ދުނިޔޭގެ ތަފާތު ޤައުމުތަކުގައި މީހުން ވަގަށްނެގުންވަނީ އާއްމުކަމަކަށް ވެފައެވެ. ތަފާތު ބޭނުންތަކުގައެވެ. އިންސާނާގެ ގުނަވަންތައް ވިއްކުމަށް އެއްބަޔަކު މީހުންވަގަށް ނަގާއިރު ފައިސާހޯދުމުގެ ބޭނުމުގައި އަނެއްބަޔަކު އެކަން ކުރެއެވެ. އަދި ފާހިޝްކަންތައް ކުރުވުމަށްވެސް ބައެއްމީހުން މީހުން ވަގަށް ނަގައެވެ. މިކަމަކީ މިހާރކަށްއައިސް މުޅިދުނިޔެއަށް ކުރިމަތި ވެފައިވާ ވަރަށްބޮޑު ބިރެކެވެ.

ދިވެހިރާއްޖޭގައި މީހުން ވަގަށްނަގަނީ ތަފާތު ގޮތަކަށެވެ. އެމީހުނަށްނޭގި ސިޔާސީޕާޓީތަކަށް ވައްދަނީއެވެ. ދުވަހަކު ސިޔާސީޕާޓީއަކަށް ސޮއި ކޮށްފައިނުވާ މީހަކުވެސް ޗެކްކޮށްލާއިރު އޮންނަނީ ކޮންމެވެސް ޕާޓީއެއްގެ ރަޖިސްޓްރީގައި ޖައްސާފައެވެ. އެހެންގޮތަކަށް ދަންނަވާނަމަ އެމީހާ އޮންނަނީ ކޮންމެވެސް ޕާޓިއަކުން ވަގަށް ނަގާފައެވެ. ސަރުކާރުން ސިޔާސީޕާޓީތަކަށް ފައިސާދެނީ މެމްބަރުންގެ ނިސްބަތުން ކަމަށްވާއިރު މީހުންވަގަށް ނަގައިގެން ބައިގިނަކޮށްގެން ހޯދާފައިސާ އެއީ ހަލާލުގޮތުގައި ލިބޭއެއްޗެއްތޯ އެފަދަ ޕާޓިތަކުން އެއްފަހަރުވެސް ވިސްނާލިބާވައެވެ. ދިވެހިރާއްޖޭގައި ތޭރަ ސިޔާސީޕާތި ރަޖިސްޓްރި ކޮށްފައިވާއިރު އެއިގެ ތެރޭގައި ޞައްގޮތުގައި ތިންހާސް މެމްބަރުން ހަމަކޮށްފައިވަނީ ކިތައް ޕާޓީން ބާވައެވެ. އަދި " ބޮޑު ދެޕާޓީ " ކަމަށްދައުވާކުރާ ދެޕާޓިން ބައިގިނަކޮށްފައިވަނީ މިފަދަ ގޮތަކަށްނޫންބާވައެވެ. ސޮއިކޮށްފައިވާ ޕާޓީގެ ރަޖިސްޓްރީގެ ބަދަލުގައި އެހެން ޕާޓީއެއްގެ ރަޖިސްޓްރީގައި ނަންއޮވެގެން ޝަކުވާކުރާ މީހުން މިހާރަކަށްއައިސް ވަރަށްގިނައެވެ. މިއީ ޤައުމީ މަސްއަލައަކަށް ވަނީ ވެފައެވެ. މީހުން ވަގަށްނެގުމުގައިވެސް ދިވެހިންމިވަނީ ދުނިޔޭގެ އެއްވަނަ ދަރަޖަ ލިބޭހިސާބަށް ގޮސްފައެވެ.