އަހަރެންގެ ހިތުގެ ހަމަޖެހުން ފޭރިގަތް އަލިކަން
އަހަރެންގެ އުޅުމާއި އަޚްލާޤް ބަދަލު ކޮށްލި އަލިކަން
އަހަރެންގެ ދިރިއުޅުމަށް އުފަލާއި ބަހާރު ގެނެސްދިން އަލިކަން
މިހާރުވީ ކޮންތާކުބާ؟
ގާތުން އެހާ ގާތުން އައި އަނދިރިކަމެއް އެމައްޗަށް ވެރިވެގަތެވެ.

އަހަރެންގެ ހިތުގައި ރަނިކަން ކުރި އަލިކަން
ތަފާތު މައިދާންތަކުގަ އާއި ވާދީތަކުގައި ގުޅިލާމެހިވި އަލިކަން
ހިތްގައިމު ރީތި އައްސޭރި ފަށުގައި ފަތުރުވާލި އަލިކަން
މިހާރުވީ ކޮންތާކުބާ؟
ފަހުން ފަސްފަހަތުން އައި ކާޅެއް ޖަހައިގެންފިއެވެ.

އަހަރެންގެ ހިތުގެ ލޯގަނޑުން ސޫރަކޮށްދިން އަލިކަން
ލޮލާއި ލޯ ގުޅައިދިން އަލިކަން
ޝަބުނަމްގެ ތިކިތަކުގެ ޗާލުކަން މަލުން ދައްކައިދިން އަލިކަން
މިހާރުވީ ކޮންތާކުބާ؟
އޮއްސެމުން ދުރަށް ގޮސް އޮބާލައިފިއެވެ.

ބުނެބަލާށެވެ.! މިވާހަކަތަށް ބަޔާން ކުރާނީ ކިހިނެތް ހެއްޔެވެ؟
ލިޔެލާނީ ކޮން ޞަފްޙާ އަކު ހެއްޔެވެ؟
ކިޔައި ދޭނީ ފަހެ ކާކުގެ ގާތުގައި ހެއްޔެވެ؟
އަހަރެންގެ ޙަޔާތުގައި މިވަނީ ކަޅުފޮއެ ރެއެއް ފަދަ އެކަނިވެރިކަމެކެވެ.
އަހަރެންގެ ޙަޔާތުގައި އަނދިރި ސާލެއް ފަތުރައިފިއެވެ.
ދެން ދުވަހަކުވެސް އެ އަލިކަން ދެކޭކަށް ބޭނުމެއްނޫނެވެ.
ފިތުރަތުގެ އުޞޫލުން މި އަނދިރިކަން އަލިވިލޭނެ ނަމަ....................