މިއީ ޙަޤީޤީ ޙާދިޘާއެއްގެ މައްޗަށް ބިނާކޮށް ލިޔެވޭ ވާހަކައެކެވެ. މިވާހަކައިގެ ތަންތަނާއި ދެކެވިފައިވާ ވާހަކަތަކުވެ %90 ބިނާވެގެންވަނީ ޙަޤީޤީތުގެ މައްޗަށެވެ. 18 އަހަރުން ދަށުގެ ކުދިން މިވާހަކަ ކިޔުމަކީ މަނާކަމެކެވެ.


" ކާކުތަ މިރަޝީދަކީ؟" އަހަރެންގެ ސިމްފޯނަށް ލެއްވުމަށްފަހު ސާއީއަށް ގުޅުމަށްފަހު އެހީމެވެ.
" ކީއްވެތަ ތިސުވާލުތިކުރީ؟" ސާއީވެސް ކޮށްލީ ސުވާލެކެވެ.
" އޭނަ ކީއްކުރަންތަ ސާއީގެ އަނެއް ނަންބަރަށް ވަރަށް ލޯބިވޭ ކިޔާފަ މެސެޖްކުރަންވީ. ކާކުތަ އެއީ؟ އަހަންނެއްނޫންތަ އަނެއްކާ ސާއީ ރައްޓެހިވެގެން މިއުޅެނީ." އަހަރެންގެ ގާތަށް ރުޅިއައެވެ.
" އެއީ ބޭބެއެއް. އޭނަ އަހަރެމެންގެ ގޭގެ ހުރިހާ އަންހެން ކުދިންނަށް އެސް.އެމް.އެސްކުރާނީ އެގޮތަށް. އެހާ ލޯބިން. ގުޑް ނައިޓް، ގުޑް މޯނިންގ މެސެޖްވެސް ކުރާނެ. އޭނަ އަހަރެމެންދެކެ ވަރަށް ލޯބިވާނެ. އަޅާނުލާ." ސާއީ ފުރިހަމައަށް ކިޔައިދިނެވެ
" އެކަމަކު ބޭބެއިން ކޮއްކޮމެންނަށް އެސް.އެމް.އެސް ކުރާގޮތަކަށް ނޫން އެހެރީ އެސް.އެމް.އެސްކޮށްފަ! ބުނެބަލަ އަސްލު ކާކުތަ އެއީ؟" އަހަރެން އޮޅުން ފިލުވަން ބޭނުންވިއެވެ.
" އެއީ ރަޝްކޮ. މިބުނީނު އެއީ ބޭބެއެކޭ. ކީއްވެތަ ޤަބޫލުނުކުރެވެނީ. އަހަރެން ބުނީމެއްނު އެސިމް ބޭނުން ނުކުރާށޭ! ކީއްވެތަ ބޭނުންކުރީ؟" ސާއީ ހިތްހަމަ ނުޖެހުނެވެ.
" ހެޔޮ ކޮންމެ މީހަކަށްވިޔަސް! އަހަރެން ލޯބިވާ މީހަކަށް އެހެން މީހަކު ނުޖެހޭނެ ލޯބީގެ ޢިބާރާތްތަކުން އެސް.އެމް.އެސްކުރާކަށް! މަދީތަ އަހަރެން ސާއީއަށް އެސް.އެމް.އެސް ފޮނުވާވަރު؟ ދުވާލަކު ސަތޭކައަށްވުރެން ގިނައިން އެސް.އެމް.އެސް ފޮނުވިފަކަން ނޭނގެ މިހާރުވެސް ހުންނާނީ؟" އަހަރެން ވެސް ހިތްހަމަ ނުޖެހުނެވެ.
" ބޭބެ އަހަންނަށް ގުޅިއޭ. ގުޅާފަ ބުނީ އަހަރެންގެ ބޯއީ ފްރެންޑް ބޭއަދަބީ ޢިބާރަތުންއެސް.އެމް.އެސް ކުރި ވާހަކަވެސް. ޝާންވެސް ނުޖެހޭނެކަން ނޭނގެ އެގޮތަށް ކަންތައް ކުރާކަށް." ސާއީ ގާތަށް ރުޅިއައެވެ.
" އޯކޭ. ސޮރީ. އެކަމަކު އަހަރެން ބަލާނަން އެއީ ސާއީގެ ކިހާވަރެއްގެ ބޭބެއެއްތޯ؟" އަހަރެން އެހެން ބުނުމުން ސާއީ ވަގުތުން ފޯން ކަނޑާލިއެވެ.

