ދިވެހި ދައުލަތުގެ މީޑިޔާގެ މައިނާރުކަމަށްވާ ޓީ.ވީ.އެމްގެ ޚަބަރުތަކަށް ނަޒަރެއް ހިންގާލާއިރު އުފެދޭ ސުވާލަކީ ޚަބަރުގަޑިތަކުގައި ގެނެސްދެވޭ ޚަބަރުތަކަކީ ކޮންބަޔަކަށް މުހިއްމު ވެގެން ގެނެސްދޭ ޚަބަރުތަކެއް ބާވައެވެ. މިހެން ދަންނަވަން މިޖެހުނީ ވަރަށް ގިނަ ސަބަބުތަކެއް ހުރުމާއިއެކުއެވެ. އަބަދުވެސް ފެންނާނީ އެއިރެއްގެ ސަރުކާރުން ކުރައްވާ ކަންތައްތައް އެއްމެ ކުރީގައި ކޮންމެ ޚަބަރެއްގައިވެސް ގެނެސްދޭ މަންޒަރެވެ. ދެން ސަރުކާރު ޒިންމާވާ ކުންފުނިތަކުގެ ވިޔަފާރިޔާ ކުޅިވަރު ޚަބަރުތަކެވެ. ދެން ގެނެސްދޭނީ ދިވެހިންނަށް އެއްވެސް ވަރަކަށް މުހިއްމު ނޫން ބޭރުގެ ކޫސަނި ޚަބަރުތަކެވެ. މިގޮތުން ދުނިޔޭގެ އެއްމެ މުސްކުޅި މީހާގެ ވާހަކަޔާއި ކޮންމެސް ޤައުމެއްގެ މީހަކު ދެދުވަސް ވަންދެން ނުކައި ހުރިވާހަކަޔަކާއި ބޮލީވުޑުގެ އެވޯޑްތަކާއި މިހެންގޮސް އެތައް ބޭކާރު ޚަބަރުތަކެކެވެ. ރޭގެ 8ގެ ޚަބަރުގައިވެސް ކޮންމެވެސް ޤައުމެއްގެ ދެމަފިރިޔަކަށް އެއްމާބަނޑު ދެކުދިން ލިބުނުއިރު އެދެކުދިންގެ އުފަންތާރީޚު ތަފާތުވީވާހަކަ ގެނެސްދިނެވެ. ދިވެހިންނަށް މިޔަށްވުރެ މުހިއްމު ކަމެއް ނެތީތޯއެވެ.



މިމަންޒަރު މިހެންފެނައިރު ޓީ.ވީ.އެމްއަށްވުރެ ހުރިހާގޮތަކުންވެސް ބަލިކަށި ދި.ޓީ.ވީ އާއި ވީ.ޓީ.ވީ އިން ދިވެހި ރާއްޖޭގެ އެކިކަންކޮޅުތަކުގައި ހިނގާ ތަފާތު ކަންކަމުގެ ވާހަކަ ނުހަނު ހީވާގި ކަމާއިއެކު ކަވަރު ކުރާކަން އުފަލާއިއެކު ފާހަގަކުރަމެވެ. އެހެންނަމަވެސް މުވައްޒިފުންނާއި ވަސީލަތްތަކާއި ބަޖެޓް އިތުރު ޓީ.ވީ.އެމް ފިރުކޭކަހަލައެވެ.



