" ޝެން..އަހަރެން ބޭނުން ވާހަކައެއް ބުނަން...އެކަމަކު ޝެން ނުރޯނެކަމަށް ޕްރޮމިސްކުރޭ....ސްޓްރޯންގް ގާރލްއެއްނު.." ރިފްވާނު ވިސްނަމުން ދިޔައީ އެ ޚަބަރު އިއްވަން ބޭނުން ކުރާނެ ލަފުޒުތަކަކާއިމެދުގައެވެ. ކޮންމެ ގޮތެއް ވިޔަސް އެއީ ޝެނާ އަށް ކެތްކުރެވޭނެފަދަ ވާހަކައަކަށް ނުވާނެއެވެ. އެކަމަކު ހިތް ހަލާކުވިޔަސް އެ ކަން އެގުމަކީ ޝެނާއަށް އޮތް ހައްގެކެވެ.


ޝެނާގެ ދޮންމޫނުގެ ކުލަ ފަޑުވެގެން ދިޔައެވެ. އޭނަ ރިފްވާނުގެ ގެ އަތުގައި ހިފެހެއްޓީ ތަދުވާހާ ބާރަށެވެ. ރިފްވާނު ދިން ޚަބަރަކުން ޝެނާ ގެ އުފާވެރި ތަބީއަތު ވަގުތުން ވިއްސިވިހާލިވެ ހިތާމައިގެ ކަޅު ހިޔަނި ބޯމަތީގައި ފަތުރާލައިފިއެވެ. ކަރުނަތައް އޮހިގަތީ އެއްވެސް ހިފެހެއްޓުމެއްނެތިއެވެ. ނަމަވެސް ލޯބިވެރިޔާ ގާތުގައި ހުރުން އެއީ އެފަދަ ވަގުތެއްގައި ޝެނާފަދަ ކުއްޖަކަށް ލިބުނު ވަރަށް ބޮޑު ހިތްވަރެކެވެ.ރިފްވާނުގެ މޭގައި ބޮޑިވެލައިގެން ހުރެ ރިފްވާނުގެ ޓީޝާޓް ޝެނާގެ ކަރުނަތަކުން ތެންމާލުމުން ޝެނާގެ ހަލާކުވެފައިވާ ހިތަށް ވަގުތީ ފިނިކަމެއް ލިބުނެވެ. ރިފްވާނުގެ އޯގާތެރި ލޯބިވެތި ލަފުޒުތައް ޝެނާގެ ހިތުގެ ޝިފާއަކަށް ވެއްޖެއެވެ.


ސަމަރގްރާސްގެ ޓެރެސް އެގެފަދައިން ތަނަވަހެވެ. ބޮޑެތި ޕޮޓްތަކުގައިވަނީ ބޯގަންވިލާ ފަދަ ގިނައިން މާއަޅާ ގަސްތައް ހައްދާފައެވެ. އިށީންނަން މަރުމަރުހިލައިގެ ބެންޗްތަކާއި ރަތްކުލައިގެ އުދޯއްޔެއް ހުރުމުން ތަނުގެ ހިތްގައިމުކަން އެތައްގުނަ އިތުރުކޮށްދެއެވެ. މިހިތްފަސޭހަ ޓެރެސްގައި އާއިލާގެ ހުރިހާ މެމްބަރުން ރޭގަޑު ކެއުމަށް ގޮޑިތައް އަތުރާލައިގެން ތިބިއިރު ވަށައިގެން ފެންނަން އޮތީ ގާޑަންލައިޓްގެ އަލިން ފެންވެރިފައިވާ ބަގީޗާއެވެ. ހިތްގައިމު ވިއުއެކެވެ. ދޭތެރެއަކުން ޖެހިލާ ފިނިވައިރޯޅިތައް ލުއިލުއިކޮށް މަލުގެ މީރުވަސް ފަތުރަމުން ދިޔައެވެ.


މިރޭ ފަސީހާގެ ދައުވަތަށް އޭނަގެ ހުރިހާ ކުދިން ރޭގަޑުގެ ކެއުމަށް ގެއަށް އައެވެ.އަފްޒަލް އާއި ޖިނާނު އަދި ކަމްލާ ފިޔަވާ ފަސީހާގެ އާއިލާ އެކީގައި މިކެއުމުގައި ބައިވެރިވިއެވެ.ކަމްލާ ބަންދުވެފައިވާ ދޫންޏެއްފަދައިން ކޮޓަރީގެ ހަތަރުފާރުން އެތެރޭގައި އަމިއްލައަށް ހައްޔަރުވެގެން އިދެ އިންތިޒާރުކުރަނީ ކޮންކަމަކަށް ކަމެއްވެސް ނޭގެއެވެ.އަފްޒަލު އާއި ޖިނާން ވީ ޔޫކޭގައެވެ. ވިޝާމް އެތެރެއިން ކޮންމެފަދަ ހިތްހަމަނުޖެހުމަކާއި ހަގުރާމަކުރިނަމަވެސް އޭނަގެ ލާނެތްވާހަކަތަކުން އެންމެން ހެއްވަމުން ދިޔައެވެ. ފައިޒާން ހިތާމަތައް ފޮރުވަން ކުޅަދާނައެވެ.ހިނިތުންވެލާފައި އިންއިރު އެހިތުގައިވާ ކެކުޅުން މީހަކަށް ރޭކާނުލާނެއެވެ.


އެނާ އެންމެ ލޮލުގައި އަޅައިގަތީ ޖުއާނާއެވެ. ޖުއާނާގެ ރީތިކަމާއި ފަރިކަން އަދި ހެދުން އަޅާގޮތް ރީތިކަމުން އެނާ ގެހިތް އަބަދު ތައުރީފުކުރެއެވެ. އަނެއްކާ ޖުއާނާ ލޮލުގެ މޭކަޕަށް އެހާ ޚާއްސަކަމެއް ދެނީ ލޯ ރީތިކަމުންކަން ނޭގެއެވެ. ހެދުމާއި ގުޅޭގޮތުން އެމެރަލްޑް ޖަވާހިރު ޔާގޫތު އަލިމަސް ފީރޯޒް ޕާރލްފަދަ ކުލަކުލައިގެ ގަހަނާ ސެޓްތަކުން ފަޅު ފިލުވާލާ ދޮން ކަދުރާ އާއި އަތްފައި އަދި އިގިލިތަކުގެ ސަބަބުންވެސް ކަތިލާނީ ކިތައް ފިރިހެނުންގެ ހިތްތައްކަމެއްވެސް ނޭގެއެވެ.


ތަށިތަކުގެ މަތިތައް ހިއްލަން ފެށުމުން ކުޅުދިޔާވާފަދަ މީރުވަހުން މާތަކުގެ ވަސް ފަޑުކޮށްލައިފިއެވެ.އެންމެން ކާން ފެށިއެވެ. އެކިވާހަކަތައް ދެކެވެމުން ދިޔައިރު ޒާވާއިނީ ތަންކޮޅެއް ހިމޭނުން އަމިއްލަ ދުނިޔެއަކަށް ގެއްލިފައިކަން ނޭގެއެވެ.އެހެންމީހުންގެ ސުވާލުތަކަށް ޖަވާބު ދިނުން ފިޔަވާ އެވާހަކަތަކާއި މާ ގަޔާވާހެނެއް ހިޔެއްނުވެއެވެ. ކުއްލިއަކަށް ޒާވާ ބަނޑުގައި އަތްއަޅައިގެން ތެދުވުނުއިރު ނިތްކުރީގައި ކުދި ކުދިދާތިކިތައް ވިދަމުން ދިޔަ ގޮތުން ކޮންމެވެސް ވޭނެއްގައި އުޅޭކަން އެގުނެވެ.


