މީވަރަށް ގިނަ ބޭފޫޅުންނަށް ހީވާގޮތެކެވެ. ކޮންމެ މީހަކަށްވެސް އެމީހަކުވަރެއް ނުހުންނާނެއެވެ. އަޅުގަނޑުމެންނަށް މިގޮތަށް މިވިސްނެނީ، މިގޮތަށް މިޤަބޫލު ކުރެވެނީ ކީއްވެތޯ އަމިއްލަ ނަފުސާ ސުވާލުކޮށްލަބަލާށެވެ. އޭރުން މިކަމަށް ކޮންމެވެސް ޖަވާބެއް ލިބިދާނެއެވެ. އަދި މިސުވާލު މިގޮތަށް ރައްޓެއްސަކާ ކޮށްލަބަލާށެވެ. އެރަޙްމަތްތެރިޔާ ދެނީ ކޮންޖަވާބެއްތޯ ބަލާށެވެ.

މަށަށް މަވަރުގެ މީހަކު ނުހުންނާނެކަން ޤަބޫލުކުރެވޭގޮތް ފަހަރުގައި އެކިމީހުންނަށް ތަފާތު އެކިގޮތްގޮތަށް ވިސްނިދާނެއެވެ. ސަބަބަކީ އެކިމީހުންގެ ޚިޔާލާއި ފިކުރު ތަފާތުވާތީއެވެ.

މަށަށް މަވަރުގެ މީހަކު ނުހުންނާނެކަން އަޅުގަނޑުމެންނަށް ޤަބޫލުކުރެވޭ ހިސާބަކީ ކޮބައިތޯ ބަލައިލުން މުހިންމެވެ. މިގޮތުން މަށަށް މަވަރުގެ މީހެއް ނުހުންނާނެކަން ޤަބޫލުކުރެވޭ ހިސާބަކީ، ތިމާމީހާއަށް ތިމާމީހާ ފެންނަ ހިސާބޭ ބުނުމަކީ ދޮގަކަށް ނުވާނެއެވެ. ތިމާމީހާއަށް ތިމާމީހާ ފެންނަ ހިސާބު އަޅުގަނޑަށް ޤަބޫލުކުރެވޭގޮތާއި ހިސާބު ހާމަކޮށްލާނަމެވެ.

ބައެއްމީހުން އެމީހުންނަށް މާމޮޅަށް ކިޔެވުނީމާ އެކަމާއި ބޮޑާވެ، އެހެންމީހުންނަކީ ތަންދޮރު ނުދަންނަ މަރުމޯލެއްކަމަށް ހީވެއެވެ. އަނެއްބައި މީހުންނަށް ވަކިފަންނެއްގައި މާމޮޅަށް ކުރިއަށް ދެވުނީމާ އަމިއްލައަށް ފަޚުރުވެރިވެ މިފަންނުގައި މަށާވާދަކޮށްލެވޭނެ އިތުރު މީހަކު ނުހުންނާނެކަމަށް ހީކޮށް އެހެން މީހުންނަކީ ބުރާންތިން ކަމުގައި ދެކެންފަށައެވެ. ދެން ތިބި މީހުންނަށް އަތުގައި ފައިސާކޮޅެއް ހުރުމުން ގިނަފަހަރަށް ކައިރީގައި އުޅުނު އެކުވެރީންގެ މަތީން ހަނދާންނެތި އެހެންމީހެއްގެ އެހީއާއި މަދަދަށް އެދެން ޖެހޭނެ މީހެއްކަން ހަނދާންނެތި އެހެންމީހުންނަކީ އޭނާގެ ކައިރިއަށް ސަލާން ޖަހަން އަންނަން ޖެހޭނެ މީހުންކަމުގައި ދެކި ބޮޑާވެއެވެ. އަދި މީގެ އިތުރުން ބައެއް މީހުންނަށް ތިމާ އަދާކުރާ ވަޒީފާގެ ގޮތުން އެހެން މީހުންނަކީ، ތިމާއަށްވުރެ ދަށު ފަންތީގެ މީހުންކަން ޤަބޫލުކުރެވެއެވެ.

ވިސްނާލަމާތޯއެވެ. އެހެން މީހުންނަށްވުރެން މޮޅަށް ކިޔެވުނީމާ އެވެވުނީ އެދުރަކަށެވެ. އެހިސާބުން ވިސްނަންވީ ތިމާއަށް އެނގުނު ރަނގަޅު އެއްޗެއް އެހެން މީހުންނަށްވެސް ބުނެދީ އުޅުމަށެވެ. މީހަކު އެއްޗެއް އޮޅުން ފިލުވާލަން އަތުވެއްޖެނަމަ އެމީހަކަށް މަލާމާތްކޮށް ހަޖޫ ޖަހަންވީކީ ނޫނެވެ.

ވަކިފަންނެއްގައި ކުރިއަށް ދެވުނީމާ ވިސްނަންވީ، މިފަންނުގައި އިތުރު މީހުންތަކެއް އުފައްދައި މީހުން ބިނާކުރުމަށެވެ. ތިމާއަށް އެނގުނު މަސައްކަތެއް އެހެންމީހަކަށް ބުނެދިނުމަކުން ތިމާގެ މަސައްކަތަށް ގެއްލުމެއް ނުކުރާނެއެވެ. ކުރާނީ ފައިދާއެވެ. އޭރުން އެފަންނުގައި ތިމާއަށް ވާދަކުރާނެ މީހުން އުފެދި، ތަފާތު މޮޅެތި ބިނާކުރުވަނިވި ޚިޔާލުތަކުގެ ތެރޭން މޮޅެތި އެއްޗެހި އުފެއްދޭނެއެވެ. އަދި އެހެންމީހުންގެ ފަރާތުން ތިމާއަށްވެސް ނޭނގޭ ކަމެއް އެނގިދާނެއެވެ.

އަތުގައި ފައިސާހުރުމަކުން އެކުއުޅުނު ރައްޓެހީންގެ މަތިން ހަނދާން ނައްތާލަންވީކީއެއް ނޫނެވެ. ވީވަރަކުން މީހުންނަށް އެހީ ފޯރުކޮށްދޭންވީއެވެ. ދުނިޔަވީ މިސާލުތަކުންނާއި ކަންހިނގަމުން އަންނަގޮތްގޮތުން ޢިބްރަތް ޙާޞިލް ކުރަންވީއެވެ. އެހެން މީހުންގެ އެހީއާއި މަދަދަށް މާދަމާ ތިމާ އެދެން ޖެހިދާނެކަން ޤަބޫލުކުރަންވީއެވެ.

މަށަށް މަވަރުގެ މީހަކު ނުހުންނާނެކަމަށް ހީކުރާ ހީއަކީ ކުން ހީއެއްކަމަށް ދެކި، އަޅުގަނޑުމެން މަސައްކަތް ކުރަމާ ހިނގާށެވެ. ކިތަންމެ ތަންދޮރު ނުދަންނަ މީހަކުވެސް ރަނގަޅު ބިނާކުރުވަނިވި ޚިޔާލެއް ދީފާނެއެވެ. ކަންކަމުގައި އަމިއްލައަށް ތިމާމީހާ ނުފެނި، އެހެން މީހުންގެ މަޝްވަރާ އާއި ޚިޔާލު ހޯދައިގެން ކަންކަން ކުރަން ވިސްނަމާތޯއެވެ.

ލިޔުން : ސުލެއިމާން ވަޖުދީ

click to visit inguraidhoolive