ދަންނަވަންތޯއެވެ. ޓީ.ވީ.އެމްގެ ޚަބަރުގަޑިޔަށް ރާއްޖެތެރޭގެ ރަށަކުން ކިތަންމެ މުހިއްމު ކަމެއްގެ ވާހަކަ ފޮނުވިޔަސް ގެނެސްދެވޭނީ އެރަށަކީ ރާއްޖޭގެ ރަށްތަކުގެތެރެއިން އާބާދީ ބޮޑު މަޝްހޫރު ރަށެއްނަމައެވެ. ނޫނީ އެޚަބަރަކީ ސަރުކާރަށް ރައްޔިތުންގެ ފަރާތުން ޕޮއިންޓެއް ލިބޭފަދަ ކަމެއް އެކުލެވޭ ޚަބަރެއްނަމައެވެ. އިނގުރައިދޫގެ ކުރީގެ ހުކުރުމިސްކިތް ތެޅުމާއި ވިދިގެން މުޒާހަރާ ކުރިދުވަހާއި އަދި ހަމަ އެދުވަހު އޮފީސް ތެޅި މަންޒަރުގެ ހަބަރު އިނގުރައިދޫލައިވްގެ ފަރާތުން ޓިވީއެމްއަށް ފޮނުވީމެވެ. އަދި ވީޑިޔޯވެސް އަޕްލޯޑް ކޮށްފައި ފޮނުވީމެވެ. ނަމަވެސް ހަބަރެއް ދަބަރެއް ނުވިއެވެ. ފަހަރެއްގައި މުޒާހަރާގެ ވީޑިޔޯގައި ކަތީބާއަދި ކައުންސިލަރ ގެ އިސްތިއުފާއަށް ގޮވަމުން ގޮސްފައިވާތީ ދަށްކަން ބިރުގަތީކަމަށް ވެދާނެއެވެ. އިނގުރައިދޫލައިވް އިން ފޮޓޯ އާއި ވީޑިއޯ ފޮނުވުމުން އެކަމަށް ވަރަށް ޝައުގުވެރިކަމާއި އެކު އިޖާބަ ދިނީ ވީޓީވީ އަދި ދިޓީވީ އިންނެވެ.އަދިވެސް މިފަދަ އެތައްކަމެއް އިނގުރައިދޫއަށް ދިމާވެފައި އެބަހުއްޓެވެ.



ރާއްޖެތެރޭގެ ރަށްތަކުގެ ވާހަކަ ޓީ.ވީ.އެމް ޚަބަރުގަޑީގައި ގެނެސްދޭންވީ ސަރުކާރުގެ ކޮންމެވެސް ބޮޑު ބޭފުޅެއް އެރަށަކަށް ވަޑައިގަތީމާ ހެއްޔެވެ. ނޫނީ އެރަށެއްގައި ސަރުކާރުގެ އިސްބަޔަކު ޒިޔާރަތްކޮށްގެން ކޮންމެވެސް ވޯކްޝޮޕެއް ބޭއްވެވީމާހެއްޔެވެ. ނުވަތަ ޓީ.ވީ.އެމް ބިއުރޯ ހުންނަ އަތޮޅުތަކުގެ ވެރިރަށްތަކުގައި ކަމެއްހިނގީމާ އެކަނިހެއްޔެވެ. މިދެންނެވި ބާވަތުގެ ކަމެއްނެތިއްޔާ މާލޭގައި ހިނގާ ކަންކަން ގެނެސްދިނުމަށްފަހު ވަގުތުފުރަން ބޭރުގެ ޚަބަރު ޗެނަލްތަކުން އުކުނޑިބުކުނޑި އެއްކޮށްފައި ޚަބަރުގަޑި ފުރާލުމުން އެހެރީ “އެންމެ ތާޒާ ޚަބަރާއި މަޢުލޫމާތު ރާއްޖެއާއި ދުނިޔޭގެ އެކި ކަންކޮޅުތަކުން ” ގެނެސްދެވިފައި ތޯއެވެ.


ކުރީގެ ސަރުކާރުގެ ދުވަސްވަރުގައި ޓީ.ވީ.އެމްއަކީ ސަރުކާރުގެ ޕްރޮޕެގެންޑާ ފަތުރާ މެޝިނެއްކަމަށް ދިވެހި ރައްޔިތުންގެ ގިނަބަޔަކު ޤަބޫލުކުރަމުން އައެވެ. އަދި ސަރުކާރު ބަދަލުވުމުން މިސިފަ ބަދަލުވާނެކަމަށް ވަރަށް ގިނަބަޔަކު އުންމީދު ކުރިޔެވެ. ނަމަވެސް އެއިރެކޭ މިހާރެކޭ މިކަމުގައި އެއްވެސް ތަފާތެއް ނެތެވެ. މީގެންދޭހަވަނީ އަބަދުވެސް ޓީ.ވީ.އެމްގެ އިސްފަރާތްތަކަކީ ވައިހުރި ކޮޅަކަށް ދުއްވާ ބަޔަކުކަމެވެ.