އިސްލާމީ ތާރީޚުގައި އެބައެއްގެ ފަރާތުން އުންމަތުގެ ހުރިހައި މުކައްވަނާތުތަކަކަށް ވަހުޝީި ޢުދުވާންތައް ދިން ބަޔަކީ ތަތާރުންނެވެ. ތަތާރުން ބަޢުދާދަށް ވަދެ އިސްލާމީ ޢައްބާސީ ޚީލާފަތު ތަޅާއި ފުޑުފުޑުކޮށްލިއެވެ. 40 ދުވަހުގެތެރޭގައި 2 ލައްކައެއްހާ މީހުން ޝަހީދުކޮއްލިއެވެ. ބަޢުދާދުގެ މަގުތަކުގައި ލެއިން އާރު ދެމުނުއިރު ދިޖްލާ ކޯރުގެ ސާފު ފެންގަނޑުގެ ކުލަ ދެލިން ތަޢައްޔަރު ވެގެން ދިޔައެވެ. އިސްލާމީ ދީނީ ޢިލްމުތަކާއި އަދަބިއްޔާތާއި ފައްނުވެރިކަމުގެ ފައްފުއްތަ ކޯރަށް އޮއްސާލެވެމުންނެވެ. ނަމަވެސް އިސާހިތަކު ގަދަ ކީރިތިވަންތަ ﷲ ތަޢާލާގެ ފަޟްލުވަންތަ ވެރިކަމުން ، ތަތާރުންގެ ހަރު ހިލަފަދަ ހިތްތައް އިސްލާމީ ނޫރުން އަލިވެ އޯގާތެރިވިއެވެ. ފުޑުފުޑު ކޮށްލެވުނު އިންފްރާސްޗަކްޗާތައް އަލުން ބިނާކުރަން ފެށިއެވެ. އިސްލާމީ ޙަޟާރަތު ބިނާކުރެއްވިއެވެ.

21 ވަނަ ސައްތައަށް އަލިވިލުނު އިރު މުސްލިމުން ގެ ޙާލަކީ މާޣޫލުން ޢިރާގަށް ވަދެގަތް އިރު އޮތް ޙާލަތެވެ. ތަފާތަކީ މިއަދު ގެ ތަތާރުން ނިކުތީ ހުޅަނގުންކަމެވެ. ވަހުޝީ ޢަމަލުތަކާއި ހައްދު ފަހަނާޅައިފައިވާ ލާއިންސާނި ޢަމަލުތަކުގައި އެއްވެސް ތަފާތެއް ނެތެވެ. އަލްބޭނިޔާ ޗެޗްނިޔާ ސާބިއާ ތުރުކީ ފަލަސްޠީން އަފްޢާނިސްތާން އަދި ޢިރާޤަކީ މިދެންނެވި 21 ވަނަ ޤަރުނުގެ ތަތާރުންގެ ޢުދުވާނީ ޙަމަލާތަކުގެ ދަށުވެފައިވާ ޤައުމުތަކެވެ. ބަރުހަތިޔާރު ބޭނުން ކޮށްގެނެވެ. ނުވަތަ އަތާތުރުކުފަދަ މީހުން ޓްރޭން ކޮށްގެނެވެ.

މިޙާތަނުން އުފެދޭ ސުވާލަކީ މުސްލިމުން ކޮބައި ހެއްޔެވެ. އިސްލާމި ޤައުމުތަކުގެ ވެރިން ކޮބައި ހެއްޔެވެ. ދީނި ޢިލްމުވެރިން ކޮބައި ހެއްޔެއެވެ. ދިފާޢުގައި ކުރީ ކޮންކަމެއް ހެއްޔެވެ. ޙަޤީޤަތަކީ އިސްލާމީ ޤައުމުތަކުގެ ވެރިން ދުނިޔެއަށް ހެއްލި މުދަލާއި ވެރިކަމާއި ޖާހު ބޮޑުކުރުމުގައި ޢާފިލުވެފައިވާކަމެވެ. ނަތީޖާއަކަށްވީ އިސްލާމީ ދައުލަތްތަކުގެ އާރާއި ބާރު ކެޑި ޢާސްކަރީގޮތުން ބަލިކަށިވުމެވެ. މިހެންވެ މިއަދުގެ ތަތާރުުންނާއި ދެކޮޅަށް އުފުލުނު ކަނޑިއެއްނެތެވެ. އަމާޒުކުރެވުނު އުންޑައެއްނެވެ.

