނަ އަޅުކަމެކެވެ.

ކޮންމެރެއެއްގެވެސް ޢިޝާނަމާދުގައިބަކުރުބެ އެންމެ އިތުބާރުކުރާ ޝެއިޚް، އާދެ އިސްލާމިކް މިނިސްޓްރީގެ ސްޓޭޓް މިނިސްޓަރ އައްޝެއިޚް ޝަހީމް ޢަލީ ސައީދަށް ﷲ ދެއްވަފައިވާ ބޮޑުނިޢުމަތް ކަމުގައިވާ ރީތިއަޑާއި ޤުރުއާން ކިޔެވުމުގެ މޮޅު ހުނަރުން މުޅި މަރުކަޒު ގުގުމާލައެވެ. ކޮންމެ ރެއެއްގެވެސް ޢިޝާނަމާދުގައި ޝޭޚުގެ ސަޅިކިޔެވުމަށްފަހުގައި ދެން އޮންނަނީ ތަރާވީސްނަމާދެވެ. ކިޔަވަނީ ބޭރުގެ ގާރީންނެވެ. ދެބޭފުޅުންތިބެއެވެ. އެއްބޭފުޅަކު 10 ރަކުއަތް ކޮއްފަ އަނެއްބޭފުޅާއަށް ހަވާލުކުރެއެވެ. މިހެން ގޮސް 20 ރަކުއަތް ހަމަވުމުން އަނެއްކާ ކުރިން ކުރެއްވި ބޭފުޅާ އަރައި ވިތުރީގެ 3 ރަކުއަތް ކުރެއެވެ. މުޅިއަކު 23 ރަކުއަތެވެ.

އެކަމަކު ދަންނަވަންތޯއެވެ. ބަކުރުބެގެ ބޮލުގައި މިއުޅެނީ ހަމަ ސުވާލުތަކެއް އުފެދިގެންނެވެ. ޕޮއިންޓުފޯމަށް އަތުރާލާނަމެވެ.

1. ބަކުރުބެ ދަނީ އިސްލާމީ މަރުކަޒަށެވެ. މިސްކިތް އޮންނަނީ ފުރިފައެވެ. ޖާގައެއްލިބެނީ ވަރަށް ކުރިން ގޮސްގެންނެވެ. އެހާ ހޫނުގަދައެވެ. ތަރާވީހުގެ 8 ރަކުއަތް ހަމަވުމުން މިބޮޑު ޖަމާއަތުގެ 60% ނަމާދު ނިންމާލާފައި ގެޔަށް ދެއެވެ.

2. ދެން ތިބެނީ ބާކީ 40% އެވެ. އޭގެތެރެއިން 25% މީހުންނަކީ އިމާމާޔާއިއެކު ނަމާދު ނިންމާލީމާ މުޅިރޭގެ އަޅުކަން ލިބެނެތީވެ ތިބޭ މީހުންނެވެ.

3. ދެން ތިބެނީ 15% މީހުންނެވެ. ބަކުރުބެ ޤަބޫލުކުރާގޮތުގައި އެއީ ކޮންމެހެން 23 ރަކުއަތް ކުރަންޖެހޭނެކަމަށް ދެކޭ މީހުންނެވެ.

4. ގާރީންގެ ތެރެއިން އެއްގާރީ ކިޔަވާލެއް މާއަވަހީއެވެ. ކޮންމެހެން ހަމަ ވަކި އަދަދެއް ކިޔަވަން ޖެހޭބާއޭ ބަކުރުބެ ހިތަށްއަރައެވެ. ވަކި ވަގުތަކަށް ނިންމަން ޖެހިގެން ކިޔަވާލެއް ފާސްޓުކަމުން ވާއެއްނުވާއެއް ހަމަ ޙަގީގަތުގަވެސް ނޭންގެއެވެ.

5. ބޭރުން ގެންނަ ގާރީން ވާންޖެހެނީ ރީތިކޮށް ކިޔަވާ މީހުންނަށެވެ. ނަމަވެސް ދެން ކިޔަވާ ގާރީގެ ކިޔެވުމުގެ ހަމައެއް ނެތުމުން ވަރަށް ނަމާދަށް އުނދަގޫވެއެވެ. އެހާ ދިގުކޮށް ކުރާއިރު އެހާ ހަޑިކިޔެވުމެއް އަޑުއިވުން ވަނީ ބޮޑު ތަކުލީފަކަށެވެ.

6. ބަކުރުބެ އަސްލުގައި މިސުވާލުތައް ކުރަން އުޅުނީ ސީދާ ޝޭޚުއާއި ބައްދަލުކޮށްފައެވެ. ނަމަވެސް 23 ރަކުއަތްކޮއްފަ ބަލާލި އިރު ޝޭޚުވެސް ނެތެވެ. ހީވަނީ 8 ކޮއްފަ ނައްޓާލީ ހެންނެވެ. ދެން މިޖެހުނީ މުރާސިލުގެ ޒަރީޔާއިން ބަކުރުބެގެ ބޮޑުސުވާލު ކުރާށެވެ.

ސުވާލަކީ ޝޭޚުމެން ނުކުރާ ކަންތައްތައް އެހެންމީހުން ލައްވަ ތިޔަ ކުރުވަނީ ކީއްވެގެންތޯއެވެ؟ ހަމަގައިމުވެސް ޝޭޚު 8 ރަކުއަތް ކޮއްފައިދާނީ އެއީ އެންމެ ރަނގަޅުގޮތްކަމުގައިވާތީ ކަން ކަށަވަރެވެ. ޔަޤީނެވެ. ދީނުގައި އޮތް އެންމެ ރަނގަޅުގޮތަށް ނޫނީ ޝެޚު އަމަލު ކުރައްވާނެކަމަކަށް ބަކުރުބެ ގަބޫލެއް ނުކުރަމެވެ.

ވީމާ ފުދޭވަރަކަށް ގިނަބަޔަކު 8 ރަކުއަތް ކޮއްފައި ފައިބައިގެންދާތީއާއި ވަރަށްގިނަ ބަކުރުބެ ދަންނަ ދީނީ ކުދިންވެސް ޝޭޚެކޭ އެއްފަދައިން ކަންތައްތައް ކުރަމުންދާތީ ޝޭޚުގެ އަރިހުން އަހާލަން ބޭނުންވަނީ، މިނަމާދު ގިނަމީހުންނަށް ކަމުދާ ފޯރމެޓަށް ބަދަލުކުރުން ވާނީ ކިހިނެތްތޯއެވެ؟



- ބަކުރުބެގެ ފަރާތުން ޝޭޚަށް -