"ދަރިފުޅާ......ކިހިނެއްވީތަ؟ " ފަސީހާ އަވަހަށް ތެދުވާންހަދައިގެން ކުޑަކޮށް ކައްސާލިވަގުތު ކިޔާން ހުޝިޔާރުކަމާއި އެކީގައި އޭނަގެ މަންމަ ވެއްޓުނަނުދީ ސަލާމަތްކުރިއެވެ. ދަރިފުޅު ކުޑަ ވޭނެއްގައި އުޅޭތަން ދެކެންވެސް މަޔެއްގެ ހިތަކަށް ކެތެއްނުވާނެއެވެ. ފަސީހާ ހިތާހިތުން ޒާވާއަށް ދުއާކުރަމުން ދިޔައިރު ލޯވަނީ ފެންކަޅިވެފައެވެ.


" ޒޭވް؟" ފައިޒާން ފިރިޔެއް އަދި ޑޮކްޓަރެއްގެ ވާޖިބު އަދާކުރުމުގެ ގޮތުން ވަގުތުން ކެއުން ހުއްޓާލާފައި ތެދުވެ ޒާވާ ގަޔާއި ލައްކޮށްލަމުން ސުވާލުގެ ނަޒަރަކުން ބަލާލައިފިއެވެ. ޖުއާނާގެ ލޯބިވާ ފަހަރިކޮއްކޮގެ ހާލު ފެނުމުން ޖުއާނާވެސް ތެދުވެ ޒާވާގެ އަތުގައި ހިފާލީ ކަންބޮޑުވެފައިވާގޮތަކަށެވެ. އެ އަތްތިލަ ހީވަނީ ފެންކޮޅެއްހެންނެވެ.

" ބަނޑުގައި ރިއްސަނީ..." ޒާވާހުރީ ބިރުގެންފައެވެ. ރޮވޭގޮތްވެފައެވެ.

" ރިލެކްސް ޒޭވް...."ފައިޒާން އޯގާތެރިކަމާއިއެކު ބުންޏެވެ.


" އޯނޯ....އަނެއްކާ ކަންމީއަށް ވީގޮތަށް އެކްޓޮޕިކް ޕްރެގްނެންސީއެއްތަ؟ ސްކެއަރީ........ކިތަންމެ ކަމެއް ޕްރެގްނެންސީގައި ގޯސްވެދާނެ...... އެނީ އަކަށް ނުކެރޭނެ ދުވަހަކު ޕްރެގްވާކަށް.... ވީ ވިލް އެޑޮޕްޓް އެ ކިޑް ދޯ އަޔާ......." އެނާގެ ބޮޑު ލޯ އެއަށްވުރެ ބޮޑުކޮށްލަމުން އަނގަ ހަދާލާފައި އެހެން ބުނިގޮތުން ޒާވާއަށް އަދިވެސް ބާރަށް ފައިޒާންގެ އަތުގައި ހިފާލެވުނެވެ.


"ނޫން ނޫން.....އެނީ ތިކަހަލަވާހަކަ ނުދައްކަބަލަ........ބިރުގަނެއޭ......އަހަރެން މަރުވިޔަސްހެވޭ އެކަމަކު ބޭބީ.............." ޒާވާގެ ނަޒަރު އެނާއަށް ހުއްޓުނުއިރު ހިތް ތެޅޭވަރުން ހީވަނީ ރޯމަހެއް ފެނުން ނެގީމަ ތެޅޭހެންނެވެ.އަޔާޝް ހިތްހަމަނުޖެހިފައިވާ ނަޒަރަކުން އެނާއަށް ބަލާލުމުން އެނާގެ މޫނުރަތްވެގެން ދިޔައެވެ. އެންމެންގެ ތެރޭގައި މޫނުމަތީގައި ޖެހިޔަސް މިވަރުގެ ލަދެއް ގަންނާނެކަމެއް ނޭގެއެވެ.އެކަމަކު މައްސަލައަކީ ކޮބާހެއްޔެވެ؟ ހިތުގައިވާ އެއްޗެއް ސިއްރުކުރުމުގެ ބަދަލުގައި އާއިލާއާއި ހިއްސާކުރުމަކީ ކުށެއްކަމަށް އެނާ ނުދެކެއެވެ.


" އެހާ ބޮޑުކަމެއް ނުވެއޭ ސްވީޓްހާރޓް.........ޕްރެގްނެންސީގައި އެގޮތަށް ޕެއިން ހުރެދާނެ...ނޯ ބިގް ޑީލް..........." ކިޔާން ޒާވާގެ ބޮލުގައި ފިރުމާލަމުން ހިތްވަރުދިނެވެ. ޒާވާ ހުރީ ކެތްތެރިވެލައިގެން ކަރުނަތައް ދިރުވާލައިގެންނެވެ. ފައިޒާން ޒާވާ ގަޔަށް ލައްކޮށްލައިގެން ހުރެ ޓެރެސް ގެ ސިޑިން ތިރިއަށް ފޭބިއެވެ.


ޒާވާ އާއި އެކީގައި ފަސީހާ އާއި ޖުއާނާވެސް ހޮސްޕިޓަލަށް ދާން ނުކުތެވެ. ކާރު ދުއްވަން އިނީ ފައިޒާންއެވެ. ޒާވާ އިނީ ނުރޯން ތުންފަތުގައި ބާރަށްދަތްއަޅާލައިގެންނެވެ. ކެތްކުރެވޭނެ އެންމެ މައްޗަށް ކެތްކޮށްލައިގެންނެވެ. އިރުކޮޅަކު ދުއްވާލުމަށްފަހު ހޮސްޕިޓަލާއި ހަމަޔަށް ދެވުމުން ފައިޒާން ޒާވާ ގޮވައިގެން ވަގުތުން އަންހެނުންގެ ޚާއްސަ ޑޮކްޓަރގެ ރޫމަށް ވަނެވެ. ޑޮކްޓަރ ސުދާ ސްކޭން ހަދަން ހަވާލުކުރީ ފައިޒާން އާއިއެވެ. ފައިޒާންކުޑަކޮށް ހިތް އަވަސްވެފައިވާތީ އާއި ނުތަނަވަސްކަމުގެ ސަބަބުން ކޮޅަށް ހުރުން އުދަގޫވެގެން އޭނަވެސް އިށީނީ ޒާވާއޮތް އެނދުގެ މަގަތުގައެވެ. ޒާވާގެ ތުނި ބަނޑުގައި ޖެލްކޮޅެއް އުގުޅާލުމުން ފިނިވިވަރުން ޒާވާ ތުރުތުރުއަޅާގޮތްވިއެވެ. ޕްރޯބްޖައްސާލުމުން ވެސް ގަތީ ބިރެވެ.


" ބޭބީއަށް ހާރޓް ނުވާނެތަ؟ " ޒާވާ ފައިޒާންގެ އަތުގައި ހިފަހައްޓާލަމުން ޅަގޮތަކަށް ބުނެލިއެވެ. އެ ބޮޑު ލޮލުން އެވަގުތު ފެނުނު މައުސޫމްކަމާއި ބިރާއި ސިހުން ފައިޒާން ގެ ހިތަށް ފުން އަސަރުތަކެއްކުރުވިއެވެ.ސިކުންތުކޮޅަކަށް ދެ ޒުވާނުންގެ ހަތަރުކަޅިހަމަވިއިރު ނޭގޭފަދަ އިހުސާސްއަކާއި ގާތްކަމެއް އުފެދުނެވެ. ނަމަވެސް ސިކުންތުކޮޅަކަށެވެ.ފައިޒާން އަށް ވުރެ ކުރިން ޑޮކްޓަރ ސުދާ ޒާވާގެ ސުވާލަށް ޖަވާބުދިނެވެ. އެތައް ކުދިން ސްކޭންކުރަން ދެކޮޅުހަދަނީ ރޭޑިއޭޝަންގެ ބިރު އޮވެގެންކަމަށާއި މިއީ ސައުންޑްވޭވްސްކަމަށާއި އެއްވެސް ގެއްލުމެއްނުވާނެކަމުގެ ޔަގީންކަން ސުދާ ދިނެވެ. އެކްސްރޭފަދަ ދަރިފުޅަށް ގެއްލުންވާފަދަ ކަމެއް ޑޮކްޓަރުން ނުކުރާނެކަމަށް ސުދާ ބުނެލިއެވެ.


