ވޭތުވެދިޔަ ހަފްތާގެ ތެރޭގައި ފިންލޭންޑް ގެ ގާނުން އަކުން އެގައުމުގެ 5.3 މިލިއަން ރައްޔިތުންނަށް 2010 ޖުލައި މަހުން ފެށިގެން ހައި ސްޕީޑް އިންޓަނެޓް ހިދުމަތް ލާޒިމް ކޮށްފި އެވެ. މިހާރުވެސް 96 އިންސައްތަ އިންޓަނެޓް ކަވަރޭޖް ލިބޭ ފިންލެންޑް ގައި އިންޓަނެޓް ނުލިބި ތިބީ ގުދުރަތީ ހުރަސްތަކުގެ ސަބަބުން އިންޓަނެޓް ހިދުމަތް ދިނުން ދަތި ސަރަހައްދުތަކުގައި އެކަނި އެވެ. މި މަޝްރޫއުގެ ފުރަތަމަ ފިޔަވަހީގައި ކޮންމެ ރައްޔިތަކަށް ސިކުންތަކު އެއް މެގަބައިޓް ގެ ބްރޯޑްބޭންޑް އިންޓަނެޓް ލިބުން ލާޒިމް ކުރެއެވެ. އެހެން ނަމަވެސް 2015 ގެ ކުރިން ހުރިހާ ގޭ ބިސީ އަކަށް އެ ސްޕީޑްގެ 100 ގުނަ (ސިކުންތަކު 100 މެގަބައިޓް ޑާޓާ ސްޕީޑް) ލިބުން މަޖްބޫރު ވެގެން ދާނެ ކަމަށް ފިންލޭންޑް ގެ މިނިސްޓްރީ އޮފް ޓްރާންސްޕޯރޓް އެންޑް ކޮމިއުނިކޭޝަން ގެ ތަރުޖަމާނަކު ހާމަ ކުރެއެވެ. ފިންލޭންޑް ސަރުކާރުން ދެކޭ ގޮތުގައި ކުރިއަރަމުން މިދާ ޒަމާނީ ދިރިއުޅުމަށް ފެނާ، ކަރަންޓް އަދި ބެންކް ހިދުމަތް މުހިންމު ވާ ފަދައިން އިންޓަނެޓް ހިދުމަތް މުހިންމު ވެގެން ދެއެވެ.

ފިންލޭންޑް ގެ އިތުރުން ހަލުވި އިންޓަނެޓް އަކީ އިންސާނީ ހައްގެއް ކަމަށް އދ އަދި ފްރާންސް އިންވެސް ދެކެއެވެ. އދ އިން އިންޓަނެޓް ހިދުމަތަކީ އިންސާނީ ހައްގެއް ކަމަށް ހެދުމަށް މަސައްކަތް ތަކެއް ކުރަން ފަށާފައިވާ އިރު ފްރާންސް ގެ ސްޕްރީމް ކޯޓް އިން މިދިޔަ ޖުލައި މަހު ވަނީ އިންޓަނެޓް ހިދުމަތަކީ އެގައުމުގެ ރައްޔިތުންނަށް ލިބިދޭން ޖެހޭ އިންސާނީ ހައްގެއްގެ ގޮތުގައި ޝަރިއްޔަތުން ނިންމާފައެވެ.

