އިޝާ ނަމާދުން ފައިބައިގެން ގެއަށް ދިޔައިރު އަނެއްކާވެސް އެ އަންހެން ކުއްޖާ ފެނުނެވެ. މިފަހަރު އެކުއްޖާގެ ފަހަތުން އަހަރެން ދިޔައީމެވެ. އެއީ ކޮން ގެއެއްގައި އުޅޭ ކުއްޖެއްތޯ ބެލުމުގެ މަގްސަދުގައެވެ. އެދުވަހުގެ ކުރިން އަހަރެން އެކުއްޖާ ނުދެކެމެވެ. އަހަރެން ބަލަން ހުއްޓާ އެކުއްޖާ ގޮސްވަނީ އެރަށު ހޮސްޕިޓަލުގައި އުޅޭ ބޭރު ރަށްރަށުގެ ނަރުހުންނާއި ޑޮކްޓަރުން، އުޅޭ ގެއަށެވެ. އެހެންކަމުން އެއީ އެރަށު ކުއްޖެއް ނޫންކަންވެސް ޔަގީންވިއެވެ. އިތުރަށް އެކުއްޖެއްގެ ހަގީގަތް ހޯދުމުގެ ޝައުގުވެރިކަން އުފެދުނެވެ.

ކުޑައިރުކޮޅެއް ފަހުން ގެއަށް ގޮސް އަހަރެންނާއެކު އުޅޭ ހުސެން ގޮވައިގެން އައީމެވެ. ކަންތައްތައް ކުރަން ހުސެން މާކުޅަދާނަ ވާނެތީއެވެ. އެހެންކަމުން އަހަރެން ދުރުގައި ހުރެފައި އެގޭގެ ދޮރުގައި ޓަކިދިނީ ހުސެންއެވެ. ހުޅުވީ ބޭރު ފިރިހެނެކެވެ. ޝިޔުލީން އުޅޭތޯ އެހުމުން އެމީހާ އެތެރެއަށް ވަނެވެ. ދެން އައީ ހަމަ ޝިޔުލީންއެވެ. އަހަރެންގެ ޝިޔުއެވެ. އަހަރެންނަށް ގަބޫލުކުރަންވެސް ދަތިވިއެވެ.އުފަލުންގޮސް ފެންކަޅިވިއެވެ. ކުރިއަށް ފިޔަވަޅެއް އަޅަން ނޭނގިފައި ހުރެވުނީއެވެ.

ހުސެން ފެނުމުން ނުދަންނަ ގޮތަކަށް ބަލަހައްޓައިގެން ޝިޔު ހުއްޓެވެ. ހުސެން ޝިޔުއަށް އަހަރެން ދެއްކިއެވެ.ޖަވާބުގައި ޝިޔު ސުވާލުކުރިއެވެ .ކާކުތޯ އެހިއެވެ. އަހަރެން ހުރި ދިމާ އަނދިރިކަމުން ޝިޔުއަށް އަހަރެން ރީއްޗަކަށް ނުފެނެއެވެ.އެހެންކަމުން ގެއިން ނިކުމެގެން އަހަރެންނާ ދިމާއަށް އައެވެ.

އަހަރެން ފެނުމުން އަނގަ ހުޅުވިފައި ޝިޔުއަށް ހުރެވުނެވެ. ގަބޫލު ކުރަން ދަތި ގޮތަކަށް އަހަރެންގެ މޫނުގައި އަތް ޖައްސާލިއެވެ. މަޑުމަޑުން އަހަރެންނަށް ގޮވާލިއެވެ. ޝިޔުގެ ދެލޯ ކަރުނުން ފުރުނެވެ. އެ ނަޒަރުގައި އެކުލެވިފައިވީ ހަމަ އެއަސަރެވެ. އެދުވަހުވެސް އަހަރެންނަށްޓަކައި އެހިތުގައި ވީލޯބި، އެއްވެސް އުނިކަމެއްނެތި ހާމައަށް ފެންނަން ހުއްޓެވެ. އަހަރެންނަށްވެސް ޝިޔުގެ މޫނުގައި އަތް ޖައްސާލެވުނެވެ. ޝިޔު އެއްވެސް ތަފާތެއް ނެތެވެ. ހަމަ އެހާރީއްޗެވެ. އެހާ ލޯތްބެވެ.

