ދިވެހިރާއްޖެ ވަރަށް ސީރިއަސް ހާލަތަކަށް ވެއްޓުމުގެ ކޮޅުމަތީގައި

"އަޅުގަނޑު ބޭނުން އިސްލާމީ ޝަރީޢަތުގައި އެހެން ދީންތަކަށް އަޅުކަން ކުރުން އޮންނީ ކިހިނެތްތޯ ބަލަން." -ރައީސް ނަޝީދު (ރޭޑިއޯ ޚިތާބުގެ ތެރެއިން)-

ކޮމާ ކޯޅީގައި އެވަނީ ވަރަށް ސީރިއަސް ވާހަކަ ކޮޅެކެވެ. މުޅި ޤައުމު ދާޚިލީ ހަނގުރާމައަކަށް ބަދަލު ކޮއްލާނޭ ނުރައްކާތެރި ކަމެއްގެ ވާހަކައެވެ. މީ ރައްޔިތުން ބޭނުން ވެގެން އުޅޭ ކަމެއްނޫނެވެ.

ދިވެހިރާއްޖެ 100 ޕަސަންޓު މުސްލިމު ޤައުމަކަށްވީ ބަޔަކު ކަނޑިއެއް ބަޑިއެއް ބޭނުން ކޮއްގެނެއް ނޫނެވެ. އޭގެ ފަހުން 800 އަހަރު ފުރިއްޖެއެވެ. މިތާކު އިތުރު ދީނެއްގެ ބަޔަކު ދިރިއެއްނޫޅެއެވެ. ދިވެހިންގެ ތެރޭގައި އެހެން ޤައުމެއްގެ އަދި އެހެން ދީނެއްގެ ބަޔަކު އައިސް ދިރި އުޅެނީއެއް ނޫނެވެ. އަދި ދިވެހިންގެ ބައިގަނޑެއް އެހެން ދީނެއް ޚިޔާރު ކޮއްގެން އެހެން ދީނަކަށް އަޅުކަން ކުރުމަށް ސަރުކާރުގައި އެދިފަ ވާކަމުގެ އެއްވެސް ރެކޯޑެއް ނެތެވެ. ނަމަވެސް މިކަމާއި މިހާރު ސުވާލު އެބަ އުފެދެއެވެ. މިކަމަށް އެދޭ ދިވެހިންތަކެއް ތިބީބާވައޭ އެބަ ހިތަށް އަރައެވެ.

އެހެން ނޫންނަމަ ރައީސް ކިއްކުރަން ހޯދަން އުޅުއްވާ މައުލޫމާތެއްތޯ މީ؟ އެމަނިކުފާނުގެ ދީނީ މައުލޫމާތު މުއްސަނދި ކޮއްލުމައް ކަންނޭންގެއެވެ. ރޭޑިއޯ ޚިތާބުގައި މިސުވާލު ކުރުން މީ ހާދަ ހައިރާންވާ ކަމެކެވެ. ރަލުގެ ބިލުގެ އެއްވެސް ވާހަކައެއް ނުދައްކައެވެ. ވެގެން އުޅޭކަމެއްހެންވެސް ހިޔެއް ނުވެއެވެ.

އިސްލާމް ދީނުގެ އަސްލު މަޤުސަދަކީ ﷲ ފިޔަވާ އެހެން އެއްވެސް ކަލަކަށް އަޅުކަން ނުކުރުމެވެ. އެކަމަކު އިސްލާމީ ޝަރީޢަތުގައި އެހެން ދީންތަކުގެ މީހުން އެމީހުންގެ ދީނަށް އަޅުކަން ކުރުން މަނައެއްނުކުރެއެވެ. އަދި އެހެން ދީންތަކުގެ މީހުން އަޅުކަންކުރާ ތަންތަން ހަލާކު ކުރުމެއްވެސް ނެތެވެ. އެއީ އެކަމަކު އިސްލާމް ދީން އެތަނަކަށް އައިއިރު އެތަނެއްގައި އެހެން ދީނަކަށް އަޅުކަން ކުރާ ބަޔަކު ތިބިނަމައެވެ. މިކަން ރާއްޖޭގައި އޮތީ މިހެންތޯއެވެ.