" ބޭބީގެ އެންމެ ފުރަތަމަ ފޮޓޯ....ޑޮކްޓަރ ފައިޒާން...ޕްރިންޓެއް ނަންގަވާތި......." ޑޮކްޓަރ ސުދާ ސަމާސާ ރާގެއްގައި ބުންޏެވެ.ޒާވާގެ ތުންފަތަށް ހިނިތުންވުމެއްވެރިވެގެން ދިޔައެވެ. ހިތާމަވެރި މޮޅިވެރި ހިނިތުންވުމެކެވެ. ނަމަވެސް ޑޮކްޓަރ ބުނިފަދައިން އޭނަ ކޮންމެހެންވެސް މި ފޮޓޯ ޚަޒާނާކޮށްލަން ބޭނުމެވެ. ސްކޭން މެޝިނުން ފެންނަލެއް ކިތަންމެ ސާފުވިޔަސް އަދި ދަރިފުޅު މާ ތުއްތުއެވެ.ޒާވާގެ ހިތް ލޯބިން ބަންޑުންވިއެވެ.ހިތް އުތުރިއަރައިގަތެވެ.އެއާއިއެކު އޭނަ ފައިޒާންގެ މޫނަށް ބަލާލީ ދަރިފުޅު ރަގަޅުކަމުގެ ޔަގީންކަމެއް ލިބުމުގެ އުއްމީދުގައެވެ.


" ޑޮކްޓަރ ފައިޒާން....ކަންބޮޑުވެލައްވާފައި ތިއިންނެވީ ކާރޑިއެކް އެކްޓިވިޓީ ނެތީމަ ތޯ......" ޑޮކްޓަރ ސުދާ އެހެންބުނުމާއިއެކު ޒާވާގެ ހިތުގައި ބިރުވެރިކަމުގެ ރާޅުތައް ދުއްވައިގަތްވަރުން އޭނަގެ ހިތާއި ސިކުނޑީގެ މަސައްކަތްވެސް ހުއްޓާލަފާނެހެން ހީވިއެވެ.ނައިޓްމެއަރއެއް ފެނިފައި ސިހިގެން ހަޅޭއްލަވައިގަންނަފަދަ ގޮތަކަށް ތޫނުކޮށް ހަޅޭއްލަވައިގަނެވުމާއިއެކު ޒާވާ އެނދުން ތެދުވެއްޖެއެވެ. ބޭއިޚުތިޔާރުގައި ފައިޒާންގެ ޓީޝާޓްގައި ހިފާ ދަމައިގަނެވިއްޖެއެވެ.އެ ކުއްޖާފުޅުގެ ހާލު ފެނުމުން ފައިޒާން އިންތިހާއަށް ހަމްދަރުދީވެ ސަހަރޯވެރިވިއެވެ.ޒާވާ ގެ މޮޔަކަން އަނެއްކާ އިއާދަވަނީބާވައެވެ.


"ޒެން..... ކީއްވެ ބޭބީގެ ހިތް މަސައްކަތްނުކުރަނީ......ބުނެބަލަ.....ޕްލީޒް......ޒެން ތިއުޅެނީ ސިއްރުކުރަން ދޯ..... " ޒާވާ ގެ ތުންފަތް ތުރުތުރުއަޅަމުން ދިޔައެވެ.އެ ބޯ އެސްފިޔަތަކަށް އޮބިނޯވެގެން ކަރުނަތައް ކޯތާފަތްމައްޗަށް ފައިބައިގަތެވެ.


ޑޮކްޓަރ ސުދާ ޒާވާ ކަންބޮޑުވެފައި ހުއްޓާ އެފަދަތާކުންތާކު ނުޖެހޭ ބޭކާރު ސުވާލެއްކޮށްލައިގެން ޒާވާ ރޮއްވާލީތީ ފައިޒާން ގެ ހިތުގައި ރުޅިވެރިކަން އިންތިހާއަށް ގަދަވިނަމަވެސް އޭނަ ކެތްތެރިވެލިއެވެ. ގައިނޮކޮލޮޖިސްޓަކަށް ނުވިޔަސް އޭނައަށް މި ފީލްޑްއިންވެސް ސުދާއަށްވުރެ ތަޖުރިބާމަދެއް ނުވާނެއެވެ.އިއްޔެ ކިޔަވައިގެން އައި ޅަކުއްޖަކު މާ އެދުރުވެގެން އޭނައަށް ކިޔަވާދޭން ހަދައިގެން ޒާވާ ބިރުން ފިތްކަޑާލައިފިއެވެ. ފައިޒާން ގެ ކަންނެތް އިންޒާރުގެ ނަޒަރު ސުދާގެ މޫނަށް އިރުކޮޅަކު ހުއްޓުމުން ސުދާ ރީއްޗަށް ރަކިވިއެވެ. ކުރެވުނު ކުށް އިހުސާސްކުރެވި ރެވިތެޔޮ އަޅާފައިވާހެން ތަޅުވަމުން ދިޔަ އަނގަ މައިތިރިވެއްޖެއެވެ.އެއާއިއެކު އެ ފެހި ލޮލުގެ ދަގަތްފާނުގެ ބާރުގައި ޖެހުނުވަރުން މުޅި ހަށިގަޑުގައި ހީބިހިހަލުވާލާ ފިނިކޮށްލައިފިއެވެ. ދެއަތް ދެއަތާ އުގުޅަން އިންއިރު ސުދާ ވިސްނަމުން ދިޔައީ ޒާވާގެ ނަސީބާއި މެދުގައެވެ.



" ޒޭވް....ހަމަޖެހިބަލަ........ދެ ހަފްތާއިން ސްކޭން ރިޕީޓްކޮށްލާއިރު ހުރިހާކަމެއް ރަގަޅުވާނެ އިރާދަކުރެވިއްޔާ.....ކާރޑިއެކް އެކްޓިވިޓީ ފެންނާނެ އިންޝާﷲ........" ފައިޒާން ޒާވާ ގެ ގަޑުފެންކޮޅެއްހާ ފިނިއަތަށް ފިތާލަމުން ޒާވާއާއި ހަތަރުކަޅިހަމަކޮށްލުމުން ފައިޒާންގެ ހިތަށް ތަދުވިއެވެ. " ކުށްވެރި" ކަމުގެ އެ ކަށި ހިތަށް ހެރި ނޭގޭ އުދަގޫތަކެއްވުމުން އަނެއްކާ ނަޒަރު ހުއްޓާލީ ސްކޭން މެޝިންގެ ސްކްރީނަށެވެ. ކިޔާންމެން ގުޅާވަރުން ފައިޒާން ފޯނު ނަގާފައި ވާހަކަދެއްކިއިރުވެސް ސުދާގެ ވާހަކަތަކަށްވެސް ފައިޒާން ސަމާލުކަން ދިނެވެ.


