ޑިސެމްބަރު 31، 2009 ގައި ހިފާ ހަނދުކޭތަ ދިވެހި ރާއްޖެއަށް ފެންނާނެ

މި ޑިސެމްބަރު މަހުގެ 31ގައި ހިފާ ބައި ހަނދުކޭތައަކީ ރާއްޖޭގެ ރަށްތަކަށް ފެންނާނެ ކޭތައެކެވެ. ނަމަވެސް ދުނިޔޭގެ މައި، ނުވަތަ"އަންބްރަލް"، ހިޔަނީގެ ތެރެއަށް ހަނދު ވަންނަނީ ވަރަށް ކުޑަކޮށްކަމުން މިކޭތަ ފެންނާނީ ވަރަށް ކުޑަކޮށެވެ. ހަނދަށް ބަލަހަށްޓައިގެން ސަމާލުވެގެން ހުރިމީހަކަށް ނޫނީ މިކޭތަ ފެނުން ދުރެވެ.

ކޭތައިގެ ފުރަތަމަ މަރުހަލާ ފަށާނީ ރާއްޖެ ގަޑިން 31 ޑިސެމްބަރު 2009ގެ ރޭގަނޑު 10:15 ގައެވެ. މައި ހިޔަނީގެ ތެރެއަށް ހަނދު ވަންނާނީ 31 ޑިސެމްބަރު 2009ގެ ރޭގަނޑު 11:51 ގައެވެ އަދި ހިޔަނިން ނިކުންނާނީ 1 ޖެނުއަރީ 2010ގެ ދަންވަރު 12:55 ގައެވެ. ކޭތައިގެ ފަހު މަރުހަލާ ނިމޭނީ 1 ޖެނުއަރީ 2010ގެ ދަންވަރު 2:30 ގައެވެ.

ހަނދުކޭތައަކީ ހަނދު ދުނިޔެވަށައި ބުރުޖަހަމުންދާއިރު، އިރާ ދުރަށް ވާނޭހެން ދުނިޔޭގެ ބިތްދޮށައް ހަނދު ވަނުމުން ހިފާ ކޭތައެކެވެ. އެއީ ހަނދަކީ އޭގެ ޒާތުގައި އަލި އުފައްދާ އެއްޗަކަށް ނުވެފައި، ހަނދުގެ އަލިކަމަކީ އިރުގެ އަލި ހަނދުގައި ޖެހިފައި އަންނަ އައްޔެއްކަމުން، ދުނިޔޭގެ ހިޔަނީގެ ތެރެއަށް ވަނުމުން އިރުގެ އަލި ހަނދަކަށް ވާސިލެއް ނުވާނެއެވެ. ފުރިހަމަ ކޭތައެއްގައި ހަނދު ދުނިޔޭގެ ހިޔަނީގެ ތެރެއަށް އެއްކޮށްވަދެ ހަނދު އެއްކޮށް އަނދިރިވެއެވެ. ބައި ކޭތައެއްގައި ހަނދު ދުނިޔޭގެ ހިޔަނީގެ ތެރެއަށް އެއްކޮށް ނުވަދެ ހަނދުން އަނދިރިވަނީ ދުނިޔޭގެ ހިޔަނި އެޅިފައިވާ ބައި އެކަންޔެވެ.