އެމެރިކާގައި 1993 ވަނަ އަހަރުން ފެށިގެން 2001 ވަނަ އަހަރާއި ހަމައަށް ވެރިކަން ކުރެއްވީ ބިލް ކްލިންޓަންއެވެ. ދިވެހިރާއްޖޭގައި 1978 ވަނަ އަހަރުން ފެށިގެން 2008 ވަނަ އަހަރާއި ހިސާބަށް ޑިމޮކްރަސީއެކޭ ކިޔައިގެން ރަސްކަމެއް ހިންގެވީ މަޢުމޫން އަބްދުލް ޤައްޔޫމްއެވެ. ރޭގައި ހެދިގޮނޑު ދޮށުގައި އޮތް ދިވެހި ރައްޔިތުންގެ ޕާޓީގެ ޖަލްސާގައި، އެޕާޓީގެ ޒައީމު ވާހަކަ ދެއްކެވިއެވެ. މިވާހަކައިގައި ކްލިންޓަން އާއި އެމަނިކުފާނާއި އެއްގޮތް ގޮތް ތަކެއް ހުރި ކަހަލަ ވާހަކަ ތަކެއްވެސް ދެއްކިއެވެ.

މައުމޫން ބުނި ގޮތުގައި ކުރީގެ ރައީސް އަކަށް ވިޔަސް ޤާނޫނު އަސާސީގެ 27 ވަނަ މާއްދާގެ ދަށުން، ހިޔާލާއި ފިކުރު ފާޅު ކުރުމުގެ މިނިވަންކަން މަޢުމޫންއަށް ވެސް ލިބިގެންވެއެވެ. އާއެކެވެ. އެއީ ވަރަށް ވެސް ތެދުވާހަކައެވެ. ދިވެހިރައްޔިތަކަށް ވާތީ މަޢުމޫންގެ މައްޗައް ހިނގާނީ ހަމަ އެޤާނޫނު އަސާސީއެވެ.

މަޢުމޫން ބުނި ގޮތުގައި 2000 ވަނަ އަހަރު ވެރިކަމުން ފޭބުމަށްފަހު ބިލް ކްލިންޓަން ގޭގައި އޮތީކީނޫނެވެ. ކްލިންޓަންވެސް ވަނީ ސިޔާސީ ހަރަކާތް ތަކުގެ ތެރޭގައި އަމަލީ ގޮތުން ބައިވެރިވެ ވަޑައިގަންފައެވެ. މިސާލަކަށް 2004 ވަނަ އަހަރު ޖޯން ކެރީއަށް ކެންޕެއިން ކޮށްދެއްވިއެވެ. އަދި ކްލިންޓަންގެ އަނބިކަނބަލުން ހިލަރީގެ ކެންޕެއިންގައި ވެސް 2008 ވަނަ އަހަރު އަމަލީގޮތުން ބައިވެރިއެވެ. އަދި ހަމަ 2008 ވަނަ އަހަރު މިހާރުގެ ރައީސް ބަރަކް އޮބާމާ ހިލަރީގެ މައްޗައް ކާމިޔާބު ހޯދުމުން، އޮބާމާއާއި އަތުގުޅުވާ ލައިގެން އޮބާމާގެ ކެންޕެއިންގައި ވެސް ވަނީ ބައިވެރިވެ ވަޑައިގަންފައެވެ.

ދަންނަވަންތޯއެވެ؟ ކްލިންޓަން އަކީ އެމެރިކާގެ ރައްޔިތުންގެ އިތުރުން ދުނިޔޭގެ އެތައް ބައެއްގެ ލޯތްބާއި އިޙްތިރާމް ހޯއްދަވާފައިވާ ރައީސްއެވެ. ވެރިކަމުން ފައިބައިވަޑައިގަތީ ރައީސް ކަމުގެ ދެދައުރު ފުރިހަމަ ކުރައްވާފައެވެ. މަޢުމޫން ހެން ރައްޔިތުން ނުކުމެ ވެރިކަމުން ބޭލީކީ ނޫނެވެ. ކިޔަން ތިޔައުޅެނީ ކީކޭ ހެއްޔެވެ. 30 އަހަރު ވަންދެން ޑިކްޓޭޓަރު ކަންކޮށްފައި، ކްލިންޓަންގެ ވެރިކަމާއި އަޅާކިޔަނީ ހެއްޔެވެ. ކްލިންޓަންވެސް ވެރިކަމުގައި ހުރެ ގޯސް އަމަލެއް ހިންގިއެވެ. ނަމަވެސް ޒައީމު ހިންގިފަދަ އަމަލެއް ނޫނެވެ.

ދިވެހިންނާއި ހަނގުރާމަ ކުރަން ދިވެހިން ހިމަންދޫއަށް ފޮނުވީ ކާކު ހެއްޔެވެ؟ މަޢުމޫންއެވެ. މީހުންގެ ތުނބުޅި ޓޮމާޓޯ ސޯސް އަޅައިގެން ބޭލީ ކާކު ހެއްޔެވެ؟ މަޢުމޫންއެވެ. އިސްލާމް މުދައްރިސުންނަށް ވަކި ވާހަކަ ތަކެއް ދެއްކުން މަނާ ކުރީ ކާކު ހެއްޔެވެ؟ މަޢުމޫންއެވެ. ވެލްފެއަރ ފަންޑުން، ގާތް ތިމާގެ މީހުންނަށް ހޭދަ ކުރީ ކާކު ހެއްޔެވެ. މަޢުމޫންއެވެ؟ މިފަދަ ކިތަންމެ ވާހަކައެއްވެސް ލިޔެވިދާނެވެ.

ޒައީމުއެވެ. ޖަހާ ބޯޅަ ތިވަންނަނީ މިހާރު ބައިކޮޅަށެވެ. ކޮންމެހެން ކްލިންޓަން އާއި މަނިކުފާނު އެއްފަދަކުރަން ނޫޅޭށެވެ. އެއީ ވާނެ ކަމެއް ނޫނެވެ.