" އެވްރީތިން އިޒް ފައިން......ހަތްވަނަ ހަފްތާގައި ކާރޑިއެކް އެކްޓިވިޓީ ނުފެނުނިއްޔާ މައްސަލައަކަށް ބެލެވޭނީ.......ރިލެކްސް ޑިއަރ ގާރލް.......ފަރސްޓް ޕެރްގްނެންސީ ވީމަ ތަންކޮޅެއް ނާރވަސް ވުން އެއީ ތަބީއީކަމެއް......ވައި ޔޫ ޝުޑް ބީ އަޕްސެޓް....ބްރިލިއެންޓް ޑޮކްޓަރެއްގެ ވައިފް އަކަށް ވުމަކީ ބޮޑު އެޑްވާންޓޭޖެއް.......މިކާ ސްމާޓް ކެއަރިން ހަޒްބެންޑެއް ހުރީމަ އެއްވެސްކަމަކާ ވިސްނާނެކަމެއް ނެތް.....ހީ ވިލް ޓޭކް ކެއަރ އޮފް ޔޫ އެންޑް ބޭބީ ޑިއަރ................" ޑޮކްޓަރ ސުދާ ފައިޒާންގެ ހިތްހަމަޖެހޭފަދަ ގޮތަކަށް ވާހަކަ ދައްކަން އަނގަ ހުޅުވިނަމަވެސް އެއީ ސުދާއަށް ހެދުނު އަނެއް ގޯހެވެ. މިފަދަ ވަގުތެއްގައި ހަމްދަރުދީ ލިބުމުން ޒާވާ ގެ ލޮލުގައި ތާޒާ ކަރުނަތައް ގިނަވެގަތެވެ.ޒާވާ ޓިޝޫއަކުން ކަރުނަ ފޮހެލަ ފޮހެލާ އިންއިރު ފައިޒާން ސްކޭން ޕްރިންޓްކޮޅަށް ބަލަހައްޓައިގެން ހުރީ ފަރުވާތެރިކަމާއިއެކުގައެވެ. އޭނަގެ ހިތްވެސް ޖަޒުބާތުން ފޯވަމުން ދިޔައެވެ. އޭނަ ބައްޕައަކަށް ވަނީއެވެ. އެ ހަގީގަތް ފުރަތަމަ ފަހަރަށް ފައިޒާންގެ ސިކުނޑިއަށް އުފާވެރި އިހުސާސްތަކެއް ގެނެސްދިނެވެ.




ޒާވާ ކޮޓަރިން ނުކުތުމުން ފަސީހާ އާއި ޖުއާނާގެ ސުވާލުތައް ކުރިމަތިވިއެވެ. ރޮވިފައި ހުރި ޒާވާއަށް ޖަވާބު ދޭން ދަތިވުމުން ފައިޒާން ފަސީހާމެންގާތު ސްކޭން ޚަބަރުކިޔާދިނެވެ. ޕްރިންޓްކޮޅު ފެނުމުން ފަސީހާއަށް ހަމަޖެހުމުގެ ނޭވާލެވުނެވެ. ހުރިހާ ދަތްތައް ފެންނަވަރަށް ހެވުނެވެ. ޖުއާނާ ޒާވާ ގަޔަށް ލައްކޮށްލަމުން ހިތްހަމަޖައްސާދޭން ވާހަކަދެއްކިއެވެ. ޒާވާ ކަރުނަތައް ފޮހެލާފައި ހިނިތުންވެލި ނަމަވެސް ހިތަށް ބަޔާންނުކުރެވޭފަދަ ދަތިކަމަކާއި ވޭނެއް ލިބެމުން އެބަދެއެވެ. އެ ކަރުނަ މުޅި ދުނިޔެއަށް ސިއްރުކުރަން އޭނަ އެބަޖެހެއެވެ.ދެވަނަ ފަހަރަށް މުޅި ޚާންދާނަށް ބޭޒާރުވާކަށް އޭނަ ބޭނުމެއްނޫނެވެ. އޭނަފަދަ ބަދުނަސީބުކުއްޖަކު މިއޮތް ބޮޑު އުޑުގެ ހިޔާދަށުގައިވާކަމެއް ނޭގެއެވެ. ލޯތްބަށް އެދި ސަލާމްޖަހައިގެންވެސް ލޯބި ހާސިލެއްނުކުރެވުނެވެ.ފައިޒާން އޭނަދެކެ ލޯބިވިނަމައެވެ.


ޒާވާގެއަށް އައިފަހުން އުޅެނީ އަމިއްލަ ނަފުސާއިމެދު ދުވަހަކު ނުވާހާ ފަރުވާތެރިވެގެންނެވެ. ސިޑިން އަރަނީ ލަސް ފިޔަވަޅުތަކެއްގައެވެ. ތިރި ފައިވާނުގައި އޮމާން މާބްލް ތަޅުން މަތީގައި އުޅޭއިރު ކައްސާނުލައި އުޅެން މަސައްކަތްކުރެއެވެ. ކާރަކަށް އެރިޔަސް މަޑުން ދުއްވަން އެދެއެވެ.

ޒާވާ މޭނުބައިކޮށްފައި ހުންނާތީ އަދި ރަގަޅުއެއްޗެއް ނުކެވެއެވެ. ވަރުބަލިކަން އިތުރުވާންފެށުމުން ޒާވާ ކަންބޮޑުވިނަމަވެސް ދަރިފުޅަށްޓަކައި ހިތާމަ ނުކުރަން އަޒުމްކަޑައެޅިއެވެ. ފައިޒާން އެހާ އަޅާލާ ލޯބިވެތި ފިރިޔަކަށް ނުވިޔަސް ފައިޒާންއަކީ އޭނަގެ މީހެކެވެ. އެކަމާ ޖެހޭނީ ޝުކުރުވެރިވާށެވެ. ވީއިރު މިދުވަސްކޮޅު ހިތާމަކޮށް ދަރިފުޅަށް މައްސަލަ ޖެހިޔަދީގެން ނުވާނެތާއެވެ. ބައެއްފަހަރު ވަރުބަލިވެގެން އެނދުން ތެދުވާނެވަރެއްވެސް ނުހުރެއެވެ. އަލީޒާމެންފަދަ ކުދިން ކިޔާދޭގޮތުން ވިއްޔާ މާބަނޑު ވުމުން ދަތްއުގުޅާނެވަރެއްވެސް ނުހުރެއެވެ.ދަތްއުގުޅުވާ ފެންވަރުވާދޭންޖެހެނީވެސް ފިރިމީހާއެވެ.އެކަމަކު އުފާވަނީ ފިރިމީހާގެ ފަރާތުން ވަކިން ޚާއްސަ އަޅާލުމާއ ލޯބި ލިބޭކަމެވެ.ނަމަވެސް ޒާވާގެ ނަސީބުގައި އެފަދަ ލޯބިވާ ފިރިޔަކު ލައްވާފައި ނެތުމުން އެފަދަ ދުވަހެއް އަޔަސް ފައިޒާންގެ އަޅާލުން ނުލިބޭނެކަން ޒާވާއަށް އިރުފަދައިން ޔަގީންވެއެވެ.އޭނަ އުޅޭނެ ހާލު ހިތަށް އަރާފައި ކަރުނަ ހިލެއެވެ. އެކަމަކު ޒާވާ ހިތްވަރުކުރާނެއެވެ. ދަރިފުޅު ވިހަންދެން ކެތްކުރާނެއެވެ.



އީފާ އަންގާވެސް ނުލައި ސަމަރވިލްއަށް އައުމުން ކަމްލާއަށް ލިބުނީ ޝޮކެކެވެ. އީފާ ހުރީ އިސްތަށިގަޑު ބުޅިކޮށްލާ ބްލޯންޑް ކޮށްލާފައެވެ. ހަލާކުވެފައިވާ ލޯ ފޮރުވަން އަވިއައިނެއް ޖަހާލާފައި ހުރިއިރު މޫނުމަތީގައި މާބޮޑު އައިބެއްނެތެވެ.ޕްލާސްޓިކް ސާރޖަނުންގެ މޮޅުކަމުން މޫނު މަރާމާތުކޮށްލާފައިވާލެއް ކިތަންމެހާވެސް ފުރިހަމައެވެ.ނަމަވެސް މޫނުގައި ކުރިން ހުރި އޮމާންކަމެއް ނެތެވެ.ނަމަވެސް ބޮޑު ބެލްޓްއެޅި ހެދުމަކާއި އެކު ރަތްކުލައިގެ ޖެކެޓްކޮޅެއްލާފައި ހުރުމުން ޔޫރަޕްކުއްޖަކަށް ވާން ކުރާ މަސައްކަތް ކާމިޔާބުކަމަށް ފެނެއެވެ.