ދެން އަޅުގަނޑުމެންގެ ރައީސް ކުރައްވަން މިއުޅެނީ ކީއްތޯއެވެ. ރާއްޖެއަށް އެކިއެކި ކަންކަމުގައި އަންނަ ބޭރު މީހުންނަށް އަޅުކަން ކުރެވޭނެ ގޮތެއް ހަދަންތޯއެވެ. ދެން މި ބުނަނީ މުސްލިމުންނަށް އެހެން ކޮންމެ ބޭރު ގައުމެއްގައިވެސް އަޅުކަން ކުރެވޭ ވާހަކައެވެ. މި މީހުންނަކަށް ނޭންގެ އިސްލާމް ދީނަކީ ކޮންމެތަނަކަށްވެސް ފިޓު ދީނެއްކަން. މި ދީނުގެ އަޅުކަން ކުރާކަށް ވަކި ތަނެއް ބޭނުމެއް ނުވެއެވެ. ވީމާ ކޮންމެ ތަނެއްގައިވެސް މުސްލިމުންގެ ވާޖިބު އަދާކުރެވޭނެއެވެ. ދެން މިއުޅޭ ބާކީ ހުރިހާ ދީނަކީ އަޅުކަން ކުރުމަށް ފައްޅިއެއް ބޭނުންވާ ދީން ތަކެކެވެ.

ގައިރު މުސްލިމް ޤައުމުތަކުގައި މުސްލިމުންނަށް އައިސް އަޅުކަން ކޮއްލަން މިސްކިތެއް އަޅާފައި ހުރީ ކޮންތާކު ތޯއެވެ. އެގޮތަށް މުސްލިމް މިސްކިތެއް ހުންނަނީ އެތަނެއްގައި މުސްލިމް އަހުލުވެރިން ތިބޭނަމައެވެ. ވީމާ މިރާއްޖޭގައި މިކުރަން މިއުޅެނީ ކޮންފަދަ ނުބައި ކަމެއްތޯއެވެ. މިޤައުމަށް އަންނަ ބިދޭސީންނަށް ވެލްކަމް ޑުރިންކުން ފެށިގެން ގޮސް އެމީހުންގެ ދީނީ ވާޖިބުތައް އަދާކުރެވޭނެ ގޮތް ހެދުމަކީ ކޮންމެހެން މުހިންމު ކަމެއްތޯއެވެ. އެވަރު އަރުވާ ނުލިއަސް ބޭރު މީހުންވެސް އަންނާނެއެވެ.

ބިދޭސީން އަންނަނީ ރާއްޖޭގައި ފައްޅިތަކުގައި އަޅުކަންކޮށް އިއުތިކާފައް ތިބޭކަށް ނޫނެވެ. މަޖާކޮށް ސަކަރާތް ޖަހާށެވެ. ކަނޑުގެ އަޑިޔާއި މަތި ބަލާށެވެ. އެމީހުންނަށް މެގަޒިންތަކާއި ވެބްސައިޓުތަކުން ދިވެހިރާއްޖެއަކީ 100 ޕަސަންޓު މުސްލިމު ގައުމެއްކަމުގައި އޮންނަނީ މާކުރިން އެނގިފައެވެ. އެމީހުންނަށް ރާއްޖެއަށް ވެދުން މަނާތަކެތި އެނގެއެވެ. އެހެންވެ އެމީހުން އަންނަނީ ބައިބުލްތައް ބަހައްޓާފައެވެ. ދެން އެހެންނޫނަސް އެވެރިންނަކީ މާބޮޑު އަޅުކަންތަކެއް އޮންނަ ބައެއްވެސްނޫނެވެ.