މެކްޑޮނާލްޑް ކެންޓަކީ ޕިއްޒާހަޓް ޑޮމިނޯޕިއްޒާ ހަރޑީޒް .............. މިހެން ގޮސް ވަކި ތަނެއް ކިޔާނެ ކަމެއް ނެތެވެ. ތައްޔާރީ އަވަސް ކާނާއާއި ލުއި ބުއިންތައް އުފައްދާ ބޮޑެތި ފައިދާ ދުނިޔޭގެ އެކިކަން ކޮޅުތަކަކުން ނަގަމުންދާ ބޮޑެތި ކުންފުނި ތަކެވެ. ދުނިޔޭގެ އެކި ކަންކޮޅުތަކުން ފައިސާ ދަމައި އެއްތަނަކަށް ޖަމާކޮށް އެފައިސާގެ ބޮޑުބައެއް އިޒްރޭލަށް ހަދިޔާ ކުރާ ކުންފުނިތަކެކެވެ.

މީގެ ދުވަސްތަކެއް ކުރީން ފޯވަރޑް މެއިލަކުން އަޅުގަނޑަށްވެސް މިމައުލޫމާތު ލިބުމުން، ކަމުގެ ހަޤީޤަތާމެދު ވިސްނާލީމެވެ. މިއިން ކޮންމެ ވިޔަފާރިއެއްވެސް އާޚިރުގައި ގުޅެނީ އިޒުރޭލޭ މިކިޔާ ޒަޔަނިސްޓު ބައިގަޑާއެވެ. ޞިހުޔޫނީ ޒަޔަނިސްޓުންގެ ތަރައްޤީއަށެވެ. އެމީހުންގެ ދައުލަތް ބިނާކުރުމަށެވެ. ޞިހިޔޫނީންގެ ދައުލަތް ބިނާވުމަކީ މުސްލިމުންގެ ދައުލަތް (ފަލަސްޠީން) ބިމާ ހަމަކުރުމެވެ.

ފޯވަރޑް މެއިލްގައި ގޮވާލާފައި އޮތީ ވަރަށް މަތިވެރި ކަމަކަށެވެ. އަހަރުމެން މުސްލިމުންގެ އެންމެ ނިކަމެތި މީހާއިން ފެށިގެން އެންމެ މުއްސަނދި މީހާއަށްވެސް ކުރެވިދާނެ ކަމަކަށެވެ. ''ބޮއިކަޓް''ކުރުމަށެވެ. އޭގެ ޒާތުގައި ނިކަން ކުޑަކުޑަ ކަމެކެވެ. އެކަމަކު އޭގެ އަސަރު އިންތިހާއަށް ދެމިގެން ދާނެ ކަމެކެވެ. ހުޅަނގުގެ މުއްސަނދިންގެ ބޮޑެތި ބިޔަ ތިޖޫރީތަކުން ފެށިގެން ބިލިއަނުން ގުނާލެވޭ އެމީހުންގެ ބެންކު އެކައުންޓުތަކުގެ ފުނަށް ލޮޅުން އަރުވާލާނެ ފަދަ ކަމެކެވެ.

ލޮޅުން ނާރަންވީ ކީއްވެގެން ހެއްޔެވެ؟ 1.5 ބިލިއަން މީހުން ނުވަތަ ދުނިޔޭގެ އާބާދީގެ 4/1 ބައިގެ މީހުން މަދަނީ ބަސްނޭހުމަކަށް ނިކުތީމަ އަސަރުނުކުރާނެ ތޯއެވެ؟ ނޫނެކެވެ. އަސަރު ކުރިއެވެ. އަދި ކުރިއަށް އޮތީއެވެ. މީގެ ކުރީން ކޭއެފްސީއަށް އަރައި، އެއްޗިހި ނަގައިގެން ޓްރޭއަތަށްލައިގެން މޭޒެއް ހުސްނުވެގެން ހުންނަންޖެހުނު ހަނދާން އަދިވެސް އެބަހުއްޓެވެ. އެކަމަކު އިހަކަށްދުވަހު ކޭއެފްސީ ހުންނަ މަގުން ދިޔައިރު ފެނުނީ މަންޒަރު އެކުއެކީ ބަދަލުވެފައިވާ ތަނެވެ. އެހެންޏާ ކާރުތަކާއިގެން ތޮއްޖެހިފަ އޮންނަ މަގުއޮތީ ހަމހިމޭންކޮށެވެ. އެމަގުގެ ހަމހިމޭންކަމަށްވުރެ ކޭއެފްސީގެ ތެރެ ފެންނަނީ މާ ހަމަހިމޭން ކޮށެވެ. އެޔޮށް ބޮޑު ތަނުގައި ދެތިން ކަސްޓަމަރުންވެސް ނެތެވެ.

ދަންނަވަން މިއުޅެނީ ހުޅަގުން މުސްލިމުނަށް ކުރާ އިހާނާތުގެ ބަދަލު ހޯދާ ވާހަކައެވެ. ދީނަށް ނަޞްރު ދޭވާހަކައެވެ. ރަސޫލާ (ޞ) އަށް ނަޞްރު ދޭވާހަކައެވެ. އެމީހުންގެ ހަތިޔާރުން އެމީހުންނާއި ދިމާކުރާވާހަކައެވެ. އެހެންޏާ އެމެރިކާއާއި ޔޫރަޕުގެ އިއްތިހާދުން ހުއްދަނުދޭ ބަޔަކަށް ޔޫރަޕަށް/އެމެރިކާއަށް ދޮންފަޅޮލެއްވެސް ނުވިއްކެއެވެ. އެމީހުން ހުއްދަދޭބަޔަކަށް އެކަންޏެވެ. ހުއްދަދެނީ އެމީހުންގެ ގޮނޑިކޮށްކޮ ސަރުކާރުތަކަށާއި ކުންފުނިތަކަށެވެ.

އެހެންވީމަ މިއޮތީ އެމީހުންގެ ހަތިޔާރުން އެމީހުންނާއި ދިމާކުރަންވީ ވަގުތު ޖެހިފައެވެ. އެއްޗެއް ގަތުމުގެ ކުރީން ކޮންތާކު އުފެއްދި އެއްޗެއްތޯ ބަލާށެވެ. އިސްލާމީ ގައުމުތަކުން އުފައްދާ އެއްޗިއްސަށް އަހަންމީޔަތުކަންދޭށެވެ.

މަދަނީ ބަސްނޭހުން ކުރިޔަށްގެންދަންވީ ހަމައެކަނި ރާއްޖެއަށް އެތެރެކުރާ ތަކެތި ގަތުމުގައެއް ނޫނެވެ. ދީނަށް ފުރައްސާރަކޮށްފައި ލިޔާ ބޮލޮގްތަކަށް އިސްތިހާރު ދޭ ރެސްޓޯރެންޓުތަކަށް ނާރަންވީއެވެ. އެތަންތަން ބޮއިކަޓް ކުރާށެވެ. ވަކީން ޚައްޞަކޮށް ''ހލްއަތު'' ބްލޮގަށް އިސްތިހާރުދޭ ވިޔަފާރިތަކާއި ވިޔަފާރިވެރީންނެވެ.