ދުނިޔޭގައި ޒަމާނާއި އެއްގޮތަށް ގާނޫންތައް އިސްލާހު ކޮށް ހިދުމަތްތައް ހަރުދަނާ ކުރަމުން ދާއިރު ދިވެހިރާއްޖޭގައި މިދެވޭ އިންޓަނެޓް ހިދުމަތް މީގެ އަހަރަތަކެއް ކުރިއާ އަޅާބަލާއިރު ތަރައްގީ އެއް ފެނިފައެއް ނުވެއެވެ. ޑައިލް އަޕް ޒަމާނުން ގޮސް ސެޓެލެއިޓް މެދުވެރިކޮށް ބްރޯޑްބޭންޑް ހިދުމަތް ދެމުން ދިޔަ ޒަމާން ނިމި، ފައިބަރ އޮޕްޓިކް ސަބްމެރިން ކޭބަލް ގެ ދައުރަށް މިހާރު މިވަނީ އެޅިފައެވެ. ހިދުމަތުގެ ސްޕީޑް އަށް ބޮޑު ބަދަލެއް ނާންނަ ކަމަށް ހިދުމަތް ބޭނުންކުރާ ގިނަ ބަޔަކު އެއްބަސް ވާނެ އެވެ. މޮޅެތި ނަން ނަމުގައި ގިނަ ޕެކޭޖް ތަކެއް އަބަދުވެސް ތައާރަފް ކުރަމުންދެއެވެ. ދާދި ފަހުން ދިރާގުން މަޝްހޫރު ކުރަންފެށި ކިލޯބައިޓް އަކަށް އެއްލާރި މިހިދުމަތުގައި ވެސް އިޝްތިހާރު ކުރުމުގައި އޮޅުވާލުންތަކެއް ހުރިކަން މުރާސިލްގައި ޝައިއު ކޮށްފައިވާ ލިޔުމުން ހެކި ދެއެވެ. ރާއްޖެ އޮންލައިން އިން ދޭ އިންޓަނެޓް ހިދުމަތުގެ މެދުވެރިއެއްގެ ރޯލް އަދާ ކުރާ ކޭބަލް ހިދުމަތްދޭ ފަރާތް ތަކާއި ދިމާލަ ރާއްޖެއޮންލައިން އިން ތުހުމަތުގެ އިގިލި ދިއްކުރާފަހަރު ތައް މަދެއް ނުނެވެ. ހިދުމަތުގެ ފެންވަރު ދަށްވެގެން ޝަކުވާ ކުރާ ފަރާތް ތަކަށް ގިނައިން ޖަވާބުދާރީ ވެފައި ވަނީ ކޭބަލް ހިދުމަތް ދޭ ފަރާތުގެ މައްސަލައެއް ކަމަށެވެ. ރައްޔިތުން ހިދުމަތް ހޯދުމަށް ހަވާލުކޮށްފައި ވަނީ ތިޔަ ދެކުންފުންޏަށެވެ. ހިދުމަތް ދިނުމަށް ބޭނުންކުރާ މީޑިއަމް އަކަށް ރައްޔިތުން ފަރުވާލެއް ނެތެވެ. ބޭނުންވަނީ ހަރުދަނާ، އިތުބާރު ކުރެވޭ ޒަމާނީ ހިދުމަތެކެވެ.

