މާކިތަންމެހާވެސް ރީއްޗެވެ.
ނަމަވެސް މީރު ވަހެއް ނުދުވައެވެ.
ހަވީރުވުމުން މިލާ މޯޅިވެސް ވާނެއެވެ.
އެއަށްފަހު ބަލާލާނެ މީހަކުވެސް ނުވާނެއެވެ.

ހެނދުނު ހެނދުނާ ފަރިވެ ފޮޅެއެވެ.
އަވީގައި ނުޖެހި ދުވާލު ހަތަރުދަން ނިންމާލެވޭތޯ ބަލަމެވެ.
ފިޔަތަށް މިލާފާނެތީ އެވެ.
އެއިރުން ބަލާލާނެ މީހަކުވެސް ނުވާނެތީއެވެ.

އަހަރެންނަށް ދެރަވެ ރޮވެއެވެ.
ކުލަޔާ ބައްޓަން ރީތި ނުވީމައެވެ.
ފެންނަހާ މީހަކު ކުރަނީ މަލާމާތާ ފުރައްސާރައެވެ.
ނަމަވެސް އަހަރެންނަށް މީރުވަހެއް ލިބިފައި ވެއެވެ.

އެހެނިހެން މާތަކަށްވުރެ ރީތި ނުވިކަން ނަސީބެކެވެ.
ނޫން ނަމަ މިހާރު އަހަރެންވެސް ބިނދެލައިފީހެވެ.
މިލާ މޯޅިވެދާނީ އެއްވެސް އަގެއްނެތި ފައިދަށުވެ ޗިސްޗިސް ވެގެންނެވެ.
މިޖައްވުގައި އެއިރުން އަހަރެންގެ މީރުވަހުން ހުވަނދުލާނީ ކިހިނަކުން ހެއްޔެވެ؟