ރޯވެފައިވާ ގިނިހިލައެއް އުޑުހުރަސްކޮށް ދިޔުމަކީ ރާއްޖޭގެ ރައްތަކުގެ ރައްޔިތުންނަށް ކޮންމެވެސް އެއްއިރެއްގައި ފެނިފައިވުން ގާތްކަމެކެވެ. ފެންނަ ފެނުމަށް އެގިނިހިލަ ހީވާނީ ތަންކޮޅެއް އަލިގަދަ ތަރިއެއް ވެއްޓެންދާހެންކަމަށްވަތީ މިކަމަށް އާންމުކޮށް ދިވެހިން ކިޔާ އުޅެނީ ތަރިއޮށްސުމެވެ. އުމުރުގައިވެސް އަދި މިފަދަ ގިނިހިލައެއް ނުފެންނަނަމަ މިމަހުގެ 16،17 އަދި 18 ވަނަ ދުވަހުގެ ރޭގަނޑު އުޑުމައްޗަށް ލޯ ހުށިޔާރުކޮށްލާފައި ބަހައްޓާށެވެ. މީގެ ތެރެއިން 17ވަނަ ދުވަހުގެ ރެޔަކީ ނުޖޫމީ އިލްމުވެރިން އޭޝިޔާގެ ހިސާބުތަކަށް ގަޑިޔަކު ގާތްގަނޑަކަށް 500 ގިނިހިލަ ފެންނާނެ ކަމަށް ލަފާކުރާ ރެއެކެވެ. މިއަހަރު މިވާރޭގެ އަސްލު ދިމާވަނީ ސީދާ ޕްލެނެޓް މާސްއާއި ދިމާލުންކަމުން މިވާރޭ ބަލަން އެންމެ ފަސޭހަވާނީ މާސް އުޑުމަތިން ހޯދާލުމުންނެވެ. މާސްއަކީ އުޑުމަތިން އެންމެ ރަތްކަންބޮޑުކޮށް ފެންނާނެ ތަރިއެވެ.

ލީއަނިޑް ގިނިހިލަތަކަކީ 19ވަނަ ގަރުނުގައި ހޯދިފައިވާ "ޓެމްޕެލް-ޓަޓްލް"ގެ ނަންދެވިފައިވާ ދުންތަރިއަކުން ދޫކުރަމުންދާ ކުނިބުނިން އަންނަ އެތިކޮޅުތަކެކެވެ. މިފަދަ ކުނިބުނިގަނޑު ހެދެނީ ދުންތަރިއެއް އިރުވަށައިގެން ބުރުޖަހަމުންދާއިރު އިރުގެ ހޫނާއިގާތްވެ ދުންތަރީގައިވާ ގަނޑުވެފައިވާ ގޭސްތަކަށް ހޫނުވެ އާތްވަށްބަދަލުވުމުން ގޭސްތަކާއި އެއާއިއެއްކޮށް ގަނޑުވެ ހަރުވެފައިވާ އެތިކޮޅުތައް ނެއްޓުމުންނެވެ. ދުންތަރިއެއް ފެންނައިރު ދުންތަރީގެ ވަށާ އަދި ޚާއްސަކޮށް ފަހަތުގައި ހެދިފައި އޮންނަ ދުންގަޑަކީ މިފަދަ ކުނިބުނިގަނޑެވެ. ވީމާ، ލީކުވަމުންދާ ކުލަފާޓާއެއް ހިފައިގެންދާ މީހާ ދާމަގުގައި ކުލަފައިބާފައި ހުންނަފަދައިން، އިރުވަށައި ދުންތަރިބުރުޖަހާއިރު މިކުނިބުނިގަނޑު ހުރެއެވެ.

ލީއަނިޑް ގިނިހިލަވާރޭއާއި ދުނިޔެއަށް ކުރިމަތިވަނީ ޓެމްޕެލް-ޓަޓްލްއިން ދޫކޮއްފައިވާ ކުނިބުނިގަނޑުގެ ތެރޭން ދުނިޔެ ދަތުރުކޮއްފައި ދާއިރުއެވެ. މިކަން އާންމުކޮށް ދިމާވަނީ ކޮންމެ އަހަރެއްގެ ނޮވެމްބަރު 17އާއެވެ. މިވަރޭއަށް "ލީއަނިޑް"އޭ ކިޔަނީ މިގިނިހިލަތަށް ފެށިގެން އަންނަ ދިމާލަކަށް އުޑުމަތިން ފެންނަނީ ލިޔޯ ތަރި ކޮންސްޓަލޭޝަންކައިރިންވީމައެވެ. ގިނިހިލަތައް އައުމުން ތަރި އޮއްސޭހެން އުޑުމަތިން އެފެންނަނީ ގިނިހިލައިގެ އެތިކޮޅުތައް ދުނިޔޭގެ ވައިގެފަށަލައިގެ ތެރެއަށްވަދެ ވައިގެ މޮލަކިއޫލްސްތައް ގިނިހިލައިގައި ޖެހި ހިނގާ ކަންތައްގަނޑުގައި ރޯވެ ފޯޓޯންސް ދޫކުރުމުންނެވެ.

މިހާތަނަށް އެންމެ ބޯ ލީއަނިޑް ގިނިހިލަވާރޭ ވެހުނީ 1833ގައެވެ. އެއަހަރު ގަޑިއަކު 100،000 (އެއްލައްކަ) އެއްހާ ގިނިހިލަވެހުނެވެ!

އިތުރު މައުލޫމާތު:
http://www.space.com/spacewatch/091101-leonid-meteor-shower-2009.html
http://en.wikipedia.org/wiki/Leonids