އަހަރެންގެ އަތުން ޝިޔުގެ ކަރުނަތައް ފުހެލީމެވެ. ބޭއިހްތިޔާރުގައި ޝިޔުގެނެސް އަހަރެންގެ މޭގައި ލައްކޮށްލެވުނެވެ. ޝިޔުގެ ދެއަތުން އަހަރެންގެ ބުރަކަށީގައި ބައްދާ ބާރުކޮށްލިއެވެ. އެއާއެކު ގިސްލަ ގިސްލާފައި ބާރަށް ރޯންފެށިއެވެ. އަހަރެން ވަރަށް އުފާވިއެވެ. އެތައް އަހަރު ދުވަހެއް ވީއިރުވެސް ޝިޔުއަށް އެއްވެސް ބަދަލެއް ނައީތީއެވެ. ޝިޔު އަހަރެންގެމަތިން ހަދާން ނުނެތުނީތިއެވެ. ކުރިއެކޭވެސް އެއްގޮތަށް އަހަރެންދެކެ ލޯބިވާތީއެވެ. އިރުކޮޅަކު މިހެން ތިބުމަށްފަހު އަހަރެންނާއި ހުސެން ދިޔައީއެވެ. އަލުން ދިމާވާނެކަމަށް ވައުދުވަމުންނެވެ.

އޭގެފަހުން ދެމީހުން ބައްދަލުވީ މިއަދުއެވެ. ދެމީހުންވެސް އެތައް ވާހަކައެއް ދެއްކީމެވެ. ޝިޔު ކިޔެވީ ސިއްޙި ދާއިރާއާއިންނެވެ. ޝިޔު މިރަށަށް އައީ 6 މަސްދުވަހުގެ ވޯރްކް އެކްސްޕީރިއެންސް އަކަށެވެ. އެންމެފަހުން އިއްތިފާގުން ދެމީހުންނަށްވެސް އެއް ފަސްގަނޑަކަށް އާދެވުނީއެވެ. އަހަރެންގެ ހިތުން ޝިޔު ފިލައިގެން ނުދިޔަ ފަދައިން ޝިޔުވެސް އެ 3 އަހަރު ހޭދަކުރީ އަހަރެންގެ ހަނދާނުގައެވެ. ކޮންމެ ދުވަހެއް ހޭދަކުރީ އަހަރެންނާއި ދިމާވާނެ ކަމުގެ އުންމީދުގައެވެ. މަންޒިލެއް ހޯދަން ކުރިދަތުރުގައި އެއް މަންޒިލަކަށް އާދެވުނީއެވެ. ޝިޔުގެ ކިބައިން މައާފަށް އެދުމަށް ފުރުސަތެއް ލިބުނީއެވެ. ދެން ދުވަހަކުވެސް ޝިޔުއާއި ދުރަށްދާން އަހަރެން ބޭނުމެއް ނޫނެވެ. ކޮންމެ ހިނދުކޮޅެއްވެސް ޝިޔުއަށްޓަކައި ހޭދަކުރުމަށް ހިތްވަރު ލިބުނެވެ. މިއަދަކީވެސް އަހަރެމެންގެ ލޯބީގެ ހަޔާތުގައި ފޮނި ހަނދާންތަކަކާއެކު ނިމިގެން ދާނެ ދުވަހެކެވެ. އޮއްސެމުންދިޔަ އިރު ހެކިކޮށް މުޅިއުމުރަށް އެކީގައި އުޅުމަށް އެކަކު އަނެކަކަށް ވައުދުތަކާއި އަހުދުތައް ކުރީމެވެ.ބޭއިހްތިޔާރުގައި ކުރެވުނު އިންތިޒާރުގެ ނިމުން ފޮނިވީއެވެ.

-ނިމުނީ-