އީފާ ގެ ހަރަކާތްހުރިގޮތުން ކަމްލާ ހުރީ ނުތަނަވަސްވެފައެވެ. މިގޭ ޅީދަރިއަކަށް ވިޔަސް އޭނައަކީ މިގޭ އަކީ ބީރައްޓެހި ތަނެއްކަން އިހުސާސްކުރެވޭއިރު އެކުވެރިން ގެނައުމަކީ މާ ރީތިކަމެއްނޫނެވެ.ދެން ލިބޭނެ ބަދުނާމަކާއި ކިޔާނެ އެއްޗިއްސެއް އެގެނީކީ ނޫނެވެ.ޒާވާވެސް އެކުވެރިން ގެއަށް ގެންނަކަމެއް ނޭގެއެވެ.ނަމަވެސް އީފާގެ ގާތުގައި ޒާތީ ސިއްރެއް ހިއްސާކުރަން ބޭނުމެއް ނުވެއެވެ.
ކަމްލާ އީފާއާއި ވާހަކަދައްކަން އިނީ ބޮޑުކޮޓަރީގެ ސޯފާއެއްގައެވެ. އެވަރުންވެސް އީފާ ގެ މިޒާޖުގެ ސަބަބުން އެގެއިން އަވަހަށް ދާކަށް ނޫޅުނެވެ. އެގޭ މީހުން ދައުވަތު ނުދެނީސް ހަވީރު ސައިގައި އަމިއްލައަށް ބައިވެރިވިއެވެ.އީފާ އުޅުނުގޮތުން ހުރިހާ ލަދެއްގަތީ ކަމްލާއެވެ.
އެންމެ ފަހުން އީފާ ގެއަށްދާން ނުކުތީ އިރުއޮއްސި އަނދިރިވިފަހުންނެވެ. ކަމްލާ އީފާއާއި އެކީގައި ދޮރާށިދޮށާއި ހަމަޔަށް ގޮސްލާފައި އެބުރި އައިސް ފެންޑާގެ ތަބަކަށް ލެގިލައިގެން ބޭރަށް ބަލަހައްޓައިގެން ޚިޔާލުތަކެއްގައި ހުއްޓާ ފަސީހާ ގޮވާލުމުން އެބުރިބަލާލިއިރު ލޮލުގައިވަނީ ސިހުމެވެ.


" ކަމްލާ...މި ރެކްގައި އޮތް ބްލެކް ޕާރލް ހާރު ނުދެކެންތަ؟ " ފަސީހާ ޔަގީންކުރީ އެއީ ކަމްލާ ނުވަތަ އީފާގެ ކަމެއްކަމަށެވެ.
ކަމްލާ ރީތިކޮށް އެ ހާރުމަތިން ހަދާން އެބަހުއްޓެވެ. އީފާ އެ ހާރު ރީތިވެގެން ތައުރީފުކުރިއެވެ. އަސްލު ކަޅުކުލައިގެ ރަންމުތް ހާދަ އަގުބޮޑުވާނެއޭ ކިޔައިގެން އެސްފީނާޖެހޭވަރަށް އެފަށާއި އަޅައިގެން އުޅުނެވެ. ދިރޭއެއްޗަކަށް ވިނަމަ ވަގުތުން އެ ވިހަ ލޮލުގައި ޖެހުނީސްކަން ނޭގެއެވެ. އެވަރަށް ފިރުމަފިރުމާފައިވެސް އީފާ އެ ހާރު ނުނަގާ އޮތްތާ ބޭއްވީއެވެ.ފަސީހާ އުޅެނީ އޭއްޗެކޭ މީއްޗެކޭ ކިޔައިގެން އޭނަގެ ބޮލުގައި ވައްކަން އަޅުވާށެވެ. މިވަރު ތަންކޮޅެއް ބޮޑެވެ.


އެވަގުތު ކިޔާންގެ ދެމަފިރިންވެސް ގޭތެރެއިން ނުކުމެގެން އައެވެ. ޖުއާނާގެ ރީތިކަމާއި ޝާހީކަމުން ކަމްލާގެ ހިތުގައި އަބަދުވެސް ޚާއްސަ މަގާމެއް ދެވިފައިވެއެވެ. ޖުއާނާއައީ ކިޔާންގެ އަތުގައި އަތްއަޅުވާލައިގެންނެވެ. ކިޔާން ކޮންމެވެސް ސަމާސާއެއްކޮށްލިތަންވެސް ކަމްލާއަށް ފެނުނެވެ. އެ ދެމަފިރިންގެ ލޯބި ސަމާސާތައް ކިތަންމެފަހަރު ދެކެފައިވާތީ ކަމްލާ ކިތަންމެވަރަކަށްވެސް އެފަދަ ދިރިއުޅުމެއް ބޭނުންވެއެވެ. އޭނައާއި ވިޝާމްއަށްވެސް އެހާ ހަމަޖެހިލައިގެން އުޅެވޭނެނަމައެވެ.


" ދުށިން......އަޅުގަޑު އެ ހާރު ނަގަންވީ ކީއްކުރަން.......މަންމަ ތިބުނުއްވަނީ ހާރު ނެގީ އަޅުގަޑުކަމަށް..........އަޅުގަޑުގެ ނިކަމެތިކަމަށް ކިތަންމެ ވަރަށް މަލާމާތްކުރެވިއްޔަސް ހެޔޮ.....އެކަމަކު ވައްކަން ބޮލުގައި އަޅުވައިގެން ކެތެއްނުކުރެވޭނެ....... " ކަމްލާ ގެ ހިތުގައިނޭގޭ ބިރުވެރިކަމަކާއި އެކު ރުޅިވެރިކަން އުތުރިއަރައިގަތެވެ. އެ ހާރު ރީތިވެގެން އުޅެފައި އީފާ ގެންދިޔައީބާވައެވެ. ހިތާމަހުއްޓެވެ. އީފާ އެފަދަ ބޮޑު ވައްކަމެއްކޮށްފިއްޔާ އެކަމުގެ ޒިންމާ ވާންހުރީ އޭނަ ފިޔަވާ ދެވަނަމީހެއްނޫނެވެ. ކަމްލާ ކަންބޮޑުވިވަރުން އެތެރެހަށީގައި ނޭވާ ތާށިވެއްޖެއެވެ.


" ކަމްލާ ނޫނީ އީފާއަށް އެގެންވާނެ އެ ހާރު އޮތްތަނެއް...އިރުއޮއްސެންދެން މިތަނުގައި ތިބިބަޔަކަށް ނޭގި ކާކު އެގެންދާނީ.......އަހަރެން މެންދުރު އެ ހާރު އެތާ ބޭއްވިގޮތަށް ފަހުން ނަގަން ހުއްޓާ ހަދާންމިވީ މައުރިބު ނަމާދުކުރިފަހުން...އައިއިރު އެ ހާރު ފެންނާކަށް ނެތް.....ކަމްލާ ނުނަގަންޏާ އީފާ ކާރިން އަހާ....." ފަސީހާ ގެ މޫނުމަތީގައިވަނީ ނުރުހުމުގެ ކުލަވަރެވެ.