ފޯން ބޭއްވީއިރުވެސް އަހަރެން ހުރީ ހިތްހަމަ ނުޖެހިފައެވެ. ސާއީގެ ބޭބެއެއްކަމަކުވެސް ސާއީއަށް އެޢިބާރާތުން އެސް.އެމް.އެސް ކުރާކަށް ނުޖެހޭނެއެވެ. އަހަރެންގެވެސް ބޭބެއިންނާއި ދައްތަމެން ތިބެއެވެ. އެމީހުންނެއްވެސް އަހަންނާއި އެގޮތަށް މުޢާމަލާތެއް ނުކުރެއެވެ. ކިތަންވެ ތިމާގެވެފައި ލޯބިވިޔަސް މުޢާމަލާތްކުރުމުގައި ޙުދޫދެއް އޮންނަންޖެހޭނެއެވެ. އެހެން ނޫނީ ދެން ފެނިގެން ދާނީ އެހެން މަންޒަރެކެވެ. ބައެއް ޢާއިލާތަކުގައި ދިމާވެފައިވާ ކުޑަކުދިންގެ މައްސަލަތަކަށް ބަލާލުމުން އަހަންނަށްވެސް އެވަރު އިނގެއެވެ.

އަހަރެން އެނަމްބަރަށް ބަލާލީމެވެ. ކޮން ރަޝީދެއްހެއްޔެވެ؟ ސާއީ އެބުނީ އެއީ ބޭބެއެވެ. ކޮންމެހެންވެސް އަހަރެން އެކަންތައް އިތުރަށް ސާފްކުރަން ބޭނުންވިއެވެ. އެހެންވެ، އަހަރެން އެ ނަމްބަރ އެއީ ކާކުގެ ނަންބަރެއްތޯ ބެލީމެވެ. އަހަންނަށް އިނގުނީ އެނަންބަރ ބޭނުންކުރަނީ ރަޝްވާން ކިޔާ މީހެއްކަމެކެވެ. އެއީ ހއ.އަތޮޅުގެ ކޮންމެވެސް ރަށެއްގެ ކުއްޖެކެވެ. ސާއީ އަކީ ސ.ފޭދޫ ކުއްޖެކެވެ. އެހާ ދުރުގައިވެސް ތިމާގެ މީހުން ތިބޭހެއްޔެވެ؟ ފަހަރުގައި ތިބެދާނެއެވެ. އަހަރެންގެ ހިތަށް އެރިއެވެ. އެވަރަކުން އަހަންނަކަށް ނުފުދުނެވެ. އަހަރެން އެ ނަންބަރަށް ގުޅީމެވެ.