ނަމަވެސް ކަނޑިއާއި އުންޑަތަކަށް ވުރެ ވެސް ބާރުގަދަ 'ހަތިޔާރު' އަޅުގަނޑުމެންގެ ލޭފަވެތި ޢިލްމުވެރި އުފުއްލެވިއެވެ. އިސްލާމީ ތައުލީމު ފެތުރުއްވެވިއެވެ. އިސްލާމީ ދާޢީން ބިނާކުރެއްވެވިއެވެ. އިރުމައްޗާއި ހުޅަނގަށް އިސްލާމީ ނޫރު ފެތުރުވެވިއެވެ. ނަތީޖާއަކީ މީސްތަކުން ޖަމާއަތް ޖަމާއަތަށް އިސްލާމް ދީނަށް ވަންނާން ފެށުމެވެ. ނަމުން މުސްލިމުންގެ ގޮތުގައި ތިބި މީހުން ޢަމަލުން މުސްލިމުންނަށްވީއެވެ. ކާފަރުންގެ ދުއްތުރާލާއި ފުރައްސާރައާއި ޖެއްސުމާ އެކުވެސްމެއެވެ. އެބައި މީހުންގެ އަތުގައި ހުރި ހުރިހައި ވަޞިލަތްތަކެއް ބޭނުން ކުރި ހިނދުވެސް މެއެވެ. ތެދެންމެއެވެ. ﷲ ތަޢާލާ ވަޙިކުރައްވަނީ : * إِنَّ الَّذِينَ كَفَرُوا يُنْفِقُونَ أَمْوَالَهُمْ لِيَصُدُّوا عَنْ سَبِيلِ اللَّهِ فَسَيُنْفِقُونَهَا ثُمَّ تَكُونُ عَلَيْهِمْ حَسْرَةً ثُمَّ يُغْلَبُونَ وَالَّذِينَ كَفَرُوا إِلَى جَهَنَّمَ يُحْشَرُونَ * [الأنفال : 36]. މާނައީ: ހަމަ ކަށަވަރުން ކާފަރުވި މިހުން، ﷲގެ މަގުން މީސްތަކުން ދުރުކުރުމަށް، އެއުރެންގެ މުދާތައް ހޭދަކުރެތެވެ. ފަހެ، އެއުރެން އެތަކެތި ހޭދަކުރަމުން ގެންދާނެތެވެ. ދެން އެމުދާތައް، އެއުރެންގެ މައްޗަށް ހުރި ހިތާމަޔަކަށް ވެގެންދާނެތެވެ. ދެން އެއުރެން ބަލިކުރައްވާނެތެވެ. އަދި ކާފިރުވި މީހުން ނަރަކައަށް ޖަމަޢަކުރައްވާނެތެވެ.

އަދިވެސް ވަޙީކުރެއްވެވި.....[ يُرِيدُونَ لِيُطْفِئُوا نُورَ اللَّهِ بِأَفْوَاهِهِمْ وَاللَّهُ مُتِمُّ نُورِهِ وَلَوْ كَرِهَ الْكَافِرُونَ. (8) هُوَ الَّذِي أَرْسَلَ رَسُولَهُ بِالْهُدَى وَدِينِ الْحَقِّ لِيُظْهِرَهُ عَلَى الدِّينِ كُلِّهِ وَلَوْ كَرِهَ الْمُشْرِكُونَ ] [ الصف : 8-9 ] މާނައީ: އެއުރެން އެދެނި ﷲ ގެ ނޫރުފުޅު (އެބަހީ: އިސްލާމް ދީން) އެއުރެންގެ އަނގަތަކުން ފުމެ ނިއްވައިލުމަށެވެ. އަދި ކާފިރުން ނުރުހުނު ކަމުގައިވިޔަސް ﷲ، އެކަނލާންގެ ނޫރުފުޅު ފުރިހަމަ ކުރައްވާހުއްޓެވެ. {9} އެކަމލާންގެއީ ތެދުމަގާއި ޙައްޤު ދީނާގެން އެކަނލާންގެ ރަސޫލުން ފޮނުއްވި ރަސްކަނލާންގެއެވެ. އެއީ އެންމެހާ ދީންތަކުގެ މައްޗަށް އެދީން (އިސްލާމްދީން) މަތިވެރި ކުރެއްވުމަށެވެ. މުޝްރިކުން ނުރުހުނު ކަމުގައި ވިޔަސްމެއެވެ.