ކަމްލާ ވަގުތުން އީފާއަށް ގުޅިއެވެ. ކަމްލާ ސުވާލު ނުކުރަނީސް ފަސީހާ ފޯނުއަތުލައިގެން ތަންކޮޅެއް ބާރަށް ވާހަކަދެއްކިއެވެ. އެ ހާރު ދުށިންތޯ އަހާލައިފިއެވެ. އީފާ ބުނީ އޭނަ މިހިރީ އަދި ގެއާއި ވަރަށް ކާރީގައި ކަމަށާއި މިވަގުތު އެބުރި އަންނާނެކަމަށެވެ.ފަސީހާ ކިޔާން އާއި ޖުއާނާއަށް ވެގެން އުޅޭގޮތް ކިޔާދިނެވެ. ކަމްލާގެ މޫނު ރަތްވިއެވެ. މިފަދަ މުއްސަދި ގެއަކަށް ވަދެވުނުކަމުގެ މޮޔަކަން އިހުސާސްކުރެވުނެވެ. ދުނިޔެއަށް ބަދުނާމުވުން ނޫންކަމެއް ނުވެއެވެ. އިރުކޮޅަކުން އީފާ ދުވަމުން ދުވަމުން އައެވެ.


" ހެލޯ ގައިސް.......ސާރޗް ޕާޓީ އަށް މިއައީ ލީޑަރ.....ކޯޗެކޭ ގެއްލުނީ......." އީފާ އައީ ޖިންސްގެ ޖީބަށް އަތްޖަހާލައިގެން ދުވެފައެވެ. އެނާ ކޮޕީކުރަން އީފާ މަސައްކަތްކުރާކަން ކަމްލާ ދަނެއެވެ. ކުޑަކުއްޖެއްހެން ސަކަރާތްޖަހަމުން ފުމެމުން އުޅޭއިރު އީފާ އާއި އެއްގޮތަކަށް ވެސް ނުގުޅެއެވެ. އެފަދަ މައުސޫމްކަމެއްވެސް އެ މޫނުގައި ނުވެއެވެ.


"އީފާ ރީތިވެގެން އުޅުނު ބްލެކް ޕާރލް ހާރު ......." ކަމްލާ ގެ ލޯ ތެމެންފެށިއެވެ.


"އާވް......އާރ ޔޫ ޕްލެއިން އެ ގޭމް އޯރ ވޮޓް.........ކަންމީ އަހަރެން ގާތު ގެންދާށޭ ބުނީމަ ގެންދިޔައީ......އާންޓީ ވަޓްސް ޔޯރ ޕްރޮބްލެމް.....ކަންމީ ބުނާގޮތުން މިގޭގައި މި ބައިވަރު ގިނަވެފައި އޮންނަނީ......ޖުއާނާގެ ކަރުގައިވެސް އެ ވިދަނީ ޖަވާހިރުތައް.......ކަންމީ މިވަރުގެ އެއްޗެއް އެކުވެރިއަކަށް ދިނީއޭ ކިޔާފައި ތިހާ ރުޅިއަންނަންވީ ކީއްވެ...." އީފާ ޖިންސްގެ ޖީބުން އެ ރަންމުތުގެ ހާރުނަގާފައި ދެއްކުމުން އެންމެން ހައިރާންވެ އެކަކު އަނެކަކަށް ބަލާލައިފިއެވެ.


ކަމްލާ ގެ ހިތާމަ ރުޅިވެރިކަމަށް ބަދަލުވިއެވެ. އީފާއަކީ ހާދަ ލަދުކުޑަ ގޮތްކުޑަ އަންހެންކުއްޖެކެވެ. ބޮޑު ދޮގުތަކެއް ހަދަމުންދާއިރު ހެއްދެވި ފަރާތަށް ބިރުނުގަނޭހެއްޔެވެ؟ ކަމްލާ އައި ރުޅީގައި ޖެހިލުމެއްނެތި އީފާގެ މޫނުމައްޗަށް ހޫނު އެތިފަހަރެއް ވީއްލާލައިފިއެވެ. އެފަދަ އިނާމެއް ލިބިދާނެކަމަށް އުއްމީދުނުކޮށް ހުއްޓާ ކަމްލާ ޖެހި އެތިފަހަރުންވީ ތަދާއި އެކު އަވިއައިނުވެސް ބިންމައްޗަށް ވެއްޓި ތެޅިއްޖެއެވެ. އީފާގެ ލޮލުން ފެންފައިބަމުން ދިޔައެވެ.


" ދޮގުވެރި ނުބައި މީހާ....މިހާރު ފައިޒާން އާއި ރިދާގެ ދޭތެރެއަށް ވަންގޮތަށް އަހަރެންނާއި ފިރިމީހާގެ އާއިލާއާއި ދޭތެރެ ޖައްސަން އުޅެނީތަ؟ ބޮޑު ފަންޏެއް.....އެންމެންގެ ދިރިއުޅުން ހަލާކުކުރަން ހުރި ޑާކޫއެއް.......ބެސްޓްފެރެންޑްއެއްގެ ގޮތުގައި ހުރެ ކިތައް ފަހަރު ރިދާއަށް ބޮޑި ދިންތަ؟ އެހެންނޫންނަމަ ފައިޒާން މެރީކުރީހީ ރިދާ އާއި...." ކަމްލާގެ ރުޅިގަދަބައި ފެނުމުން ޖުއާނާމެން ތިބީ މަޖާވެފައެވެ. އެ ހާ ބުޅި ބުޅި އިސްތަށިގަޑެއްހުރުމުން އެއްގޮތަކަށްވެސް ކަމްލާ ގެ ހިމޭންކަމަކާއި ނުގުޅެއެވެ. އެންމެ ފަހުން ފޮރުވިފައިވާ އަސްލު ސިފަ ކަމްލާގެ ފަރާތުން ފެނުނީއެވެ.


" ކަންމަ.....ޓޫ ފޭސްޑް ޕަރސަން އެއް.... ޖަސްޓް އެޑްމިޓް އިޓް.........އަހަރެންނެއް ނޫނެއްނު ފައިޒާން އާއި އިންނަން ރިދާއަށް ލަޑު ދިނީ...އެންމެނަށް އެކަން އެގޭނެ....ކަންމަ....ނިއުރޯއަކަށް ދައްކަންވީނު.....ނޯ.......ބެޓަރ ގެޓް ހެލްޕް ފްރޮމް އެ ޝްރިންކް.....ނެކްލަސް ރީތިކޮށް ދީފައި ބަސްޓްވީމަ އަހަރެން ވަގަށް ގެންދިޔައީކަމަށް މިވީ........އާންޓީ...........މިއޮތީ ތި ޕްރެޝަސް ނެކްލަސް.....ދެންވެސް ކަންމަ ކުޅުދިޔާވާ ހިސާބުގައި އަގުބޮޑު އެއްޗެހި އެޑްވަރޓައިޒް ނުކުރާތި.....ޔޫ ނޯ ވަޓް؟ ޔޫ ބިލިއަނަރސް އާރ ރިއަލީ ޓައިޓްފިސްޓެޑް ހެހެ......." އީފާ އަދަބެއް ސަދަބެއްނެތި ފަސީހާ އާއި ވާހަކަ ދެއްކިގޮތުން ރުޅިގަދަވެފައި ހުރެވެސް ކަމްލާ ލަދުން މޫނުގައި އަތްއަޅަން ބޭނުންވިއެވެ. މިހާ އަޚުލާގު ދަށް އެކުވެރިއަކު އޭނައަށް ލިބުނީތީ ހިތާމަކުރިއެވެ. އަމިއްލައަށް މަޖާ ވާހަކަ ދައްކާފައި ހުނުމަކީ ކަމްލާ އެންމެ ފޫހިވާ އެއް ސިފައެވެ.