" ދަންނަންތަ ސާއީ؟" އަހަރެން އަނހާލީމެވެ.
" ތީކާކުތަ؟" އޭނާ އަނހާލިއެވެ.
" މީ ސާއީގެ ބޯއީ ފްރެންޑް. ޝާން. އެހެންވެ އެސުވާލު މިކުރީ. ކީއްވެތަ ތިކޮޅުން ސާއީއަށް އެގޮތަށް އެސް.އެމް.އެސްކުރީ؟ ކިހިނެއްތަ ސާއީ ދަންނަނީ؟ ކޮންތާކުންތަ ދިމާވީ؟" އަހަރެން އެއްފަހަރާ ހުރިހާ ސުވާލެއް ކޮށްލީމެވެ.
" ސާއީގެ ވާހަކަ ނުދައްކާ. ޝީބްރޯކް މައި ހާރޓް." އޭނާގެ ރާގުގައިވާ މޮޅިވެރިކަން އަހަންނަށް ފާހަގަ ކުރެވުނެވެ.
" ކީއްވެ ތިހެން ތިބުނީ؟ އަނެއްކާ ސާއީއާއި ރައްޓެހިވިންތަ؟" އަހަރެން ހަމަޖެހިގެން ވާހަކަ ދެއްކޭތޯ ބެލީމެވެ.
" އަހަންނަކީ ރަޝްވާން. އަހަންނަށް ސާއީއާއި ދިމާވީ އޮންލައިނުން. ދެން އަހަރެން އޭނައާއި ބައްދަލުކުރިން. އެއީ އަހަރެންގެ ފަސްޓްލަވް. އެކަމަކު އޭނަ އަހަންނަށް ދޮގުހެދީ. ޝާންއަށްވުރެން ރަނގަޅަށް އަހަރެން އޭނާ ދަންނަން. އޭނަ ދަންނަ ވަރަށް ބައިވަރު މީހުންނާއި އަހަންނާއި ގުޅުން އޮންނާނެ. އެއީ ކަމުދާ އަންހެން ކުއްޖެއް ނޫން." ރަޝްވާން ކިޔައިދިނެވެ.
" ކޮންތާކުން އޭނައާއި ބައްދަލުކުރީ؟" އަހަރެން ޔަޤީންކުރަން ބޭނުންވިއެވެ.
" އެއްދުވަހުގެ ރޭ ހަތެއްޖަހާކާއިރު ސާއީ ގުޅާފަ ބުނީ ބައްދަލުކުރަން ބޭނުމިއްޔާ ސަލްސާ ކައިރިއަށް އަންނާނޭ. އެތަނުން ދިމާވި." ރަޝްވާން އެބުނީ ރަނގަޅަށެވެ. ސާއީ އުޅެނީ ސަލްސާއާއި ކައިރީގައި ހުންނަ ގެއެއްގައެވެ.
" އަނެއްކާ ތި ދެމީހުން ދޭތެރޭ ކަމެއް ހިނގިތަ؟" އެއީ އަހަރެން އެންމެ ސާފްކުރަން ބޭނުންވާ އެއްޗެވެ.
" ނަސީބަކުން ނުހިނގާ. އަހަންނަށްވެސް ލޯބިވެވުނީ ނޭނގި. އަހަންނާއި އޭނަ ދިމާވީ މިދިޔަ މާރޗްމަހުގެ 17 ވަނަ ދުވަހުގައި. އެކަމަކު ޙަޤީޤަތް ހާމަވުމުން އަހަރެން އޭނަ ދޫކޮށްލީ." ރަޝްވާން ކިޔައިދިނެވެ.
" ހާދަ ގޮތެއްނެތް އަންހެން ކުއްޖެކޭދޯ އެއީ. އަހަންނާއި ރައްޓެހިވެއްޖެ މާރޗް ތިނެއްގައި. ބުނި އޭގެ ފަހުން އެއްވެސް މީހަކާއި ގުޅުމެއް ނުބާއްވަމޭ. ކިހާ ސަޅިދޯ." އަހަރެން ގާތަށް ރުޅިއައެވެ.
" ދެން ބަލާ އޭނައާއި އެކީގައި އުޅެވޭތޯ. އެކަމަކު އަހަރެން މިވާހަކަތައް ދެއްކި ވާހަކަ ނުބުނާތި! ސާއީ މިހާރު އަހަންނަކާއި ވާހަކައެއް ނުދައްކާ. ވަރަށް ރުޅިއައިސްފަ ހުންނަނީ." ރަޝްވާން އެހެން ބުނުމަށްފަހު ފޯން ބޭއްވިއެވެ.
ރަޝްވާނަށް ގުޅުމަށްފަހު އަހަރެން ވަގުތުން ސާއީއަށް ގުޅީމެވެ.
" ކީއްވެތަ ދޮގު ހެދީ؟" އަހަރެން އަނހާލީމެވެ.
" ޝާން ރުޅި އަންނާނެތީ؟" ސާއީ ބުނެލިއެވެ.
" ތިހެން ކަންތައްތައް ކުރުމުން އަހަރެން މާ ރުޅި އަންނާނެއެއްނު. ސާއީ ތީ އައްޑު އަތޮޅު ކުއްޖެ. ތިބުނާ ރަޝްއަކީ ހއ.މީހެއް. އެކަމަކު ބުނި އެއީ ބޭބެއެކޭ. ކިހާ ސަޅިދޯ. އެކަހަލަ ކިތައް ބޭބެ ތިބޭތެ ސާއީގެ؟" އަހަރެން ހުރީ ވަރަށް ރުޅިއައިސްފައެވެ.
" އަހަންނަށް އިނގޭ ޝާން އަހަރެންދެކެ ލޯބިވާވަރު. އެހެންވެ ސާން ވަރަށް ދެރަވާނެތީ އެވާހަކަ ނުބުނީ. ދެން އަޅާނުލާ. އެކަހަލަ ކަމެއް ދެން ނުވާނެ." ސާއީ އަހަރެން ހަމައަކަށް އަޅުވަން މަސައްކަތްކުރިއެވެ.
" އޯކޭ. އަހަރެން ބަލާނަން. ދެން އެކަހަލަ ކަމެއް ނުކުރާތި!" އެހެން ބުނުމަށްފަހު އަހަރެން ފޯން ބޭއްވީމެވެ.