ދިވެހިންގެ 54،000 މީހުން މަޝްހޫރު ސޯޝަލް ނެޓްވޯރކިންގް ސައިޓް ފޭސްބުކް ބޭނުން ކުރުން ދޭހަވަނީ ދިވެހިން އިންޓަނެޓް އާއި ގައިގޯޅި މިންވަރެވެ. ދިވެހި ބަހުން ޝާއިއުކުރެވިފައި ހުރި ބްލޮގް ތަކާއި ވެބްސައިޓްތައް މިކުޑަ އާބާދީ އާއި ބަލާފައި މަދެއް ނޫނެވެ. ޔޫޓިއުބް އާއި ސްކައިޕް ވީޑިއޯ ޗެޓް ފަދަ ހިދުމަތުގެ ފެންވަރު އިންޓަނެޓް ގެ ދުވެއްޔަށް ބަރޯސާވާ ހިދުމަތްތައް ބޭނުންކުރާ މިންވަރު ވަކި މަދެއް ނޫންކަން ދިރާގު އަދި ރާއްޖެ އޮންލައިން ގެ ސަރވަރ ލޮގްތައް ބަލައި ލުމުން ކަށަވަރު ވާނެއެވެ. އިންޓަނެޓް ބެންކިންގް އާއި އޮންލައިން ސޮޕިންގް އަދި ނީލަން ތަކުގެ އިތުރުން މިހާރު އޮންލައިން ކޮށް ކާއެއްޗެސައް އޯޑަރު ކުރެވޭނެ ހިދުމަތް މިވަނީ ތައާރަފް ވެފައެވެ. ސަރުކާރުން ކޮންމެ ޓީޗަރަކަށް ލެޕްޓޮޕެއް މަޝްރޫއު ފެށާފައިވަނީ ޓިޗަރުންގެ ދިރާސާތަކަށް އެހީތެރިވުމަށެވެ. ދިވެހި ކިޔަވާކުދިންގެ ފެންވަރު މަތި ކުރުމުގެ ނިޔަތުގައެވެ. އެހެންނަމަވެސް މާދަމާ އޮންނަ ކްލާހަށް ބޭނުންވާ ޓީޗިންގް އެއިޑް އިންޓަނެޓް ހިދުމަތުގެ ފެންވަރު ދަށްކަމުން އެތަށް އިރަކު ނެޓް ނުލިބުމާއި ދުވެލި މަޑު ކަމުން ޑައުންލޯޑް އަށް ނަގާ ވަގުތު ގިނަ ކަމުން ކްލާހަށް ދާންވާއިރަށްވެސް ނުލިބޭނަމަ އެލެޕްޓޮޕް ތަކުގެ މާބޮޑު ބޭނުމެއް ނެތެވެ. ރާއްޖޭގެ ބޮޑު އާބާދީ އެއް ރާއްޖެ ތެރޭގައި ވާއިރު އެމީހުންނަށްވެސް މިހިދުމަތް މާލެ އެކޭ އެއްފެންވަރެއްގައި ލިބެން ޖެހެއެވެ.

ސަރުކާރާއި ކޮމިއުނި ކޭޝަން މިނިސްޓްރީ އިން މިކަމާއި މެދު ވިސްނަން ވެއްޖެ އެވެ. ކޮމިއުނިކޭޝަން އޮތޯރިޓީ އޮފް މޯލްޑިވްސް ގެ ނަމުގައި ރެގިއުލޭޓަރެއް ބެހެއްޓިނަމަވެސް ރެގިއުލޭޓް ނުކުރެވޭނަމަ ވާ ފައިދާ އެއް ނެތެވެ. ދިވެހިން މި ހިދުމަތުގެ ފެންވަރު ރަގަޅު ކޮށްދިނުމަށް އެދޭތައް އެތައް ޒަމާނެއް ވެއްޖެ އެވެ. އިންޓަނެޓް އަކީ އަސާސީ ހައްގެއް ކަމަށް ދިވެހި ގާނޫން އަކުން އެގެން ނެތަށް ގިނަ ދިވެހިންނަކަށް ފެނާއި ކަރަންޓް ފަދައިން މިއަދު އިންޓަނެޓް މިވަނީ އަސާސީ، އަދި އިންސާނި ހައްގަކަށް ވެފައެވެ. މިކަން ކަށަވަރު ވަނި ވަޒީފާ ޝަރުތުގައިވެސް ކޮމްޕިއުޓަރ އުގެނިފައިވުން މުހުންމުވެގެންދާތީ އެވެ.

މިލިޔުން ލިޔަމުން ދަނިކޮށް ދިރާގުގައި އޮންނަ ސަރުކާރުގެ 55 އިންސައްތަ ހިއްސާގެ 7 އިންސައްތަ ކޭބަލް އެންޑް ވަޔަލަސް ކުންފުންޏަށް ވިއްކާލި ހަބަރު ލިބިއްގެން ދިޔަ އެވެ. ކޭބަލް އެންޑް ވަޔަލެސް އަށް ދިރާގުގެ 52 އިންސައްތަ ހިއްސާ ލިބުމުން ދައުލަތުގެ މާލިއްޔަތަށް ފައިދާތަކެއް ލިބިދާނެ އެވެ. ނަމަވެސް ހިދުމަތަށް އިސްލާހެއް އަންނާނެ ކަމާއި މެދު ޝައްކެވެ.