"ކަމްލާ....މިއަދަށްފަހު ކަމްލާ ރައްޓެހިން މިގެއަށް ވައްދައިގެން ނުވާނެ......ތިކަހަލަ ވިޔާނުދާ މީހުން ގެއަށް ވަންނަން ފެށީމާ މިގޭގައި ހިގާ ހާދިސާތައް ދެކިބަލަ.....މިއީ މީގެ ކުރިން ދުވަހަކު މިގެއިން ދުށްކަންތަކެއް ނޫން........." ފަސީހާ އިތުރު އެއްޗެއް ބުނުމެއްނެތި ދާންހިގައިގަތުމުން ކިޔާންގެ ދެމަފިރިންވެސް މަންމަގެ ފަހަތުން ދިޔައެވެ. ކުރިމަތީގައި ނިއުޅިގެން ދިޔަ ޑްރާމާގެ ސަބަބުން އެންމެން ތިބީ ފާޑެއްގެ ޝައްކެއްގެ މަތީގައެވެ.


" ހޭ ކަންމާ...ސޮރީ....އަހަރެން އަސްލު ބޭނުންވީ ފަސީހާމެން ފޮނިކަމުން ތިރިކޮށްލަން......ބިމާއިހަމަކޮށްލަން....ފޮނި ހިތްމޮޅު ބަޔެކޭ......އެހެންވެ ޑްރާމާއެއް ކުޅުނީ....ކަންމަ ދެރަވެފައި ހުންނާތީ ބޭނުންވި ހެލްޕެއްވާން....." އީފާ ހީގަތުމުން ކަމްލާ ގެ ރުޅިއިތުރުވިއެވެ. އީފާގެ ޑްރާމާއިން ކަމްލާ ނުހެއްލޭނެއެވެ. އީފާއަކީ އޭނަގެ ދިރިއުޅުމަށް ހުރި ބޮޑު ބިރެކެވެ. ކަނޑުވެފައިވަނިކޮށް އައްސޭރިއެއް ފެނުމުގެ ކުޑަ ކުޑަ އުއްމީދެއް އޮތްވާ ބޯމަތިވި ބިރުވެރި ތޫފާނެއްފަދައެވެ.


" ހެޕީ ޓު ނޯ ދެޓް ޔޫ ކެއަރ....ބަޓް.......އަހަރެން ބޭނުމެއްނޫން ދެން އީފާ އާއި ވާހަކަދައްކާކަށް...މިތަނުން ދޭ....." ކަމްލާ ދަތްކުޑިވިކައިގެންފާ މަލާމާތުގެ ރާގަކަށް ބުނެލިއެވެ.


" ނޯ.....ކަންމަ.....އަހަރެމެންގެ ޕެކްޓް ހަދާންކޮށްލާ.....ފްރެންޑްސް ފޯރއެވަރ.." އީފާ އިސްތަށިގަޑުން ބޮޅެއް އަތަށް އޮޅާލަމުން ހީލިއެވެ.

" ޑެވިލް އާއި ޕެކްޓް ހެދުން ކަހަލަ މޮޔަކަމެއް އެކުރެވުނީ...ގެޓް ލޮސްޓް..." ކަމްލާ އެތެރެއަށް ވަދެ ދޮރު ތަންޑުއަޅުވައިފިއެވެ. އޭނަގެ ހަޔާތުން އީފާ އަބަދުގެ އަބަދަށްޓަކައި ނެރެ އެއްލާލީއެވެ.




ރިދާގެ އޮޕަރޭޝަނަށްފަހު ރިވާއު ފުރަންޖެހުމުން ޓްރީޓްކުރަން ހަވާލުކުރީ ފައިޒާންއާއިއެވެ. ފައިޒާންއެއްގޮތަކަށްވެސް އޭނަ ލޯބިވާ އަންހެންކުއްޖާ ބަލިމީހެއްގެ ގޮތުގައި ދެކެން ބޭނުންނުވިޔަސް އެ ޒިންމާނެގީ އޭނައަށް ވުރެ ރިދާއާއި އަޅާލާ ފުރިހަމަގޮތުގައި ފަރުވާ އެހެންމީހަކަށް ދެވޭނެކަމަށް ގަބޫލުނުކުރެވޭތީއެވެ. ވޯޓަރގޭޓް ހޮސްޕިޓަލުގައި އެ އާއިލާގެ އެތައް ޑޮކްޓަރުންނެއް މަސައްކަތްކޮށްފައި އަޔާޝް އަކީ ޑިރެކްޓަރކަމަށް ވާތީ އޭނައަށް ފައިޒާން ރިދާއަށް ފަރުވާކުރާކަން ދާދިއަވަހަށް އެގި މައްސަލަ ޖައްސަފާނެކަމަށްވެސް ފައިޒާން ހީކުރިއެވެ. ނަމަވެސް އެފަދަ ނުރައްކަލެއް ނުފެނެއެވެ.


ރިދާ ފައިޒާންއަށް ބަލާލީ ގަބޫލުކުރަން ދަތި ނަޒަރަކުންނެވެ. ފައިޒާން އޭނައަށް ޒިޔާރަތްކޮށްފާނެކަމަށް އެއްވެސް ވަރަކަށް އުއްމީދެއް ނުކުރެއެވެ. ހީވީ ހަމަ ރީތި ހުވަފެނެއްފެންނަހެންނެވެ. ކިރިޔާ އެސްފިޔަ ޖަހާލިޔަސް ފައިޒާން ގެއްލިދާނެތީ ބިރުން އޭނަ އަދިވެސް ލޯ ބޮޑުކޮށްލައިފިއެވެ. ފައިޒާން ޑޮކްޓަރ ކޯޓްލައިގެން ހުރުމުން ރިދާގެ ހިތުގައި ގަދަރު އުފުލިގެން ދިޔައެވެ. ޝަޚުސިއްޔަތުގެ ވަރުގަދަކަން ބައެއްފަހަރު ފެންނަނީ މިފަދަ މަގާމުތަކުގައި ޓައީ ނޫނީ ކޯޓްގައި ތިބޭއިރުއެވެ. " ވާއު " އެތައް މިލިއަން ފަހަރު ރިދާގެ ހިތް ތައުރީފުކުރިއެވެ.


" ޒެން...." ރިދާ ގެ ތުންފަތް ކުޑަކޮށް ހަރަކާތްކޮށްލިއެވެ.އެހާ ބަލިކޮށް އޮތްއިރުވެސް ހުރިހާ ލޭތައް މޫނަށް ޖަމާވެ މޫނު ފިނިފެންމަލެއްހާ ރަތްކޮށްލައިފިއެވެ. އެނދުގެ ބޯކޮޅު ހިއްލާލާފައި އޮކްސިޖަން ގުޅާފައި ވީ ނަމަވެސް ރިދާ ވާހަކަ ދައްކަން ބޭނުން ވިއެވެ.

" ރިދްގެ ޑޮކްޓަރަކަށް ވުމުގެ އޮނަރ ލިބުނީ......." ފައިޒާން ހުއްޓުނީ ހަށަން ބަދެލައިގެންނެވެ. އެ ފެހިލޮލުގައި ވަގުތީ ގޮތުން ނަމަވެސް އުފާވެރި ވިދުވަރެއްވެއެވެ.

" ރިއަލީ...." ރިދާ ހިނިތުންވެލަން މަސައްކަތްކުރިއެވެ.

" ރިދް އޯކޭތަ؟ އެއްވެސް އުދަގުލެއްވޭތަ؟ " ފައިޒާންގެ ސުވާލުތަކުން ހުވަފެނެއްގައި އޮތްކުއްޖެއްފަދައިން ބޯ ހޫރަމުން ދިޔައެވެ. އެނަ ސާރޖަރީ އާއި ބެހޭވާހަކައެއް ދައްކާހިތެއްނުވެއެވެ.

