ރަށްރަށުގެ އޮފީސްތަކަށް ޒިންމާދާރު އިސްވެރިން ފުއްމާލައިގެން މިއުޅެނީ ކީއްވެގެންކަން، މިއީ ތިޔަބޭފުޅުންގެ ހިތްތަކުގައި ނުއުފެދޭ ސުވާލެއްތޯ؟ ޒިންމާދާރު އިސްވެރިންނަކީ ދިވެހި ސިވިލް ސަރވިސްގެ ޤާނޫނުގެ ދަށުން އިސްކޮށްފައި ތިބިބައެއް ހެއްޔެވެ؟ އެހެންވީއިރު އެއީ ދިވެހި ސިވިލް ސަރވިސްގެ ޤާނޫނުގެ ކޮންމާއްދާއަކަށް ހަވާލާދީގެންތޯއެވެ؟ އެގޮތުން އަޅުގަނޑު ދިވެހި ސިވިލްސަރވިސްގެ ޤާނޫނަށް ނަޒަރުކޮށްލުމުން، އެޤާނޫނުގެ 18 ވަނަމާއްދާގެ (ފ) ގައި ބުނެފައި އޮންނަނީ: " ސަރުކާރުގެ މަސްޢޫލުވެ ޒިންމާވާ އޮފީސްތަކުގެ ޒިންމާދާރު އިސްވެރިންނާ ދިވެހި ސިވިލް ސަރވިސްގެ މުވައްޒަފުން މިޤާނޫނާއި، ކޯޑްއޮފް ކޮންޑަކްޓާ ޚިލާފަށް ޢަމަލުކުރާކަމަށް ހުށަހެޅޭ މައްސަލަތައް ތަޙްޤީޤް ކޮށް ފިޔަވަޅުއެޅުން" ޙަޤީޤަތުގައި މިމާއްދާއަކީ ދިވެހި ސިވިލް ސަރވިސްގެ މައިގަނޑު މަސްޢޫލިއްޔަތު ބަޔާންކުރާ މާއްދާއެވެ. މިމާއްދާގައި ޒިންމާދާރު އިސްވެރިޔާގެ ވާހަކަ އައިސްފައިވުމުން ދޭހަވަނީ ކޮންމެސް ތަނެއްގައި މި ބުނާ ޒިންމާދާރު އިސްވެރިޔަކު ހުންނަކަމެވެ. އަދި އެތަންތަނަކީ ކޮބައިކަންވެސް ހަމަ އެމާއްދާގައި ބުނެފައި އެބައޮތެވެ. އެއީ ސަރުކާރުގެ މަސްޢޫލުވެ ޒިންމާވާ އޮފީސްތަކުގައި ހުންނަމީހެއްގެ މަސްޢޫލިއްޔަތެކެވެ.

ދެން އުފެދޭ ސުވާލަކީ: މިބުނާ ސަރުކާރުގެ މަސްޢޫލުވެ ޒިންމާވާ އޮފީސްތަކަކީ ކޮބައިތޯއެވެ. މި އޮފީސްތަކުގެ ތެރޭގައި ރަށް ރަށުގެ ރަށުއޮފީސްތަށް ހިމެނޭތޯއެވެ؟ ކުރިޔަށް ޖެހިލަމާ ހިނގާށެވެ. އެގޮތުން ދިވެހި ސިވިލް ސަރވިސްގެ ޤާނޫނުގެ 77 ވަނަމާއްދާގެ މާނަކުރުންތަކަށް ބަލާލަމާހިންގާށެވެ. އެގޮތުން،

"ޒިންމާދާރު އިސްވެރިޔާ" މާނަޔަކީ: "ސަރުކާރުގެ މަސްޢޫލު އޮފީސްތަކުގައި މިޤާނޫނުގައިވާ ކަންކަން ހިންގުމަށްޓަކައި ކަނޑައަޅާފައިވާ ވެރިޔާއެވެ." ދެން މިބުނާ މަސްޢޫލު އޮފީސްތަކަކީ ކޮބައިކަން އެނގޭތޯއެވެ؟

"މަސްއޫލު އޮފީސް" މާނައަކީ " މިޤާނޫނުގައި މަސްއޫލު އޮފީސްކަމުގައި ބުނެފައި އެވަނީ މިޤާނޫނުގެ 61 ވަނަމާއްދާގައި ބުނެފައިވާ އޮފީސްތަކެވެ. 61 ވަނަމާއްދާގައި ބުނެފައިވާ އޮފީސްތަކަކީ : އެމާއްދާގެ،

(ހ) ރައީސުލްޖުމްހޫރިއްޔާގެ އޮފީހާއި، މިނިސްޓްރީތަކާ އެޓަރނީޖެނެރަލްގެ އޮފީސް،
ށ) އިދާރީގޮތުން ވަކިއޮފީހެއްކަމަށް ރައީސުލްޖުމްހޫރިއްޔާ ކަނޑައަޅާ އޮފީސްތައް،


މިއިން އެއްވެސް ކެޓަގަރީއަކަށް ރަށްރަށުގައި ހުންނަ ރަށުއޮފީސްތައް ވަދޭތޯ؟

މިމަޢުޟޫ އަށް ލިޔަންމިޖެހުނީ މިހާރު މި "ޒިންމާދާރު އިސްވެރިޔާ" އާއި ހެދި، ދިވެހި ސިވިލް ސަރވިސް އާއި ހޯމް މިނިސްޓްރީ އާއި ދެމެދު ހޫނުގަދަ ބަހުގެ ހަމަލާތަށް ބަދަލުކުރަމުންދާ ދަނޑިވަޅެއްގައެވެ. ސިވިލްސަރވިސް އިން ބުނަމުންދަނީ އެއީ ހޯމްމިނިސްޓްރީގެ ޕާރމަނަންޓް ސެކެޓްރީއަށް އެހީތެރިވެދިނުމުގެގޮތުން އައްޔަންކޮށްފައި ތިވޭ "ޒިންމާދާރުވެރިން" ކަމަށެވެ. ހޯމް މިނިސްޓްރީގެ ރަޢުޔަކީ މިގޮތަށް ޒިންމާދާރު ވެރިން އައްޔަން ނުކުރެވޭނެކަމަށެވެ. ޤާނޫނުގައި ބުނެފައި އޮންނަނީ "ޒިންމާދާރު އިސްވެރިންގެ ވާހަކައެވެ. މިހާރު މިމައްސަލަވަނީ ވަޒީފާއާއިބެހޭ ޓްރައިބިއުނަލް އަށް ހުށަހަލާފައެވެ. މީގައި ވަރަށް ބޮޑެތި އިޝޫސްތައް ހުރިކަން ފާހަގަކޮށްލަމެވެ. (ނުނިމޭ)