އިނގުރައިދޫގެ މީހަކު މަރުވުމާއި ވިދިގެން ހެލްތް މިނިސްޓްރީގެ ޓީމެއް އިއްޔެ ވަނީ އިނގުރައިދޫއަށް ގޮސްފައެވެ. އަދި މިމީހުން އިނގުރައިދޫއަށް ދިޔައިރު އިނގުރައިދޫ ރައްޔިތުންގެ ސަލާމަތަށްޓަކައި ބޭނުންވާނެ އެއްވެސް އެއްޗެއް ގެންދަވާފައި ނުވާ ކަމަކީ ވަރަށް ވެސް ދެރަކަމެކެވެ. މިޔަދުގެ މެންދުރު ހާއިރު މިމީހުން ވަނީ އިނގުރައިދޫ އިން ފުރާފައެވެ. އިނގުރައިދޫގެ އުމުރުން އެންމެ 4 އަހަރުގެ ތުއްތު ކުއްޖަކު މިޔަދުވަނީ އިންފްލޫއެންޒާ-އޭ އަށް ޕްސިޓިވްވެފައެވެ. އަދި އޫރު ރާގާއަށް ޓެސްޓް ކުރުމަށް ގެނައި ސާމްޕަލް ގެ ނަތީޖާ އަދި ވަނީ ލިބޭ ގޮތް ނުވެފައެވެ.

އިނގުރައިދޫގެ ބޭފުޅުން މަޢުލޫމާތު ދެއްވި ގޮތުގައި އިނގުރައިދޫގެ ކުދިބޮޑު އެންމެހާ ރައްޔިތުން މިވަގުތު ތިބީ އިނގުރައިދޫގައި ބަލިމަޑު ކަމެއް ފެތުރި ދާނެ ކަމުގެ ބިރުވެރިކަން މަތީގައެވެ. ހެލްތް މިނިސްޓްރީއަކީ ދިވެހިރާއްޖޭގެ ސިއްޙީ ކަންތައް ތަކާއި ބެހޭ މައި ވުޒާރާއެވެ. އަދި މިކަމާއި ގުޅިގެން މިބޭފުޅުން މިހާ ފަރުވާ ކުޑަގޮތަކަށް އަމަލު ކުރަމުން ގެންދާ ކަމަކީ އިނގުރައިދޫ ރައްޔިތެއްގެ ހަޢިސިއްޔަތުން އަޅުގަނޑު ވަރަށް ކުށްވެރިކުރާ ކަމެކެވެ. އެކަކު އެވަނީ އެބަލީގައި ދުނިޔެ ދޫކޮށްފައެވެ. 4 އަހަރުގެ ތުއްތު ކުއްޖާ އަށް ވާނެ ގޮތެއް އަދި ނޭންގެއެވެ. އިނގުރައިދޫގެ ރައްޔިތުން އެތިބީ ހާސްކަންމަތީގައެވެ.

ޖާރިޔާ އަކާ، ރާވިއްކާ ވާހަކާ މިކަންތައް ތަކަށް ރައްޔިތުންގެ މަޖްލީހާ ސަރުކާރުން ދޭސަމާލު ކަމާއި އެއްވަރަށް މިކަމަށް ސަމާލު ކަން ނުދެވިގެން މިއުޅެނީ ކީއްވެގެން ބާއެވެ. އިނގުރައިދޫގައި އުޅެމުން އެދަނީ ދިވެހިރައްޔިތުންނެއް ނޫންހެއްޔެވެ. މިއީ އަނެއްކާ ރައީސުލް ޖުމްހޫރިއްޔާ ޢަލްފާޟިލް މުޙައްމަދު ނަޝީދު ރ.އަލިފުށީގައި ވިދާޅުވި ގޮތައް ނުލަފާކަން ދައްކާލުން ބާވައެވެ. އަލިފުށީގައި އެމަނިކުފާނު ބުނެފައިވަނީ އެނާގެ ޕާޓީއަށް ވޯޓް ނުދެއްވާފިނަމަ ހުރި ނުލަފާކަން ދައްކާލާނެކަމަށެވެ. އިނގުރައިދޫއިން ރިޔާސީ އިންތިހާބު އަދި ރައްޔިތުންގެ މަޖްލީހުގެ އިންތިހާބުގައި ވެސް ކުރި ހޯއްދަވާފައިވަނީ ޑިއާރުޕީއެވެ. މިއީދެން ނުލަފާކަން ދައްކާލުން ނޫންދެން ކޮންކަމެއް ބާވައޭ ހިތައް އެބައަރައެވެ.

އޫރު ރޯގާ މުޅިއިނގުރައިދޫއަށް ފެތުރިގެންދާނެ ކަމުގެ ބިރު ހީވާއިރު އަނެއްކާ 24 ގަޑިއިރު ހަމަ ހޭގައި ނުހުންނަވާ ސަރުކާރުން ފެތުރިގެންދާނެ ކަމަށް ހީއްކޮށްގެން އެއުޅުއްވަނީ ލޮލުރޯގާ ބާވައޭ ވެސް މިހާރު އެބަހިތައް އަރައެވެ. މިހާރުން މިހާރަށް ދިވެހި ސަރުކާރަށް މިގޮވާލަނީ މިކަމާއި ބެހޭގޮތުން އަމަލީ ފިޔަވަޅުތައް އަޅާ ހެލްތް މިނިސްޓްރީގެ ބަޔަކު އިނގުރައިދޫއަށް ފޮނުވުމަށެވެ. އަދި މިކަން ކޮންޓްރޯލުން ނަށްޓަންވާ އިރަށް ކޮންޓްރޯލް ކުރުމަށެވެ. އެހެން ނޫނީ މުޅިދިވެހިރާއްޖެއަށް އޫރު ރޯގާ ފެތުރިދާނެތީއެވެ. މުޅިރާއްޖެއަށް އޫރު ރޯގާ ފެތުރިއްޖެ ނަމަ ތިމާވެށި އަދި ޑިމޮކްރަސީގެ "ކުޑަބައްޕަ" އަށް ވެސް މިބަލިޖެހިގެން އެކަމުގެ ވޭނުގައި މިދުނިޔެ ދޫކުރަން ޖެހިދާނެއެވެ.