ދުނިޔޭގެ އެންމެ ނުފޫޒުގަދަ 500 މުސްލިމުން 2010 ގެ ލިސްޓުގައި ރައީސް މުޙައްމަދު ނަޝީދު އާއި މިނިސްޓްރީ އޮފް އިސްލާމިކް އެފެއާޒްގެ ސްޓޭޓްމިނިސްޓަރ އައްޝައިޚް މުޙައްމަދު ޝަހީމް ޢަލީ ސަޢީދު ހިމެނިވަޑައިގެންފިއެވެ.

އުރުދުންގެ ދިރާސާ ގްރޫޕަކުން ނެރުނު ދުނިޔޭގެ އެންމެ ނުފޫޒްގަދަ ފައްސަތޭކަ މުސްލިމުންގެ ލިސްޓްގައި ރައީސުލްޖުމްހޫރިއްޔާ ހިމެނިވަޑައިގެންފައިވަނީ ތިމާވެށީގެ ދާއިރާއިންނާއި މޫސުމީ ބަދަލުތަކަށް ހޭލުންތެރިކުރުމުގެ ގޮތުން ކުރައްވާ މަސައްކަތް ޕުޅުތަކަށެވެ. ސްޓޭޓް މިނިސްޓަރ ޝަހީމް ހިމެނިވަޑައިގަތީ އިދާރީ ހިންގުމުގެ ބައިން އެކިގޮތްގޮތުން އިސްލާމްދީން ކުރިއަރުވަން މަސައްކަތްކުރައްވާ ބޭފުޅެއްގެ ގޮތުގައެވެ.


މި ލިސްޓުގެ އެއްވަނައިގައި ހިމެނިވަޑައިގަންނަވަނީ ސޫދީ ޢަރަބިއްޔާގެ ރަސްގެފާނު ޢަބްދުލްޢަޒީޒު އާލް ސައުދުއެވެ. ދެވަނައިގައި ތުރުކީ ވިލާތުގެ ރައީސް ރަޖަބް ޠައްޔިބު ޢުރުދުޣާން އަދި ތިން ވަނައިގައި އީރާނުގެ ރޫޙާނީ ލީޑަރު ޢާލީ ޚާމަނާއީ އެވެ.

މި ލިސްޓުގައި ރައީސް ނަޝީދަކީ މިހާރު ދުނިޔޭގައި ވެރިކަންކުރައްވާ ލީޑަރުންގެ ތެރެއިން ތިމާވެށީގެ ކަންކަމަށް އެންމެ ހޭލުންތެރި އެއްލީޑަރުގެ ގޮތުގައި ސިފަ ކުރައްވާފައިވެއެވެ. އަދި ރައީސް ނަޝީދުގެ ސިޔާސީ ހަޔާތްޕުޅުގެ ކުރީ ކޮޅު ސިޔާސީ ކުށްވެރިއަކަށްވެ ޖަލުގައި ދުވަސްހޭދަކުރެއްވި ކަމަށާއި، ރާއްޖެއަކީ ދިހަ އަހަރުތެރޭގައި ކާބަން ނިއުޓްރަލް ޤައުމަކަށް ހެއްދެވުމަށް ކުރައްވާ މަސައްކަތްޕުޅު ފާހަގަކޮށްފައިވެއެވެ.

މީގެއިތުރުން އައްޝައިޚު މުޙައްމަދު ޝަހީމް ޢަލީ ސަޢީދު ގެންދަވަނީ އެމަނިކުފާނަށް ލިބިވަޑައިގެންނެވި ދީނީ ތަޢުލީމުގެ ބޭނުން ރާއްޖޭގެ އިސްލާމީ ވުޒާރާ ހިންގުމުގައި ހިއްޕަވަމުންކަން މިލިސްޓުގައި ފާހަގަކޮށްފައިވެއެވެ. އެގޮތުން ރާއްޖޭގެ ދީނީ އެއްބައި ވަންތަކަން ހިމާޔަތްކުރުމާބެހޭ ޤާނޫނުގެދަށުން އެމަނިކުފާނު އިސްވެ ހުންނަވައިގެން އެކުލަވާލެއްވި ދީނީ އެއްބައިވަންތަކަން ހިމާޔަތްކުރުމުގެ ޤަވާއިދުގެ ސަބަބުން ރާއްޖޭގައި އިސްލާމްދީން ހިމާޔަތްކުރުމަށް ޤާނޫނީ އޮނިގަނޑެއް އެކުލެވިގެންދާނެކަމަށް ޝަހީމް ޤަބޫލުކުރައްވާކަމަށްވެސް މިލިސްޓުގައި ފާހަކަކޮށްފައިވެއެވެ.