ގްރޭޑް 11، 12 ނުވަތަ އޯލެވެލް އަކީ މަތީ ތައުލީމުގެ ފެށުމެވެ. އެއީ ޔުނިވަރސިޓީ އެންޓްރީ ލެވެލް އެވެ. ބައެއް ގައުމުތަކުގައި ޕްރީ-ޔުނިވަރސިޓީ ލެވެލް އެވެ. އެ ލެވެލް ނިމުމުން ޑިގްރީއަށް ކިޔަވަން ފަށަނީ ތިމާ ހާއްސަވާ، ކިޔަވަން ބޭނުންވާ ދާއިރާއެވެ.

ރާއްޖޭގައި މިހާރު ސިޔާސީ ކަމަކަށް، ދީނީ ކަމަކަށް ހަދައިގެން މިއުޅެނީ މިޔުނިވަރސިޓީ އެންޓްރީ ލެވެލްގެ ސިލަބަހާމެދުގައެވެ. 10 އަހަރުވަންދެން އިސްލާމާއި ދިވެހިބަސް ކިޔެވުމަށްފަހު އޭލެވެލް ގައި އިސްލާމާއި ދިވެހި އިހްތިޔާރީ މާއްދާއަކަށް ހެދުމުން އެ ދެއަހަރުގައި ކިޔަވާކުދިން، ދީން ގެއްލި ދިވެހިބަސް ދޫކޮށްލާ ވާހަކައެވެ. ދީނީ ގޮތުން މީހުންގެ މެދުގައި ފިތުނަ ފަސާދަ އުފެއްދުމަށް މިވަރުގެ ބައެއް އަހަރުމެން ޒުވާނުންގެ ހަޔާތުގައި ފެންނާނެކަމަށް ޔަގީނެއްނޫނެވެ. މިހެން މިބުނަނީ އަތޮޅުތަކުގެ ރަށްރަށުގެ މީހުންނަށް ގުޅާފައި މިބުނަނީ ކިޔަވާކުދިންނަށް ދިވެހި އިސްލާމް އިހްތިޔާރީ މާއްދާއަކަށް ހެދި ވާހަކައެވެ. ގަސްތުގައި ވަކި ކުލާހެއް އުމުރުފުރައެއް ސާފުކޮށްނުދީއެވެ.

އަހަރެންގެ ސުވާލަކީ މަތީތައުލީމް ހަދާކުދިން ދިވެހި އިސްލާމް ނުކިޔަވަނީ ހަމައެކަނި ތި ދެއަހަރު އެކަންޏެއްނޫނެވެ. އޭލެވެލްގައި އިހްތިޔާރީ މާއްދާއަކަށް ފުރުސަތު އެބަލިބޭނުން ހެއްޔެވެ. ޑިގްރީއާއި މާސްޓަ ޑިގްރީ އަދި ޕީއެޗްޑީ ނިމޭ ދަރިވަރުން 7 ވަރަކަށް އަހަރު އެ ކިޔަވަނީ ތިބުނާ ދެމާއްދާ އާ ނުލައެވެ. އެތައް ސަތޭކަ ދިވެހިން މިހާރުވެސް ޑިގްރީއިން ފެށިގެން މަތީތައުލީމް ހާސިލްކުރަމުން ރާއްޖެއިން ބޭރުގައި އުޅޭއިރު، އަދި މާލޭގައި ސަރުކާރުގެ ކޮލެޖާއި އަމިއްލަ ކޮލެޖްތަކުގައ ކިޔަވަނީ ތި ދެ މާއްދާ އާ ނުލައެވެ. އެހެނޭކިޔާފައި ދީން ގެއްލިގެން، ދިވެހިބަހުން ވާހަކަ ދައްކަން ނޭންގިގެނެއްނޫޅެއެވެ.

ދީން ގެއްލެނީ، ދީނީ ގޮތުން ބައިބައިވެގެން މިއުޅެނީ އިސްލާމްދީން، ދީނީ ތައުލީމު ދިވެހިންނަށް ނުލިބިގެންނޫނެވެ. ހައެއްކަ ޖަމާއަތް ހަދައިގެން ދީނުގެ ނަމުގައި ދުވާލަކު ފަތުވާއެއް ދެމުންދާ ތި ކަހަލަ ބައިގަނޑުތަކުގެ ސަބަބުންނެވެ. ޔޫތު މިނިސްޓްރީއިން ސްޓޭޑިއަމް ނުދޭނަމޭ ބުންޏޭ ކިޔައިގެން ދޮގުވާހަކަ ފަތުރާ ދިވެހިންގެ މެދުގައި ފިތުނަ ފަސާދަ އުފެއްދުމަށް ފޫގަޅައިގެން ތިބި ތިކަހަލަ ދެފެންދޭތެރޭ އިމާމުންގެ ސަބަބުންނެވެ. މާތްﷲ ދޮގުހެދުމާއި ފިތުނަފަސާދައުފެދޭ ފަދަ ކަންތައްކުރުން ނަހީކުރެއްވިއޭ ކިޔައިގެން ހުތުބާ ލިޔާމީހުންގެ އަމަލުތައް ތިގޮތަށް ފެނުނީމާ ހުކުރަށްގޮސް ނިދާ މީހުން މަދެއްނުވާނެއެވެ.