މޫސަބެ
28 ފެބްރުއަރީ 2010 ވީ އާދީއްތަ ދުވަހުގެ ރޭ އެމްޑީޕީގެ ފަރާތުން ބޭއްވި ޢާންމު ޖަލްސާގައި ވާހަކަ ދައްކަމުން، އެމްޑީޕީގެ ޗެއަރޕާސަން، މަދަނީ އިއްތިހާދުގެ އެހީއަށް އެދި ހަރުއަޑުން، އަދި ވަރަށްޞަރީޙަ ޢިބާރާތުން ވަރަށް ފާޅުކަން ބޮޑުގޮތެއްގައި، ގޮވާލައިފައެވެ. ދިވެހިރާއްޖޭގެ ޑްރަގާ ބެހޭ ގާނޫނު ތަންފީޛު ކޮށްދިނުމަށް އެދި މަދަނީ އިއްތިހާދުގައި ބައިވެރިވާ 90 އެތައް ޖަމްޢިއްޔާއެއްގެ ކިބައިން އެދިގޮވާލުމާއިއެކު މަދަނީ އިއްތިހާދުގެ އެހީތެރިކަމާއި ނުލާ އެކަން ނުކުރެވޭނެކަން ދޭހަވާފަދަ އެތައް ޢިބާރާތްތަކެއް ހާމަކޮށްފައިވެއެވެ.
މަދަނީ އިއްތަހާދަކީ މިހާތަނަށް ދިވެހި ރާއްޖޭގެ އެންމެ ބޮޑު އެންޖީއޯ އިއްތިހާދު ކަމުގައިވެފައިވާކަމީ ބައެއް މީހުންނަށް އެކަން ހަޖަމުކުރަން ވަރަށް ދަތިކަމަކަށްވަނީ ވެފައެވެ. މީގެ އިތުރުންވެސް، ހުކުރު ދުވަހު ބޭއްވުނު މުޒާހަރާއަކީ އެތައް ގޮތަކުން ތަފާތުވެފައިވާ މުޒާހަރާއެކެވެ. ރާއްޖޭގެތާރީޚުގައި މިހާތަނަށް މުޒާހަރާއަކަށް އެންމެ ގިނަމީހުން އެއްވި މިއެއްވުމުގައި އެއްވެސް ސިޔާސީ މަޤުޞަދެއް ނެތްކަން ވަރަށްރަނގަޅަށް ހާމަވެގެންގޮސްފައިވެއެވެ. ދިވެހިރާއްޖޭގެ އެކި ކަންކޮޅުތަކުގައި އެއްވަގުތެއްގައި މި މުޒާހަރާ ބޭއްވިފައިވާކަމާއި، އަދި ޢަދާލަތު ޕާޓީގެ އިތުރުން އެމްޑީޕީ، ޑީއާރުޕީ، ޕީއޭ، ޤައުމީޕާރޓީ އަދި އައިޑީޕީ އާއި އަދި މިނޫންވެސް ސިޔާސީ ޕާރޓީތަކުގެ އިސްލާމްދީނަށް ލޯބިކުރާ ވަރަށް ގިނަ ޢާންމު މެމްބަރުންވަނީ މި މުޒާހަރާގައި ބައިވެރިވެފައި ވެއެވެ.
ﷲޙަރާމްކުރެއްވި ބަނގުރަލާ އިދިކޮޅަށް މިއެއްވި އެއްވުމުގައި ހިތާމައާއެކު ފާހަގަކޮށްލަން ޖެހޭކަމެއްވެސް އެބައޮތެވެ. އެއީ އިސްލާމްދީނާއި ރައްޔިތުންދެކެ މާލޯތްބެއްވެގެން ރައްޔިތުންގެ ކަންތައްތައް ކޮށްނުދީ ލޮލަށް ނިދިނައިސްގެން އުޅޭ ބޮޑު ދެޕާޓީ ރަސްމީކޮށް ބައިވެރިނުވާކަމެވެ. އަދި ނުވިތާކަށް މިކަމަށް މަލާމާތާއި ފުރައްސާރައިގެ ބަސްތަކުން މުސްލިމުންގެ ގޮތުގައިތިބެމެ ހަޖޫޖެހިކަމެވެ. މިހާހިސާބުން އުފެދޭ ސުވާލަކީ "އިސްލާމް" މިލަފްޒު މިބައިމީހުން މިކިޔަނީ ކޯއްޗަކަށްބާއެވެ؟
ދިވެހިންގެ ހިތްތަކުގައިވާ އިސްލާމީ ޢަޤީދާ ހަރުދަނާވެ، ތަރައްޤީވަމުން އަންނަ މިފަދަ ދަނޑިވަޅެއްގައި، އެމީހުންގެ ދީނަށާއި ޢަޤީދާއަށް ފުށޫ އަރާފަދަ އެއްވެސް ޢަމަލެއް އެއްވެސް ބަޔަކު ހިންގާކަށް، މި ބިމުގައި ޖާގައެއް ދެވެން ނެތްކަން ދިވެހި ރައްޔިތުން ވަރަށް ސާބިތުކަމާއެކު ހާމަ ކޮށްފިއެވެ.
ނިންމާލުމުގެ ކުރިން އެއްވާހަކަ ބުނެލާނަމެވެ. މުޅިދުނިޔޭގައިވާ ހުރިހާ އިންސާނުން އެއްތާކަށް ޖަމާވެގެން ބަނގުރާ "ހިއްޕެވި" ކަމުގައިވިއަސް އިސްލާމްދީނުގައި އެކަން ހުއްދަވާނެ އެއްވެސް ގޮތެއްނޯންނާނެއެވެ..... ޝުކުރިއްޔާ.

މުރާސިލުގައި ޖިބުއެގެ ހުރިހާ ލިޔުންތައް

ސެންސަރު ނުކުރާ ޖިބުއެގެ ލިޔުންތަކުގެ އޮރިޖިނަލް