ﷲ ސުބުޙާނަހޫ ވަތަޢާލާގެ ބަސްފުޅުގެ ތެދުކަމާއެވެ. މިއަދު ހުޅަނގުގައި އިސްލާމް ދީން ފެތުރެމުން ދަނީ ތަޞައްވަރު ކުރަންވެސް ދަތި ހަލުވި މިނެއްގައެވެ. ކްރިސްޓިއަން މިޝަނަރަރީތަކުން ބިލިއަނުން ޑޮލަރު ޚަރަދު ކުރަމުންދާއިރު ވެސް މެއެވެ. ސިޔާސީ އިޤްތިޞާދީ ކުޅިގަނޑުތައް ކުޅޭ އިރުވެސްމެއެވެ. އާޚިރުގައި އެއިން ކޮންމެ ކަމެއްވެސް މަގުފަހި ކޮށްދެނީ އެބައި މީހުންގެ ތެރެއިން އިތުރު ބަޔަކު އިސްލާމް ދީނަސް ވަނުމަށެވެ. ސެޕްޓެމްބަރ 11 ހަމަލާއަށް ފަހު އެމެރިކާގައި އިސްލމް ވާ މިންވަރު 2 ގުނައަށް އިތުރުވުމަކީި މީގެއް އަލިގަދަ ހެއްކެކެވެ.

އިސްލާމް ދީނަކީ އެއްވެސް އަޞްލެއް ނެތް އައިޑިއަލޮޖީ ތަކެއްކަމަށާއި އޭނަ ބުންޏޭ މީނަބުންޏޭ ކިޔާ ދީނެކޭ ކިޔައި އަޑުގަދަ ކުރަނިކޮށް [2008 ގެ އިޤްތިޞާދީ ތަދުމަޑުކަމާއި] ކުރިމަތިވި ހިނދު އިސްލާމީ ބޭންކިންގެ ފުރިހަމަ ކަން އިގިރޭސި ބޮޑުވަޒީރަށް އެގި ލަންޑަނަކީ އިސްލާމީ ބޭންކިންގެ ހަބަކަށް ހަދަން ބޭނުން ވިއެވެ. އިސްލާމީ އިންޝުއެރަންސަކީ އެންމެ ގެއްލުންކުޑަ އިންޝުއަރެެންސް ނިޒާމްކަން ފަރަންސޭސި ރައީސަށްް އެގި ފްރާންސުގައި އިސްލާމިކް ފައިނޭޝަލް ސިސްޓަމެއް ޤާއިމް ކުރަން ބޭނުންވިއެވެ. އެހެންވީމާ އަޅުގަނޑުމެން ﷲ ތަޢާލާގެ އަންނަނިވި ވަޙީގެ ބަސްފުޅު ތަފްސީރު ކުރަނީ ކިހިނަކޫންތޯއެވެ؟ [އަދި ކާފިރުން ނުރުހުނު ކަމުގައިވިޔަސް ﷲ، އެކަނލާންގެ ނޫރުފުޅު ފުރިހަމަ ކުރައްވާހުއްޓެވެ.]

ތެދެންމެއެވެ. އެކަނލާންގެއީ ވަޢުދު ފުޅާ ޚިލާފު ވެވަޑައިގަންނަވާނެ ފަރާތެއް ނޫނެވެ. ވީމާ މުސްލިމުން 12 ވަނަ ޤަރުނުގެ ތަތާރުން ގެ ހިތްތަށް އިސްލާމީ ނޫރުން ފަތަޚަ ކުރި ފަދައިން 21 ވަނަ ޤަރުނުގެ ތަތާރުންގެ ހިތްތަކާއި އިޤްތިޞާދު ﷲ ތަޢާލާގެ އިރާދަފުޅާއެކު ފަތަޙަ ކުރާނެއެވެ.

ނޯޓް: http://www.youtube.com/watch?v=6-3X5hIFXYU&feature=related މި ވީދިއޯ އިން ފެނިގެންދަނީ ވޭތުވެ ދިޔަ 30 އަހަރު ދުވަހު ޔޫރަޕުގައި މުސްލިމުންގެ ޢަދަދު ގިނަވަމުން އައިގޮތާއި 2050 ވަނަ އަހަރާ ހަމައަށް ދާާއިރު ޔޫރަޕުގެ އާބާދީ އަށް އަންނާނެކަމަށް ލަފާކުރެވޭ ބަދަލުތަށް. މިއީ ތަޞައްވަރު ކުރަން ދަތި ޙަޤީޤަތަކެއް.