ޢަލީ އޮފީހަކަށްވަނީ ދާދީ މިދާކަށްދުވަހުއެވެ. އެއޮފީހުގެ ބަޖެޓްސެކްޝަނުގައި މަސައްކަތްކުރާ ދެކުދިންކުރެއެއްކުއްޖަކު ދިގުޗުއްޓީއެއް ނެގުމާގުޅިގެން އެކުއްޖާ އެނބުރި އޮފީހަށް ނުކުންނަންދެން ތިޖޫރީގެ ތަޅުދަނޑި ޢަލީއާއި، ޙަވާލުކުރެވިއްޖެއެވެ.
ތަޅުދަނޑި ޙަވާލުކުރަމުން އެއީ ވަރަށް ބޮޑަށް ރައްކާތެރިވާންޖެހޭ އެއްޗެއްކަމަށާއި، ޑަބަލްތަޅުދަނޑި އޮންނަންވާނީ އެއްވެސް މީހަކަށް ނުފެންނަ ތާކު ވަރަށްބޮޑަށް ރައްކާކުރެވިފައިކަމަށާއި، އަބަދުވެސް ތިޖޫރި ހުޅުވުމަށް ބޭނުންކުރާނީ އާއްމުކޮށް ގެންގުޅޭ ތަޅުދަނޑިކަމަށްބުނެ ތަޅުދަނޑިއަށާއި، ތިޖޫރީއަށް ވަރަށް ބޮޑަށް ސަމާލުވެ އަމާނާތްތެރިވުމަށް ، އެއޮފީހުގެ ބޮޑުމީހާ ޢަލީއަށް ނަސޭހަތްދީ ހެދިއެވެ.
ކޮންމެއަކަސް އޭގެ ދެތިންދުވަސް ފަހެއެވެ. ޢަލީ ބަންދުދުވަހެއްގައި މަސްބާނަން ގޮސް އުޅެނިކޮށް ޢަލީގެ ތަޅުދަނޑިފަތި ކަނޑަށް ވެއްޓިއްޖެއެވެ. ތިޖޫރީގެ ތަޅުދަނޑިވެސް އިނީ އޭނަގެ ބޮޑުތަޅުދަނޑިފަތީގައެވެ. ކަނޑަށް މިވެއްޓުނީ އެތަޅުދަނޑިފައްޗެއްވެ. ތަޅުދަނޑި ފަތި ވެއްޓުމާއިއެކު ސިއްސައިގެންގޮސް އަލީއަށް ބުނެވުނީ "އަހާ އެވެއްޓުނީ ތިޖޫރީގެ ތަޅުދަނޑިފަތި.!"
އެއޮފީހުގެ ބަޖެޓްސެކްޝަނުގައި މަސައްކަތް ކުރާ އަނެއްކުއްޖާވެސް ޢަލީއާއިއެކު މަސްބާނަން ދިޔަކަމަށްވެއެވެ. އެކުއްޖާއަށް މިކަން އެނގިގެން ވަރަށް ހާސްވެފައި އިނދެ އެބަބުނެއެވެ. ބަލަ ދެން ކިހިނެތް ތިޖޫރީ ހުޅުވާނީ.....؟
ޢަލީ ވަރަށް ހަމަޖެހިލައިފާ ޖަވާބުދިނެވެ. ހާސްނުވޭ ޑަބަލްކީ އޮންނާނެ....!
ޑަބަލްކީއޮންނާނެވާހަކަ ޢަލީ ބުނުމުން އެކުއްޖާވެސް ކުޑަކޮށްހަމަޖެހުމުގެ ނޭވާއެއް ލިއެވެ. އަދި ސުވާލުކުރިއެވެ. ޑަބަލްކީ އޮންނާނީ ކޮންތާކުތަ؟
ޢަލީ ޖަވާބުދިނެވެ. ޑަބަލްކީ ... ޑަބަލްކީ އޮންނާނީ ތިޖޫރީގައި....
ނިމުނީ ހެހެހެހެ.....


ޢިބްރަތް: ޑަބަލްކީ ރައްކާކުރިއަސް ރައްކާކުރަންވާނީ އަސްލު ތަޅުދަނޑި ގެއްލިގެން ޑަބަލްކީއަށްބޭނުވާ ހާލަތުގައި އަތުޖެހޭ ތަނެއްގައެވެ. އެހެންނޫނީ ޢަލީއަށް މިދިމާވި ކަހަލަ ގޮތެއް ތިޔައިން ބޭފުޅަކަށް ދިމާވެދާނެއެވެ. ޑަބަލްކީ ތިޖޫރީގައި އޮތުމުގެ ސަބަބުން ޑަބަލްކީ ނަގަންވެގެން ޢަލީ އަށްޖެހުނީ ތިޖޫރީ ހަލާކޮށްލާށެވެ.