މިއުޒިކާއި ޝޯވްތައް ބޭއްވުމުގެ ހުކުމް ދާދިފަހުން އަހަރުމެންނަށް ވަނީ ފެނިގެން ގޮސްފައެވެ. ރާއްޖޭގައި ވަކިން ޖަމާއަތް ހަދައިގެން ދީނީ ހުކުމްތައް ބުނެދެމުންދާ ހުރިހާ ޖަމާއަތްތައްވެސް މިކަމާ އެއްގަލަކަށް އަރައި، އޭކޮންގެ ކޮންސެޓު ވަނީ ހަރާމްކޮށްފައެވެ. އަދި އެ އިވެންޓު ބާއްވައިފިނަމަ ތަފާތު ކަންތައްތައް ކުރާނެ ކަމުގެ އިންޒާރުވެސް ވަނީ ދީފައެވެ.

މިފަހަރު މިއުޅެނީ ޝާހްރުކް ހާނެވެ. ދެ ދީނަށް އަޅުކަން ކުރާ، ދެ ކަލާންގެ ގެންގުޅޭ ކަމަށް ބުނާ ޝާހްރުކްހާނުގެ ޝޯވްއެއް މާލޭގައި ބާއްވަން މިހާރު ދަނީ ތައްޔާރުވަމުންނެވެ. މިފަހަރު ދިވެހިންގެ ދީނީ އަގީދާއާއި އިސްލާމްދީނުގެ ފުރިހަމަ ހުކުމްތަކަށް ތަބާވާ މިންވަރު ވަރަށް ރަނގަޅަށް ފެނިގެން ދާނެއެވެ. އެއީ އިންޑިޔާއާއި ޕާކިސްތާނު މީހުން ކުރަމުންދާ ކަންތައްތަކަކީ ބައެއް ދިވެހިން ލޯމަރާލައިގެން ތިބެ ހައްދެއް ނެތި ތާއިދު ކުރަމުންދާ ކަންތައްތަކެވެ. ހާއްސަކޮށް އިންޑިޔާގެ މުނިފޫހުފިލުވުމުގެ ދާއިރާއަށް ވަދެ ގެއްލި ހުސްވެފައިވާވަރާއި އިންޑިޔާ މީހުންދެކެ އެވާ ލޯބިން މިފަހަރު ހަރާމް-ހަލާލުގެ ތިލަފަތް ބަރުވާނީ ކޮންކޮޅަކަން އެނގޭނެއެވެ. ހަމަގައިމުވެސް މިއުޒިކާއި، ޝޯވް ތަކާއި ދެޖިންސު މަސްހުނިވެގެން 'ކުޅިސަމާ' ދައްކާލުމުގެ ހުކުމަކަށް ބަދަލެއް އައި ކަމަކަށް އެއްވެސް ދީނީ ޖަމާއަތަކުން ހުކުމެއް ނުނެރެއެވެ.

އިސްލާމާއި ދިވެހި ކިޔެވުން، ސާނަވީ މަރުހަލާގައި އިހުތިޔާރީ މާއްދާއަކަށް ހެދުމުން ކޮންމެ ރެއަކުހެން އެޑިޔުކޭޝަން މިނިސްޓަރުގެ ކައިރީގައި ދަންފަޅި ބަހައިގެން މިހާރުވެސް މުޒާހަރާ ކުރަމުންދެއެވެ. މިހާރު ދިމާވެގެން މިއުޅެނީ ދިވެހި – އިސްލާމް ކިޔަވަމުންދާ ކުދިންނަށް ޝޯވް ބާއްވައިދޭން ބަޔަކު އަންނަ މައްސަލައެވެ. އަދި އެއަށް ވުރެ ބޮޑު މައްސަލައަކަށް ވެގެން މިއުޅެނީ ލަންކާގައި ބާއްވާ ބޮލީވުޑް ފިލްމުފެސްޓިވަލަށް އަންނަ ތަރިންނާއި އެމީހުންގެ ރައްޓެހިންގެ ގައި މޮޑެދީ، މަސާޖުކޮށްދީ، ނޭފަތުން އިސްތަށި އުފުރުމުގެ މަސައްކަތްވެސް ދިވެހި ކުންފުންޏަކާ ހަވާލުކޮށްފައި ވުމެވެ. އަދި މިކަމަށް ހޮވާނީ ދިވެހިންކަމާއި، މި ހިލޭ ފިރިހެނުންނާއި އަންހެނުންގެ ހަށިގަނޑުގައި އަތް އުނގުޅަށް ތިބޭނީ ދިވެހިން ކަމަށްވެސް ވަނީ އިއުލާންކޮށްފައެވެ.

މިއޮތީ ކަމަކާ ޖެހިފައެވެ. ހަރާމް ކަމުގެ މައްޗަށް ހަރާމެވެ. ގުއަންޓަނާމޯބޭއިން އަންނަނީ ކުށެއް ސާބިތުވެފަ ނެތް މުސްލިމުންނެވެ. އެމީހުން ގައުމަށް އެރިޔަ ނުދޭން މަޖްލީހައި ހަސަން ސައީދު ހުރީ ފޫގަޅާފައެވެ. ކަރަންޓު އަގަށް ބަދަލުއައި ފަހުންވެސް މިއޮތީ މުޒާހަރާ ފެށިފައެވެ. ނައިބްރައީސް ވެރިކަމަށް އެރުމަށް އެމްޑީޕީ ރުޅިއެރުވުންނޫން ކަމެއް ނުކުރެއެވެ. މުޒާހަރާއެވެ. ދިވެހި-އިސްލާމް މަންހަޖަށް ގެނައި ބަދަލުން އެޑިޔުކޭޝަން މިނިސްޓަރަށް ނިދޭވަރެއްނޫނެވެ.

ދެން މިއޮތީ ހަގީގަތުގައި މުޒާހަރާ ކުރަން ޖެހޭ ދީނީ މައްސަލައެވެ. ޝާހްރުކްހާން އައިސް ހަމައެކަނި ލަވައެއް ކިޔަނީއެއްވެސްނޫނެވެ. ބޮޑު ގާފިލާއަކާއެކީ އައިސް ނަށާ މަޖާކޮށް، 2 ގަޑިއިރުވަންދެން 'މަންޖޯޅި ޖެހިފަ' ދާއިރު ހަމަ ބަލަހައްޓައިގެން ތިބެންވީހެއްޔެވެ. ދިވެހި އަންހެންކުދިން ތަކެއް، ބެންކޮކް ކުލީ އަންހެނުން ގެންދާހެން ބޮލީވުޑް މީހުންގެ ގައި މޮޑެން، އުކުޅުވަޅުގަ ތެޔޮދަމަން ފޮނުވަންވީހެއްޔެވެ. ހިތްވަރެއް ހުރިއްޔާ މިކަމާ ދެކޮޅަށް ތެދުވެ ބަލާށެވެ. މިފަހަރު އަޑުގަދައީ އިސްލާމްދީނުގެ ތޯ ނުވަތަ ބައްލޭ ބައްލޭގެ އަޑުތޯ އެނގޭނެއެވެ. އާއްމުކޮށް ދީނީ މައްސަލަތަކަށް ސަމާލުކަން ނުދޭ ގައުމީ ޕާޓީއާއި، ނައިބު ވަހީދު ޕާޓީ ބޮޑީ މަސާޖުގެ އަވާގައި ޖެހި އެންމެން ނިދި ދަނޑިއަރާފައި ތިބި މަންޒަރު އަހަރެންގެ ލޮލަށް މިހާރުވެސް ފެންނަ ކަހަލައެވެ.