ރައްޔިތުންގެ މަޖިލީހުގެ ގައްދޫ ދާއިރާގެ މެމްބަރު ޒާހިރު އާދަމް (ގައްދޫ ޒާހިރު) އެމްޑީޕީ އަށް ސޮއިކުރައްވައިފި އެވެ. ޒާހިރު އާދަމް މިރޭގެ ވަގުތެއްގައި އެމްޑީޕީއަށް ސޮއިކުރެއްވިކަން މީޑިޔާއަށް ޔަގީންކޮށްދެއްވި ނަމަވެސް މިކަމާއި ގުޅިގެން ވަކިއެއްޗެއް މިވަގުތު ދަންނަވަން ބޭނުންފުޅު ނުވާކަމަށް އޭނާ ވިދާޅުވިއެވެ.

ގައްދޫ ދާއިރާގެ މެމްބަރު ޒާހިރު އާދަމަކީ ރައްޔިތުންގެ މަޖިލީހުގައި މިނިވަން މެމްބަރެއްގެ ގޮތުގައި ތަމްސީލް ކުރައްވަމުން ގެންދަވާ ބޭފުޅެކެވެ. މިރޭ އެމްޑީޕީއާ ގުޅިވަޑައިގެންނެވި ޒާހިރު އާދަމް ފާހަގަވެގެން ގޮސްފައިވަނީ ޑީއާރުޕީ އިސްސަފުގައި ހުންނަވައިގެން އޭރު އިދިކޮޅު ޕާޓީއެއްގެ ގޮތުގައި އޮތް އެމްޑީޕީއަށް ވަރަށްބޮޑަށް ފާޑުވިދާޅުވާ އެކިކަހަލަ ޗެލެންޖްތައް ކުރައްވާ ބޭފުޅެއްގެ ގޮތުގައެވެ.

ޖުމްހޫރީ ޕާޓީ އުފެދުނު ދުވަސްވަރު އެޕާޓީއާ ވެސް ގުޅިވަޑައިގެންނެވި ޒާހިރު އާދަމް، ޢަބްދުﷲ ޔާމީން އޭރު އުފައްދަވައިގެން އުޅުއްވި ސިޔާސީ ޖަމްއިއްޔާ ޕީޕަލްސް އެލައިންސް (ޕީއޭ)ގެ ކައުންސިލް މެމްބަރަކަށް ހުންނަވައިގެން ނިޒާމީ ވޯޓްގައި ޕީއޭއާ އެކު ބަރުލަމާނީ ނިޒާމަކަށް ތާއީދުކޮށް ޑީއާރުޕީއާ ދެކޮޅަށް އޭނާ ވަނީ ވަރުގަދަ ކެމްޕޭނެއްވެސް ކުރައްވާފައެވެ.