ދިރާގުން ދެއްވާ ކިލޯބައިޓަކަށް އެއްލާރިއޭ ކިޔުއްވާ އިސްތިހާރުގައި ހީވާގޮތުން މިއީ ވަރަށް އަގުހެޔޮ ހިދުމަތެކެވެ. ހިދުމަތުގެ އަސްލު އަގު އެނގެނީ އަގުތައް އެމްބީއިން ހަދާލުމުންނެވެ. ދިރާގުންދެއްވާ ކިލޯބައިޓަކަށް އެއްލާރި އެމްބީއަށް އަގު ބަދަލުކޮށްލުމުން އަގަކީ ކޮންމެ އެމްބީއަކަށް 10ރއެވެ. ވަތަނިއްޔާއިންވެސް ވަނީ ދާދިފަހުން މޯބައިލް ޕެކޭޖްތަކެއް ތަޢާރަފް ކޮށްފައެވެ. ވީމާ ދެފަރާތުން ދެއްވާ ހިދުމަތް އަދި އަގުތަކަށް ބަލާލާނަމެވެ.

ދިރާގުން މޮޑެމް އެއްވިއްކަނީ 1200ރ އަށެވެ. އެއްވެސް މަހުފީއެއް ނުވަތަ ކަނެކްޝަންފީ އެއްދައްކަވާ ކަށް ނުޖެހެއެވެ. ދިރާގުން ހިދުމަތުގެ އަގަށް ނަގަނީ ކިލޯބައިޓަކަށް އެއްލާރިއެވެ. އެހެން އިބާރާތަކުން ނަމަ އެމްބީއަކަށް 10ރއެވެ. ވަތަނިއްޔާއިން ދެވައްތަރެއްގެ މޮޑެމް އެއް ވިއްކައެވެ. އެއް މޮޑެމް 1200ރ އަށް ލިބޭއިރު އަނެއް މޮޑެމްގެ އަގަކީ 2000ރ އެވެ. ކަނެކްޝަން ފީއެއްގެ ގޮތުގައި 500ރ ދައްކަވަން ޖެހެއެވެ. އަދި މިއާއި އެކު ދެޕެކޭޖެއް ހިމެނެއެވެ. އެއީ 2ޖީބީ އަދި 6 ޖީބީގެ ޕެކޭޖްއެވެ. 2 ޖީބީ މަހަކު 250ރ އަށެވެ. 6 ޖީބީ މަހަކު 590ރ އަށެވެ. އެމަހަކަށް ކަނޑައެޅިފައިވާ ވަރަށް ވުރެން އިތުރަށް ބޭނުން ކުރައްވާ ނަމަ އިތުރުވާ ކޮންމެ އެމްބީއަކަށް 15ލާރިއެވެ.

ދެފަރާތުންވެސް ދޫކުރަމުން ގެންދާ މިޕެކޭޖް ބޭނުންކުރާނެ ބަޔަކީ އިންޓަނެޓްގެ ހިދުމަތް ނުލިބޭ ރަށްރަށުގައިއާއި ކަނޑުމަތީގައި އުޅޭ މީހުންނެވެ. ވުމާއި އެކު އަގަށް ބަލާއިރު ރަގަޅީ ވަތަނިއްޔާ ކަމުގައި ދެއްނެވިދާނެއެވެ. އެއީ ދިރާގުން އެމްބީއަކަށް 10ރ ނަގާއިރު ވަތަނިއްޔާ އެމްބީއަކަށް ނަގަނީ 15 ލާރި ކަމުގައި ވާތީއެވެ. ވަތަނިއްޔާ ބޭނުންކުރާ ނަމަ 10ރ އަށް އެންމެ އެމްބީ އެއްގެ ބަދަލުގައި 66.67 އެމްބީ ބޭނުން ކުރެވެއެވެ. ވުމާއި އެކު ދިރާގުން ދިވެހިންނަށް އޮޅުވާލައިގެން ފަތުރަމުން މިގެންދާ “ކިލޯބައިޓަކަށް އެއްލާރި” އޭމިކިޔާ ރޯގާގެ ޝިކާރައަކަށް ނުވެ އެއާއި ދުރުވުމަށް އެންމެހާ ދިވެހިންނަށް ނަސޭހަތްތެރި ވަމެވެ.