"ޒެން ހީވަނީ ދުނިޔެ މުށުތެރޭގައި ލައިގެން އުޅޭހެން.....އުފާވެރި ނަސީބުރަގަޅު ކުއްޖެއް....އެކަމަކު އަހަރެން އޮންނަން ޖެހެނީ އަބަދު ޑެތްބެޑްގައި....ޑޮކްޓަރެއްގެ ގޮތުން ކެއަރ ކުރާކަން އެގުނީމަވެސް ވަރަށް އެހެންކަހަލަ ފީލިންގްސް އެއް......އެކަމަކު ރިއަލްއެއްނޫން...މިއީ ޑްރީމެއް....." ރިދާ ގެ އެ ލަފުޒުތަކުން ފައިޒާން ތުންފަތުގައި ދަތްއަޅާލަމުން އަނގަޔަށް ހަދާލިގޮތުން ރިދާ ގެ ހިތަށް ތަދުވިއެވެ. އޭނަގެ މަޖުބޫރީ ލޯބިވެރިޔާއާއި މެދު ކުރެވޭ ވަހުމްތަކާއި ޝައްކުތަކުގެ ސިލްސިލާއެއް އެހެން ބޮޅެއް އިތުރުނުކޮށް ސީދާ އަހާލިޔަސް ފާފަވެރިއެއްނުވާނެއެވެ.


އެތަނަށް ވެރިވެގެން ދިޔައީ ހަމައެކަނި މެޝިންތަކުގެ ބީޕްއަޑެވެ.
"ރިދް ރިކަވަރ ވަންދެން އަހަރެމެން ގެ ދިރިއުޅުމުގެ ވާހަކަތައް ހަދާން ނައްތާލަމާ ހިގާ......ހުރިހާ ކަމަކާއި އެއްފަހަރާ ހަގުރާމައެއް ނުކުރެވޭނެ ...ރިދްގެ ސިއްހަތު އެންމެ މުހިއްމީ....މިއީ ކިހިނެއް ހިގި ހާދިސާއެއްތަ؟ " ފައިޒާން ސުވާލުކުރިއެވެ.


"ޝެލްފްއިން ކޭކު މިކްސަރ ނަގަން އުޅެނިކޮށް އަރިއަޅާލީ...." ރިދާ ހިންދިރުވާލަމުން ބުންޏެވެ.

"ޝެން ބުނީ ކުއްލިއަކަށް ގުގުރާލީމަ ރިދް ބިރުގަތީކަމަށް...އެހާ ފިޑިކުއްޖެއްކަން ނުދަންނަން...ރިދް ގާތު އަބަދު ބުނަމެއްނު ބަލައިގެން އުޅޭށޭ......އެކަމަކު އަބަދު ކުދި ކުދި އެކްސިޑެންޓްތައް ވީމަ މާނައަކީ އަޅާނުލެވެއޭ.....ކީކޭ ރިދް ބުނަނީ..." ފައިޒާން ބުމައަރުވާލިއެވެ.


" އެކްސިޑެންޓްވީމަ ރެސްޓް ނެގޭނެ...މި ހޮސްޕިޓަލުގައި އެޑްމިޓްކުރެވޭނެ....އަނެއްކާ ޒެން ގެ ޕޭޝަންޓަކަށް ވީމަ ހާދަ ހިތްހަމަޖެހޭ... މިތާ ނޫނީ ގްރޭވްގައި އޮންނަން ބޭނުމީ........" ރިދާގެ މޭގައި ކުޑަކޮށް ރިއްސަންފެށިއެވެ. އެ ހިތުގެ ޒަޚަމްތަކަށް ލޮނުމިރުސްއެޅިފައިވާއިރު އެ ހުރިހާ ޖަޒުބާތުތަކެއް ފޮރުވައިގެން ހިނިތުންވެލައިގެން އޭނަ މިއޮތީ ހަމައެކަނި ފައިޒާންގެ ލޯބީގެ ހައްގުގައެވެ. ފައިޒާންގެ މަޖުބޫރީ އެ ހިތަށް އިހުސާސްކުރެވިގެންނެވެ. ފައިޒާންގެ ޑިމްޕަލް ހިނިތުންވުން މިހެން ފެނިލުމަކީވެސް ހިތަށް ލިބޭ ފިނިކަމެކެވެ. ފަރުވާއެކެވެ. އޭނަގެ ނަސީބުގައި ހަމައެކަނި ބަލާލައިގެން ހިތްހަމަޖެއްސުން މިންވަރު ކުރައްވާފައިވާނަމަ ކުރާނެ އެއްވެސް ކަމެއް ނޯންނާނެއެވެ. އިލާހީ ގާނޫނާއި ރުހުން ނޫންގޮތެއް ނެތެވެ.

" ރިދް ތިގޮތަށް ވާހަކަ ދެއްކުމުގެ ބޭނުމަކީ ކޮބާ.....އިތުރަށް އަނިޔާ ނުދީ....މިބުނީ ކީކޭކަން އެގޭނެ..." ފައިޒާން ބޯ ހޫރާލީ މާޔޫސީގޮތަކަށެވެ.

"ޒެން......ކެން ޔޫ ޑޫ މީ އެ ފޭވަރ " ރިދާގެ އެ ޖުމްލައިން ފައިޒާން ކުޑަކޮށް ބުމަގޮށްޖަހާލީ ހިތަށް އައި ޚިޔާލަކުންނެވެ. ރިދާގެ ހިތަށް އަރާ އެއްޗެހި އޭނަގެ ވިސްނުމަށް އަންނަންވީ ސަބަބެއް ނޭގުނަސް އެވަގުތު ފައިޒާންއަށް ހީކުރެވުނީ ރަގަޅަށެވެ.


"ރިދް....ޕްލީޒް......ލައިކް އައި ސެޑް ބިފޯރ ފުރަތަމަ ރިދް ރަގަޅުވެބަލަ.....އޭގެ ފަހުން އެކަމާ ޑިސްކަސްކުރާނީ.......އަހަރެންގެ ވެސް ޕްލޭންތަކެއް ވޭ......." ފައިޒާން ރިދާގެ ކޯތާފަތުގައި މަޑުމަޑުން އަތް ބީއްސާލަމުން ހިތާމަވެރިގޮތަކަށް ހިނިތުންވެލިއެވެ. އުފާވެރި މޫޑުގައި ހުރި ލޯބިވެރިޔާ ކުއްލިއަކަށް ސީރިޔަސް ވެ ހުރިހާ ސިއްރުތައް އެ ފެހި ލޮލުގައި ފޮރުވާލައިފިއެވެ. އެވަގުތު މީހެއްގެ ހިލަން ވިއެވެ.

ރިދާ ގެ މޫނަށް ރަތްކުލަ ފާއްދާލައިފިއެވެ. ފައިޒާން އެބުރި ބަލާނުލިނަމަވެސް އަޑުން އެއީ ކާކުކަން އެގުނެވެ. ފައިޒާން ތުންފަތުގައި ދަތްއަޅާލިއެވެ. އަނެއް މައްސަލަގަޑު ހިލޭނެކަން ފައިޒާންއަށް ޔަގީންވިއެވެ. މައްސަލައަކީ ރިދާގެ ޑޮކްޓަރަކަށް ވީމައެއްނޫނެވެ. އޭނަ ރިދާގެ ކޯތާފަތުގައި އަތް ޖައްސާލީމައެވެ. އެއީ އެހެން މީހަކަށް ބަލާލަން ފަސޭހަ މަންޒަރަކަށް ނުވާނެއެވެ.

" އޯ ސޮރީ..... އޭމް އައި އިންޓެރަޕްޓިން ސަމްތިން....."

ނުނިމޭ