އަހަރެން ވިސްނާލީމެވެ. ސާއީ އެގޮތަށް ކަންތައް ކުރާކަށް ނުޖެހޭނެއެވެ. އަހަރެން ސާއީ އަކަށް އެއްވެސް ކަމެއް ނުފޮރުވަމެވެ. ވީއިރު، ސާއީ އަހަންނަށް އެއްވެސް ކަމެއް ފޮރުވަންޖެހޭހެއްޔެވެ؟ ލޯބީވެރިންގެ މެދުގައި ކަންތައް ސިއްރުކުރާކަށް ނުޖެހޭނެއެވެ. އެހެން ހަދަން ފަށައިފިނަމަ މަންޒަރު މާފުރިހަމައެއް ނުވާނެއެވެ. އެންމެ ފަހުން ދިމާވާނީ މުޅިން ގޯސްކޮށެވެ. އެއްވެސް މީހަކަށް މާބޮޑަށް އިތުބާރުކުރާކަށް ނުވާނެއެވެ. މިޒާމާނަކީ ތެދުވެރިން މަދު ޒަމާނެކެވެ. އަހަރެންގެ ގިނަ ރައްޓެހިންވެސް ސާއީއާއިމެދު ދެކެނީ މާރަނގަޅަކަށް ނޫނެވެ. މައްސަލައަކީ އަހަންނަށް އެއްވެސް ކަމެއް އަދި ނުފެންނަކަމެވެ. އެހެނަސް އެމީހުންވެސް ބުނަނީ ތެދެކެވެ. އަދިވެސް އަހަރެން ހަނދާން އެބަހުއްޓެވެ.

" ޝާންއާއި އެކީ ވަރަށް ފަސޭހަ ވާނެ ހަ............." ވުޑް އެޕަލް ތެރޭގައި އަހަރެން އެއްޗެއް ދައްކާލުމުން ސާއީ ބުނެލިއެވެ. ހިތަށް އެރިއެވެ. އަށާރަ އަހަރުގެ އަންހެން ކުއްޖަކު އެހެން ބުނަންޖެހޭނެ ބާވައެވެ؟ ގިނަ ފިރިހެނުންތަކަކާއިއެކު އެފަދަ ގުޅުމެއް ނުބާއްވާކަމުގައި ވާނަމަ، ސާއީ އެހެން ބުނާކަށް ނުޖެހޭނެއެވެ. އެޖުމްލައިން އަހަރެންގެ ބޮލުގައި ރިއްސާލިއެވެ. ޙަޤީޤަތުގައި ސާއީގެ ކަންތައްތައް އިތުރަށް ހޯދަން އަހަންނަށް މަޖުބޫރުވީ އެހެން ވެގެނެވެ. އެހާ މައުސޫމް ތެދުވެރި އަންހެން ކުއްޖެއްނަމަ، ސާއީގެ އަނގައިން އެޖުމްލަ ނިކުންނާކަށް ނުޖެހޭނެއެވެ.

" ޝާން. ސާއީ އެދަނީ ޕްލަސަރއެއްގައި އެހެން ފިރިހެނަކާއިއެކު. އެކަމަކު ޝާން ބުނާނެ އެއީ ނަމްބަރ ވަންއޭ." ޝިޔާން ގުޅާލާފައި ބުންޏެވެ.

ނުނިމޭ